នៅថ្ងៃទី៨ ខែកញ្ញា ឆ្នាំ២០២៥នេះ ឯកឧត្តម នូ ផល្លា តំណាងរាស្ត្រសៀមរាប និងក្រុមគ្រួសារ និងប្រជាពលរដ្ឋ បានរួមគ្នាកាន់បិណ្ឌវេនទី១ នៃពិធីបុណ្យកាន់បិណ្ឌ នៅវត្តអារញ្ញសាគរ ក្រុងសៀមរាប ដើម្បីឧទ្ទិសកុសលផលបុណ្យជូនដល់លោកអ្នកមានគុណ ជីដូន ជីតា ញាតិកាដែលបានចែកឋាន និងឧទ្ទិសមគ្គផលជូនដល់ដល់ព្រលឹងបុព្វបុរស យុទ្ធជនយុទ្ធនារី ដែលបានពលីជីវិតក្នុងបុព្វហេតុការពារជាតិមាតុភូមិកម្ពុជា។
ព្រះវិភត្តិមុនីញាណ ហ៊ាក់ គឹមហ៊ត់ ព្រះចៅអធិការវត្តអារញ្ញសាគរ មានថេរដីកាថា ពិធីកាន់បិណ្ឌ និងភ្ជុំបិណ្ឌ ជាពិធីបុណ្យដ៏សំខាន់របស់ដូនតាខ្មែរ ធ្វើឡើងដើម្បីឱ្យកូនចៅគោរព និងឧទ្ទិសមគ្គផល ដល់ញាតិសន្តានដែលបានចែកឋានទៅហើយ និងក៏ជាការជួយទំនុកបំរ៉ុងនូវចតុបច្ច័យដល់ព្រះសង្ឃកំពុងចាំវស្សារយៈពេល៣ខែ ក្នុងទីវត្តអារាម។
ព្រះតេជគុណ បន្ថែមថា ភ្ជុំបិណ្ឌធ្វើឡើងចាប់ពីថ្ងៃ ១រោច ដល់ថ្ងៃ១៥រោច ខែភទ្របទ ជារៀងរាល់ឆ្នាំ ក្នុងន័យឱ្យកូនចៅគ្រប់ៗជំនាន់ចេះស្រឡាញ់ និងសាមគ្គីគ្នា លះបង់សេចក្ដីកំណាញ់ ជួយធុរៈគ្នាទៅវិញទៅមកបណ្តុះនូវគំនិតដល់កូនចៅឱ្យមានភាពកតញ្ញូចំពោះអ្នកមានគុណ ស្គាល់បាបបុណ្យ ស្គាល់គុណស្គាល់ទោស និងដាស់តឿនដល់មនុស្សគ្រប់រូបកុំឱ្យមានសេចក្ដីប្រមាទក្នុងអំពើបាបនានា ញ៉ាំងសទ្ធា និងការសន្សំបុណ្យទុកជាទីពឹងទៅខាងមុខ។
ព្រះតេជគុណ ក៏បានសំណូមពរដល់ពុទ្ធបរិស័ទ ជាពិសេសយុវជនត្រូវសាងអំពើល្អ ចេះគោរព ដឹងគុណ និងមានកតញ្ញុតាធម៌ ដើម្បីរក្សាវប្បធម៌ប្រពៃណីជាតិយើង ពិសេសរក្សាតម្លៃព្រះពុទ្ធសាសនាឱ្យបានស្ថិតស្ថេរគង់វង្សតរៀងទៅ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
