អាជ្ញាធរជាតិអប្សរា បានសហការជាមួយទីភ្នាក់ងារបេតិកភណ្ឌកូរ៉េ រៀបចំវគ្គបណ្តុះបណ្តាលរយៈពេល ៤ថ្ងៃ ចាប់ពីថ្ងៃទី៨-១១ ខែកញ្ញា ដើម្បីពង្រឹងសមត្ថភាពលើវិស័យទេសចរណ៍បេតិកភណ្ឌជាតិ វគ្គនេះផ្តោតលើការអភិរក្ស ការអភិវឌ្ឍផលិតផលទេសចរណ៍ និងការប្រើប្រាស់បេតិកភណ្ឌវប្បធម៌។
ឯកឧត្តម ឡុង កុសល អគ្គនាយករងអាជ្ញាធរជាតិអប្សរា បានលើកឡើងថា វគ្គបណ្តុះបណ្តាលនេះគឺជាសមិទ្ធផលទីពីរ នៃកិច្ចសហការជាមួយកូរ៉េ ដែលនឹងផ្តល់ទស្សនៈវិស័យថ្មីៗ និងជំនាញដល់សិក្ខាកាម។ ឯកឧត្តមថា ចំណេះដឹង និងបទពិសោធន៍ដែលទទួលបានពីអ្នកជំនាញកូរ៉េ នឹងត្រូវយកទៅអនុវត្តដើម្បីស្តារវិស័យទេសចរណ៍នៅកម្ពុជាឡើងវិញ និងបន្តចែករំលែកទៅដល់វិស័យឯកជន និងសាធារណជនទៀតផង។
លោក Kim Hyunsung តំណាងទីភ្នាក់ងារបេតិកភណ្ឌកូរ៉េ ក៏បានបង្ហាញពីក្ដីសោមនស្សរីករាយចំពោះកិច្ចសហការនេះ ដើម្បីអភិរក្ស និងអភិវឌ្ឍផលិតផលទេសចរណ៍ថ្មីៗរួមគ្នា។ លោកបន្ថែមថា វគ្គបណ្តុះបណ្តាលនេះរួមបញ្ចូលទាំងទស្សនកិច្ច និងបទបង្ហាញជាក់ស្តែង ដើម្បីបង្កើនភាពទាក់ទាញនៅក្នុងតំបន់ទេសចរណ៍កម្ពុជា។ លោកសង្ឃឹមថាវានឹងចូលរួមចំណែកយ៉ាងសំខាន់ក្នុងការអភិវឌ្ឍវិស័យទេសចរណ៍ប្រកបដោយនិរន្តរភាពនៅតំបន់រមណីយដ្ឋានអង្គរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
