អាជ្ញាធរខេត្តសៀមរាប បានបង្ហាញថា ក្រោមយន្តការអនុគណៈកម្មាធិការវិនិយោគរាជធានី-ខេត្ត ច្បាប់ស្ដីពីការវិនិយោគថ្មី នឹងផ្ដល់ការទាក់ទាញ និងលើកទឹកចិត្តអ្នកវិនិយោគទាំងក្នុងស្រុក និងអន្តរជាតិកាន់តែខ្លាំង ដោយធ្វើឱ្យកម្ពុជាមានការប្រកួតប្រជែងខ្ពស់ជាមួយប្រទេសក្នុងតំបន់ ហើយច្បាប់ថ្មីនេះក៏បានផ្ទេរសិទ្ធិអំណាចកាន់តែធំដល់រដ្ឋបាលរាជធានី-ខេត្ត ក្នុងការអនុម័តលើគម្រោងវិនិយោគនានាផងដែរ។
ថ្លែងបើកសិក្ខាសាលាស្ដីពីការពិនិត្យ និងការគ្រប់គ្រងការផ្ដល់ការលើកទឹកចិត្ត នៅខេត្តសៀមរាប នាថ្ងៃទី៨ ខែកញ្ញា ឆ្នាំ២០២៥ លោក សុខ ថុល អភិបាលរងខេត្តសៀមរាប បានបញ្ជាក់ថា ថ្វីត្បិតច្បាប់វិនិយោគត្រូវបានអនុម័តជាផ្លូវការតាំងពីឆ្នាំ២០២១ ប៉ុន្តែអនុក្រឹត្យ និងលិខិតបទដ្ឋានគតិយុត្តនានា ទើបតែត្រូវបានដាក់ឱ្យប្រើប្រាស់ជាបណ្ដើរៗ។ ដូច្នេះហើយការបណ្ដុះបណ្ដាលសមត្ថភាពរបស់អនុគណៈកម្មាធិការវិនិយោគរាជធានី-ខេត្ត (អ.គ.វ.រ.ខ) ពិតជាមានសារៈសំខាន់ណាស់ ដើម្បីធានាថា រដ្ឋបាលថ្នាក់ក្រោមជាតិអាចបំពេញតួនាទី និងភារកិច្ចរបស់ខ្លួនប្រកបដោយប្រសិទ្ធភាព។
លោកបានបន្ថែមថា ការផ្ទេរមុខងារ និងសិទ្ធិអំណាចពីថ្នាក់ជាតិមកថ្នាក់ក្រោមជាតិ គឺជាការលើកកម្ពស់គណនេយ្យភាព និងទំនួលខុសត្រូវរបស់រដ្ឋបាលថ្នាក់ក្រោមជាតិ។ ដូច្នេះសិក្ខាសាលានេះគឺមានភាពចាំបាច់ ដើម្បីពង្រឹងការយល់ដឹងរបស់ អ.គ.វ.រ.ខ លើច្បាប់វិនិយោគ និងបទដ្ឋានគតិយុត្តពាក់ព័ន្ធ ព្រមទាំងផ្ដល់ឱកាសឱ្យអ្នកចូលរួមអាចចែករំលែកបទពិសោធន៍ និងលើកឡើងពីបញ្ហាប្រឈមជាក់ស្ដែងក្នុងការអនុវត្តការងារ ដើម្បីស្វែងរកដំណោះស្រាយសមស្រប។
ឯកឧត្តម ពេជ្រ សម្បត្តិ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមការងារអភិវឌ្ឍន៍វិស័យឯកជន បានលើកឡើងថា រាជរដ្ឋាភិបាលបានដាក់ចេញនូវអនុក្រឹត្យលេខ ១២០ អនក្រ.បក ស្ដីពីការរៀបចំ និងការប្រព្រឹត្តិនៃអនុគណៈកម្មាធិការវិនិយោគរាជធានី-ខេត្ត កាលពីថ្ងៃទី២០ ខែមិថុនា ឆ្នាំ២០២២។ អនុក្រឹត្យនេះបានកំណត់ឱ្យ អ.គ.វ.រ.ខ មានតួនាទី និងភារកិច្ចពិនិត្យ និងសម្រេចលើការចុះបញ្ជី ការផ្ដល់ការលើកទឹកចិត្ត និងការដោះស្រាយវិវាទពាក់ព័ន្ធនឹងគម្រោងវិនិយោគឯកជន ដែលមានទុនវិនិយោគសមមូលនឹង ៥លានដុល្លារអាមេរិកចុះក្រោម នៅក្នុងដែនសមត្ថកិច្ចរបស់ខ្លួន។
ឯកឧត្តម ពេជ្រ សម្បត្តិ បញ្ជាក់បន្ថែមថា សិក្ខាសាលានេះនឹងផ្ដោតសំខាន់លើការផ្ទេរសិទ្ធិអំណាចពីក្រសួង-ស្ថាប័នថ្នាក់ជាតិ មកកាន់ អ.គ.វ.រ.ខ ព្រមទាំងពិភាក្សាលើបែបបទបច្ចេកទេស និងបទដ្ឋានគតិយុត្តពាក់ព័ន្ធ ដើម្បីពិនិត្យគម្រោងវិនិយោគនៅថ្នាក់ក្រោមជាតិ។ លោកក៏បានលើកទឹកចិត្តឱ្យសិក្ខាកាមចូលរួមពិភាក្សា លើកជាសំណួរ និងបញ្ហាប្រឈមផ្សេងៗ ដើម្បីឱ្យក្រុមការងារជំនាញមានទិន្នន័យគ្រប់គ្រាន់ និងអាចផ្ដល់ចម្លើយបានច្បាស់លាស់៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
