អនុសាសន៍តាមអនុសាសន៍របស់ សម្ដេចធិបតី ហ៊ុន ម៉ាណែត នាយករដ្ឋមន្ត្រី ក្នុងន័យជួយសម្រាលបន្ទុកក្នុងការធ្វើដំណើររបស់បងប្អូនប្រជាពលរដ្ឋទៅលេងស្រុកកំណើត ក្នុងឱកាសបុណ្យភ្ជុំបិណ្ឌ រដ្ឋបាលរាជរាជធានីភ្នំពេញ នឹងប្រើប្រាស់រថយន្តក្រុងចំនួន ៤៩៧គ្រឿង បម្រើសេវាដឹកជញ្ជូនដោយឥតគិតថ្លៃ រយៈពេល៦ថ្ងៃ ចាប់ពីថ្ងៃទី២០-២៥ ខែកញ្ញា ឆ្នាំ២០២៥ ជូនបងប្អូនប្រជាពលរដ្ឋពីរាជធានីភ្នំពេញ ទៅកាន់ស្រុកកំណើត និងត្រឡប់ទៅវិញ។
ក្នុងនោះរថយន្តក្រុងពីរាជធានីភ្នំពេញ ឆ្ពោះមកកាន់ខេត្តសៀមរាប មានចំនួនសរុប ១១២គ្រឿង ចេញដំណើរចាប់ពីថ្ងៃទី២០ ដល់ថ្ងៃទី២៥ ខែកញ្ញា ឆ្នាំ២០២៥ ចាប់ពីម៉ោង ៦៖៣០នាទីព្រឹក ដែលចំណតនៅរាជធានីភ្នំពេញ ស្ថិតក្នុងដីឡូត៍តំបន់ OCIC ជ្រោយចង្វា (រង្វង់មូលទេពមច្ឆា) មកកាន់ចំណតនៅខេត្តសៀមរាប ស្ថិតក្នុងមណ្ឌលរដ្ឋបាលមន្ទីរខេត្តសៀមរាប (ផ្លូវ៦០)។
ជាមួយនឹងការផ្ដល់ជូននេះ រដ្ឋបាលរាជធានីភ្នំពេញ បានអំពាវនាវដល់ម្ចាស់ក្រុមហ៊ុន ម្ចាស់អាជីវកម្ម និងម្ចាស់រថយន្តដឹកអ្នកដំណើរទាំងអស់ សូមផ្ដល់កិច្ចសហការរក្សាតម្លៃដឹកជញ្ជូនឱ្យនៅដដែល ដោយកុំដំឡើងថ្លៃក្នុងឱកាសពិធីបុណ្យភ្ជុំបិណ្ឌ ដើម្បីរួមចំណែកជាមួយរាជរដ្ឋាភិបាល និងអាជ្ញាធររាជធានីខេត្ត ក្នុងការជួយសម្រួលដល់ការចំណាយ និងជីវភាពរស់នៅរបស់បងប្អូនប្រជាពលរដ្ឋ៕
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
