បើតាមមន្ត្រីជំនាញជលផល នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា រយៈពេល២ឆ្នាំនេះមានត្រីជាង១០០ប្រភេទដែលបានធ្វើរយៈពេល២ឆ្នាំ បន្ទាប់ពីដំណើរជណ្ដើរត្រីទំនប់ស្លែង ក្នុងភូមិសាស្ដ្រស្រុកក្រឡាញ់ ខេត្តសៀមរាប មានត្រីប្រមាណជាង១០០ប្រភេទ ដែលបានធ្វើការបំលាស់ទីតាមជណ្ដើរត្រីនេះ ទៅកាន់តំបន់ផ្សេងៗ។
ក្នុងឱកាសដឹកនាំក្រុមការងារចុះធ្វើការត្រួតពិនិត្យចាប់កូនត្រី ដើម្បីធ្វើការសិក្សាស្រាវជ្រាវអំពីប្រភេទត្រី នៅទីតាំងជណ្ដើរត្រីទំនប់ស្លែង ក្នុងស្រុកក្រឡាញ់ នៅថ្ងៃទី១១ ខែកញ្ញា ឆ្នាំ២០២៥ លោក តុប ចាន់អូន អនុប្រធានវិទ្យាស្ថានស្រាវជ្រាវ និងអភិវឌ្ឍន៍ទឹកសាបនៃរដ្ឋបាលជលផល បានបញ្ជាក់ថា ជណ្ដើរត្រី គឺសាងសង់ឡើងនៅកន្លែងទំនប់ ឬប្រព័ន្ធធារាសាស្ត្រ ដើម្បីជួយសម្រួលដល់ការធ្វើដំណើររបស់ត្រីឆ្លងកាត់ឧបសគ្គ។
លោកបន្តថា ជណ្តើរត្រីមានសារៈសំខាន់ និងផ្តល់អត្ថប្រយោជន៍ជាច្រើនដូចជា៖ ធ្វើជាផ្លូវសម្រាប់ត្រីហែលឡើងចុះបានដោយសេរី ជួយដល់ការផ្លាស់ទីរបស់ត្រីជាច្រើនប្រភេទដែលត្រូវផ្លាស់ទីទៅកាន់តំបន់ផ្សេងៗគ្នា ដើម្បីស្វែងរកអាហារ កន្លែងពងកូន ឬជម្រកថ្មី ហើយអភិរក្សធនធានជលផល ដោយសារជណ្តើរត្រីជួយឲ្យត្រីអាចបន្តវដ្តជីវិតរបស់វាបាន វាក៏ជួយការពារ និងរក្សាបាននូវចំនួនត្រីនៅក្នុងធម្មជាតិ ជាពិសេសប្រភេទត្រីដែលធ្វើដំណើរផ្លាស់ទីតាមរដូវកាល ព្រមទាំងមានសារៈសំខាន់ណាស់ក្នុងការការពារកុំឲ្យប្រភេទត្រីក្នុងស្រុកមានការថយចុះផងដែរ។
លោក សុខ ណារ៉េត អភិបាលស្រុកក្រឡាញ់ បានបង្ហាញថា ជណ្តើរត្រីទំនប់ស្លែង គឺបានផ្តល់ប្រយោជន៍ជាច្រើនសម្រាប់ឱ្យត្រីគ្រប់ប្រភេទអាចឡើងពងកូន នៅតាមតំបន់ផ្សេងៗបាន។
ជណ្ដើរត្រី មិនត្រឹមតែជាការវិនិយោគលើហេដ្ឋារចនាសម្ព័ន្ធប៉ុណ្ណោះទេ តែវាជាការវិនិយោគដ៏មានសារៈសំខាន់ក្នុងការលើកកម្ពស់ជីវភាពរបស់បងប្អូនប្រជាពលរដ្ឋ និងថែរក្សាធនធានជលផលធម្មជាតិសម្រាប់មនុស្សជំនាន់ក្រោយ ហើយនៅពេលត្រីក្នុងធម្មជាតិមានច្រើន ប្រជាពលរដ្ឋមិនចាំបាច់ចំណាយប្រាក់ច្រើនដើម្បីទិញត្រីយកមកហូបនោះទេ។
ក្នុងនាមអាជ្ញាធរស្រុក លោកសូមថ្លែងអំណរគុណដល់រាជរដ្ឋាភិបាល ក្រសួងស្ថាប័នពាក់ព័ន្ធ និងអង្គការដៃគូអភិវឌ្ឍន៍នានា ដែលបានជួយទំនុកបម្រុងការអភិរក្សធនធានធម្មជាតិ ជាពិសេសធនធានជលផល ដែលធ្វើឱ្យមូលដ្ឋានស្រុកក្រឡាញ់ កាន់តែមានធនធានត្រីសម្រាប់អាហារបរិភោគដល់ប្រជាជននៅក្នុងមូលដ្ឋាន ហើយលោកសង្ឃឹមថា តាមរយៈជណ្តើរត្រីនេះ នឹងធ្វើឱ្យទិន្នផលត្រីក្នុងមូលដ្ឋានកើនឡើង ជាពិសេសប្រភេទត្រីដែលជិតផុតពូជអាចនឹងត្រូវបានកើនឡើងវិញ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
