នាព្រឹកថ្ងៃទី១៥ ខែកញ្ញា ឆ្នាំ២០២៥ នេះ គណៈប្រតិភូក្រសួងការពារជាតិ ដឹកនាំដោយ ឯកឧត្តម នាយឧត្តមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញចុះសួរសុខទុក្ខ និងនាំយកអំណោយជូនដល់បងប្អូនយោធិនពិការ ចំនួន ២៨៧គ្រួសារ ដែលកំពុងរស់នៅមជ្ឈមណ្ឌលអភិវឌ្ឍយោធិនពិការ សម្តេចតេជោ ហ៊ុន សែន គូលែន៣១៧ ខេត្តសៀមរាប ក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរ។
ក្នុងឱកាសនោះ ឯកឧត្តម នាយឧត្តមសេនីយ៍ ឃឹម ប៊ុនសុង បានពាំនាំនូវប្រសាសន៍ផ្ដាំផ្ញើសួរសុខទុក្ខពីថ្នាក់ដឹកនាំរាជរដ្ឋាភិបាលកម្ពុជា ដែលតែងតែគិតគូរខ្ពស់ពីសុខទុក្ខ និងជីវភាពរស់នៅរបស់យោធិន យោធិនពិការ និងគ្រួសារកងទ័ពគ្រប់រូប។ រាល់ការចុះសួរសុខទុក្ខនេះ គឺជាការបង្ហាញពីការដឹងគុណចំពោះវីរភាពដ៏អង់អាចក្លាហានរបស់យោធិនពិការ ដែលបានលះបង់សាច់ស្រស់ឈាមស្រស់ដើម្បីបុព្វហេតុការពារជាតិមាតុភូមិ រហូតធ្វើឱ្យកម្ពុជាមានសុខសន្តិភាព និងការអភិវឌ្ឍរីកចម្រើនដូចសព្វថ្ងៃ។
ឯកឧត្តម នាយឧត្តមសេនីយ៍ បានសម្តែងការកោតសរសើរយ៉ាងខ្លាំងចំពោះមជ្ឈមណ្ឌលអភិវឌ្ឍយោធិនពិការ សម្តេចតេជោ ហ៊ុន សែន គូលែន៣១៧ ដែលបានអនុវត្តការងារសង្គមបានយ៉ាងល្អប្រសើរ។ ទោះបីបងប្អូនយោធិនជាយោធិនពិការក៏ពិតមែន ប៉ុន្តែពួកគេនៅតែមានមនសិការស្នេហាជាតិខ្ពស់ ដោយបានចូលរួមចំណែកយ៉ាងសកម្មក្នុងការផ្គត់ផ្គង់ស្បៀងអាហារដល់គ្រួសារភៀសសឹក និងគ្រួសារកងទ័ព។ ឯកឧត្តម ក៏បានថ្លែងអំណរគុណដល់ក្រុមគ្រួសារយោធិនពិការ ដែលបានបាត់បង់ស្វាមី និងសមាជិកគ្រួសារ ក្នុងការបម្រើជាតិ។
ឯកឧត្តម បានអំពាវនាវដល់យោធិនពិការទាំងអស់ ឱ្យបន្តថែរក្សាសុខភាព និងចូលរួមយ៉ាងសកម្មក្នុងការងារសង្គម និងការទប់ស្កាត់ជំងឺផ្សេងៗ។ ជាមួយគ្នានោះ ឯកឧត្តម បាននាំយកអំណោយ និងថវិការបស់ ឯកឧត្តម នាយឧត្តមសេនីយ៍ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៅចែកជូនដល់យោធិនពិការ និងគ្រួសារចំនួន ២៨៧គ្រួសារ និងគ្រូបង្រៀន ពេទ្យឆ្មប ព្រមទាំងឧបត្ថម្ភថវិកាចំនួន ៣លានរៀល ដល់មជ្ឈមណ្ឌល ដើម្បីប្រើប្រាស់ក្នុងអង្គភាព៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
