គណៈកម្មការលទ្ធកម្មសង្កាត់ស្លរក្រាម ខេត្តសៀមរាប នៅថ្ងៃទី១៥ ខែកញ្ញា ឆ្នាំ២០២៥ បានបញ្ចប់ការដេញថ្លៃគម្រោងសាងសង់ផ្លូវបេតុងអាមេ ៣ខ្សែ ប្រវែង ៧៤៩ម៉ែត្រ ដោយមានការចូលរួមពីមន្ត្រីបច្ចេកទេសសាលាខេត្ត គណៈកម្មការលទ្ធកម្មសង្កាត់ រួមនិងតំណាងក្រុមហ៊ុនដេញថ្លៃ និងអ្នកសារព័ត៌មាន។
លោក ខៀវ សត ប្រធានគណៈកម្មការលទ្ធកម្មសង្កាត់ស្លរក្រាម បានឱ្យដឹងថា សម្រាប់ឆ្នាំ២០២៥នេះ សង្កាត់បានដាក់ដេញថ្លៃគម្រោងសាងសង់ផ្លូវបេតុងអាមេចំនួន៣ខ្សែ។ សម្រាប់គម្រោងទី១ គម្រោងសាងសង់ផ្លូវបេតុងអាមេ២ខ្សែ ប្រវែង ៤៩៩ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ និងមានក្រួសក្រហមស្មើផ្លូវទាំងសងខាង សាកគម្រោងចំនួន២ ស្លាកសញ្ញាចរាចរណ៍ចំនួន១ ស្ថិតក្នុងភូមិបន្ទាយចាស់ និងភូមិចុងកៅស៊ូ ក្នុងតម្លៃប៉ាន់ស្មាន ២៩៥ ១៥៩ ៦៧៦ រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន ពៅ រ៉ាឌីខនស្រ្តាក់សិន ក្នុងតម្លៃប្រមាណ ២៩២ ៧៦៣ ៣០០ រៀល ។
លោក ខៀវ សត បានឱ្យដឹងទៀតថា សម្រាប់គម្រោងទី២ ជាគម្រោងសាងសង់ផ្លូវបេតុងអាមេ១ខ្សែ ប្រវែង ២៥៩ម៉ែត្រ ទទឹង៧ម៉ែត្រ កម្រាស់បេតុង០.១៥ម៉ែត្រ និងមានក្រួសក្រហមស្មាផ្លូវសងខាង ស្លាកគម្រោងចំនួន១ ស្ថិតក្នុងភូមិបឹងដូនប៉ា ក្នុងតម្លៃប៉ាន់ស្មាន ២០៧ ០៧០ ៦៥១ រៀល ដោយមានក្រុមហ៊ុនចំនួន៤ បានដាក់សំណើ។ ជាលទ្ធផលបានទៅលើក្រុមហ៊ុន អ៊ឹង លីសួរ ក្នុងតម្លៃប្រមាណ ២០៥ ៩៥០ ០០០ រៀល។
ជាមួយនឹងការទទួលបានគម្រោងសាងសង់ផ្លូវខាងលើ តំណាងក្រុមហ៊ុនដែលទទួលបានការម៉ៅការទាំង២ បានធ្វើការប្ដេជ្ញាចិត្តដោយសន្យាថា នឹងធ្វើឱ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស និងតាមលក្ខខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ឡេង ពិសិដ្ឋ
កែសម្រួល៖ លោក អ៊ុន ណារាជ្យ
