ក្រោមគំនិតផ្ដួចផ្ដើមរបស់ ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប នៅថ្ងៃទី១៤ ខែកញ្ញា ឆ្នាំ២០២៥ លោកជំទាវ ទុយ ជិ ប្រាក់ សោ ភ័ណ អនុប្រធានគណៈកម្មាធិការសាខា បានដឹកនាំក្រុមការងារប្រគល់ផ្ទះមនុស្សធម៌ទី៩៦ ជូនដល់លោកយាយ នួន ជួន អាយុ ៨១ឆ្នាំ ជាជនចាស់ជរា គ្មានកូន រស់នៅភូមិបាក់អង្រុត ឃុំគោកធ្លកក្រោម ស្រុកជីក្រែង ខេត្តសៀមរាប។
ក្នុងឱកាសនោះ លោកជំទាវ ទុយ ជិ ប្រាក់សោ ភ័ណ បាននាំយកនូវប្រសាសន៍ផ្ដាំផ្ញើ នឹករលឹកដ៏ខ្ពង់ខ្ពស់ពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ប្រាក់ សោភ័ណ ប្រធានគណៈកម្មាធិការសាខា ដែលតែងតែគិតគូរចំពោះសុខទុក្ខបងប្អូនប្រជាពលរដ្ឋគ្រប់រូបប្រកបដោយភាពកក់ក្ដៅ និងស្និទ្ធស្នាល ដោយមិនប្រកាន់វណ្ណៈ ជំនឿសាសនា ឬនិន្នាការនយោបាយណាមួយស្របតាមទិសស្លោកថា “កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។
លោកជំទាវ ទុយ ជិ បញ្ជាក់ថា ផ្ទះថ្មីរបស់លោកយាយ នួន ជួន ដែលក្រុមការងារប្រគល់ជូននាពេលនេះ សាងសង់ឡើងក្រោមការឧបត្ថម្ភរបស់ លោក កង សុទ្ធី និង លោកស្រី ចាន់ ហ៊ុយជូ ព្រមទាំងបុត្រ ដែលមានទឹកប្រាក់សរុបចំនួន ៣ ៨០០ដុល្លារ មានទំហំ៦ គុណ៦ម៉ែត្រ មានបន្ទប់គេង២ បន្ទប់ទឹក១ ដំបូលប្រក់ស័ង្កសីភ្លីក្បឿង ជញ្ជាំងឥដ្ឋ បាតក្រាលការ៉ូមានកម្ពស់ផុតពីដី ០.៥ម៉ែត្រ និងចាក់សាបជុំវិញ។ ក្រៅពីប្រគល់ផ្ទះ ក្រុមការងារក៏បានផ្ដល់ជូនអំណោយមួយចំនួនមាន៖ អង្ករ ៩០គីឡូក្រាម, មី១កេស, ត្រីខ ១យួរ, ទឹកត្រី ១យួរ, អំបិល ១គីឡូក្រាម, កន្ទេល២, ឃីត ២កញ្ចប់, សម្ភារផ្ទះបាយ និងថវិកា ៤០ម៉ឺនរៀល។
ក្នុងឱកាសនោះដែរ ក្រុមការងារក៏បានផ្ដល់អំណោយជូនគ្រួសាររងគ្រោះក្នុងស្រុកជីក្រែងចំនួន ៤០គ្រួសារ ដោយក្នុង១គ្រួសារមាន៖ អង្ករ ៣០គីឡូក្រាម, មី១កេស, ត្រីខ១យួរ, ទឹកត្រី ១យួរ, អំបិល ១គីឡូក្រាម, ឃីត១កញ្ចប់ និងថវិកា ៤ម៉ឺនរៀល៕
ប្រភព៖ សាខាកាកបាទក្រហមខេត្ត
កែសម្រួល៖ លោក អ៊ុន ណារាជ្យ
