មន្ត្រីជានខ្ពស់ក្រសួងសាធារណការ និងដឹកជញ្ជូន បានអំពាវនាវដល់អ្នកធ្វើអាជីវកម្មដឹកជញ្ជូនតាមផ្លូវគោកទាំងអស់ឱ្យមានការគោរពច្បាប់ ដោយមិនត្រូវដឹកទំនិញលើសទម្ងន់ដែលច្បាប់កំណត់នោះទេ ព្រោះការដឹកជញ្ជូនលើសទំងន់គឺមិនមែនមានតែផលប៉ះពាល់ដល់ផ្លូវប៉ុណ្ណោះទេ ប៉ុន្តែប៉ះពាល់ដល់សុវត្ថិភាពអាយុជីវិត និងសេដ្ឋកិច្ចសង្គមទាំងមូល។
ក្នុងកិច្ចប្រជុំផ្សព្វផ្សាយអំពីច្បាប់ និងលិខិតបទដ្ឋានគតិយុត្តនានា ពាក់ព័ន្ធនឹងការដឹកជញ្ជូនលើសទម្ងន់កម្រិតកំណត់ ជូនអ្នកពាក់ព័ន្ធក្នុងខេត្តសៀមរាប នាថ្ងៃទី១៦ ខែកញ្ញា ឆ្នាំ២០២៥ ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៍ថា ការដឹកលើសទម្ងន់នៅតែជាបញ្ហាប្រឈម ខណៈដែលសមត្ថកិច្ចពាក់ព័ន្ធបានខិតខំគ្រប់វិធីសាស្ត្រនៅក្នុងការទប់ស្កាត់ ដូចជាការផ្សព្វផ្សាយអប់រំអំពីច្បាប់ លិខិតបទដ្ឋានគតិយុត្តនានាដែលពាក់ព័ន្ធ ការចាប់ពិន័យជាថវិកា ការដកហូតយានយន្តទុកជាដើម ដែលវិធានការទាំងអស់នេះ ឃើញថាបញ្ហាដឹកលើសទម្ងន់នេះមានការថមថយចុះជាបណ្តើរៗ។
ឯកឧត្តម សេង ឈួន បន្តថា ការដឹកលើសទម្ងន់វាបានជះឥទ្ធិពលអាក្រក់ ក្រៅពីការបំផ្លាញផ្លូវថ្នល់ វាបានបង្កជាផលប៉ះពាល់ដល់សុវត្ថិភាពអាយុជីវិតប្រជាជន និងសេដ្ឋកិច្ចសង្គមជាតិទាំងមូល។ បើទោះបីជាយ៉ាងនេះក្តី រាជរដ្ឋាភិបាលកម្ពុជា នៅតែរក្សាឥរិយាបទទន់ភ្លន់នៅក្នុងការផ្សព្វផ្សាយអប់រំដល់ប្រជាពលរដ្ឋអំពីច្បាប់គតិយុត្តនានា ដោយសំដៅធ្វើយ៉ាងណាមិនឲ្យប៉ះពាល់ដល់ការប្រកបអាជីវកម្មទទួលទានចិញ្ចឹមជីវិតរបស់ប្រជាពលរដ្ឋ។
លោក ឌី រ៉ាដូ អភិបាលរងខេត្ដសៀមរាប បានណែនាំដល់មន្រ្ដីជំនាញពាក់ព័ន្ធនឹងវិស័យដឹកជញ្ជូននៅក្នុងខេត្ដសៀមរាបទាំងអស់ ត្រូវក្ដាប់ឲ្យបាននូវទិន្នន័យនៃការដឹកជញ្ជូនរបស់រថយន្ដធន់ធ្ងន់លើសកម្រិត និងចាត់វិធានការណ៍ទៅតាមផ្លូវច្បាប់ចំពោះរថយន្តណាដែលផ្ទុកលើសទម្ងន់កម្រិតកំណត់។ ជាមួយគ្នានេះ ក៏សូមអ្នកពាក់ព័ន្ធ ទាំងអស់ត្រូវយកចិត្តទុកដាក់គោរពច្បាប់ ស្ដីពីចរាចរណ៍ផ្លូវគោកឱ្យបានខ្ជាប់ខ្ជួន សំដៅរួមគ្នាកាត់បន្ថយគ្រោះថ្នាក់ចរាចរណ៍ឲ្យមកនៅកម្រិតទាប ដែលនេះគឺជាផ្នែកមួយដ៏សំខាន់ ដើម្បីឈានទៅចូលរួមលុបបំបាត់សកម្មភាពអនាធិបតេយ្យនៃការធ្វើចរាចរណ៍តាមដងផ្លូវសាធារណៈ និងជំរុញការអនុវត្តច្បាប់ឲ្យទទួលបានលទ្ធផលជាវិជ្ជមាន។
លោក លឿម រស្មី ប្រធានមន្ទីរសាធារណការ និងដឹកជញ្ជូនខេត្តសៀមរាប បានឱ្យដឹងថា ក្នុងឆមាសទី១ ឆ្នាំ២០២៥ ការអនុវត្តច្បាប់អនុគណៈកម្មការសុវត្ថិភាពចារចរណ៍ផ្លូវគោកខេត្តសៀមរាប បានត្រួតពិនិត្យយានយន្តសរុប ១ ០២២គ្រឿង ក្នុងនោះរថយន្តខុសលក្ខណៈបច្ចេកទេស២៩៤គ្រឿង។ ជាមួយគ្នានេះ ក៏មានកិច្ចសហការជាមួយសមត្ថកិច្ចប្រឆាំងបទល្មើសគ្រឿងញៀន បានពិនិត្យរកសារធាតុញៀនអ្នកបើកបរសរុប ២៥១នាក់ មានអ្នកផ្ទុកសារធាតុញៀន ២០នាក់ ក្នុងនោះអ្នកបើកបររថយន្ត ១៤នាក់ ព្រូរថយន្ត ៥នាក់ អ្នករួមដំណើរម្នាក់។
លោកបន្តថា រយៈពេលដូចគ្នានេះ អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានចេញសេចក្តីអំពាវនាវទប់ស្កាត់គ្រោះថ្នាក់ចរាចរណ៍ និងបានរៀបចំយុទ្ធនាការពញ្ញាក់ស្មារតីដល់អ្នកបើកបរយានយន្ត គ្រប់ប្រភេទនៅលើដងផ្លូវ នៅមុនឱកាសបុណ្យជាតិសំខាន់ៗ ដោយបានអោយកំលាំងចុះធ្វើការណែនាំ ផ្សព្វផ្សាយអប់រំ ចែកខិតបណ្ណ និងចងបដាពាក្យស្លោកអប់រំអំពីសុវត្ថិភាពចរាចរណ៍នៅតាមដងផ្លូវជាតិ និងទីប្រជុំជននានាក្នុងខេត្ត ចុះធ្វើការផ្សព្វផ្សាយ អប់រំច្បាប់ស្តីពីចរាចរណ៍ផ្លូវគោក ជូនដល់ សហគមន៍ ប្រជាពលរដ្ឋ កងកម្លាំងប្រដាប់អាវុធ លោកគ្រូ អ្នកគ្រូ និងសិស្សានុសិស្សផងដែរ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
