ក្នុងឱកាសទទួលជួបពិភាក្សាការងារជាមួយ លោកបណ្ឌិត អានៀបាន ឆាតឺរជី នាយករងអង្គការយូនីសេហ្វប្រចាំកម្ពុជា នារសៀលថ្ងៃទី១៦ ខែកញ្ញា ឆ្នាំ២០២៥ ឯកឧត្តម ប្រាក់ សោភ័ណ អភិបាលខេត្តសៀមរាប បានអំពាវនាវ និងសំណូមពរដល់ Unicef បន្តជួយគាំទ្រដល់រដ្ឋបាលខេត្ត ទាំងធនធាន និងបច្ចេកទេស សំដៅកាត់បន្ថយភាពក្រីក្រ ក៏ដូចជាបំពេញតម្រូវការជាក់ស្តែងនៅថ្នាក់មូលដ្ឋាន។
ឯកឧត្តម ប្រាក់ សោភ័ណ បានបង្ហាញថា ចាប់តាំងពីឆ្នាំ២០២២ រហូតមកទល់បច្ចុប្បន្ននេះ អង្គការយូនីសេហ្វ បានគាំទ្រដល់រដ្ឋបាលខេត្ត លើគម្រោងកិច្ចការពារកុមារ រួមជាមួយការជួយគាំទ្រទាំងផ្នែកបច្ចេកទេស និងធនធានថវិកាដល់រដ្ឋបាលខេត្ត ក្នុងការអនុវត្តសកម្មភាពសេវាសង្គម និងកិច្ចការពារកុមារនៅថ្នាក់ខេត្ត ក្រុងស្រុក និងឃុំសង្កាត់។
ឯកឧត្តម អភិបាលខេត្ត ក៏សូមថ្លែងអំណរគុណដល់អង្គការយូនីសេហ្វ ដែលជានិច្ចកាលតែងតែគិតគូរ យកចិត្តទុកដាក់ ព្រមទាំងបានសហការយ៉ាងល្អ និងរលូនជាមួយក្រសួងមហាផ្ទៃ ក្នុងការជួយគាំទ្រដល់ការអនុវត្តគោលនយោបាយគាំពារសង្គមសម្រាប់រដ្ឋបាលថ្នាក់ក្រោមជាតិ ជាពិសេសរដ្ឋបាលខេត្តសៀមរាប តាំងពីដើមរហូតមកទល់បច្ចុប្បន្ននេះ។
សូមបញ្ជាក់ថា អង្គការយូនីសេហ្វ បានគាំទ្រដល់រដ្ឋបាលខេត្តសៀមរាប ដោយបានអនុវត្តជាលក្ខណៈគម្រោង សកម្មភាព ចាប់តាំងពីឆ្នាំ២០១៨ រហូតមកដល់បច្ចុប្បន្ននេះ អង្គការយូនីសេហ្វ បានចាប់ផ្ដើមធ្វើការដោយផ្ទាល់ ជាមួយរដ្ឋបាលខេត្តសៀមរាប តាមរយៈយន្តការសម្របសម្រួលពីក្រសួងមហាផ្ទៃ ក្នុងការអនុវត្តសៀវភៅណែនាំ ស្តីពីការអនុវត្តសកម្មភាពសេវាសង្គមឃុំសង្កាត់៕
ប្រភព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
