នៅព្រឹកថ្ងៃទី១៧ ខែកញ្ញា ឆ្នាំ២០២៥ បងប្អូនជាជនភៀសសឹកចំនួន ១០២គ្រួសារ ដែលកំពុងស្នាក់នៅក្នុងវត្តបូណ៍ខ្នាតេជោ ឃុំជន្លាសដៃ ស្រុកក្រឡាញ់ ខេត្តសៀមរាប បានទទួលអំណោយជាគ្រឿងឧបភោគបរិភោគ និងថវិកាពីសប្បុរសជន តាមរយៈលោក ផែង វណ្ណៈ ដែលការផ្ដល់ជូននេះ ក៏មានការចូលរួមពី លោក ឌី រ៉ាដូ អភិបាលរងខេត្ត រួមនឹងអាជ្ញាធរមូលដ្ឋានជាច្រើនរូប។
ក្នុងឱកាសនោះ លោក ឌី រ៉ាដូ បានថ្លែងអំណរគុណដល់សប្បុរសជន ដែលបានចូលរួមដោះស្រាយទុក្ខលំបាករបស់បងប្អូនជនភៀសសឹក ជាមួយរាជរដ្ឋាភិបាលកម្ពុជា និងអាជ្ញាធរខេត្ត ដោយមិនទុកឱ្យប្រជាពលរដ្ឋណាម្នាក់ចោលឡើយ។
លោក ឌី រ៉ាដូ មានប្រសាសន៍ថា សង្គ្រាមឈ្លានពានរបស់ថៃមកលើកម្ពុជា មិនត្រឹមតែធ្វើឱ្យបាត់បង់ជីវិតកងទ័ព និងខូចខាតទ្រព្យសម្បត្តិប៉ុណ្ណោះទេ តែវាថែមទាំងបានបង្កការឈឺចាប់ដល់កុមារ មនុស្សចាស់ ស្ត្រីមានផ្ទៃពោះ ដែលត្រូវឱ្យពួកគាត់រត់ភៀសខ្លួន ចោលផ្ទះសម្បែង ជាមួយនឹងស្នាមរបួសផ្លូវកាយ និងផ្លូវចិត្តដែលមិនអាចលុបបំបាត់បានដោយសារភ្លើងសង្គ្រាមឈ្លានពានរបស់យោធាថៃ មកលើប្រជាជនខ្មែរស្លូតត្រង់។
លោកអភិបាលរងខេត្ត បន្តថា ទោះជាយ៉ាងណាអាជ្ញាធរខេត្ត និងអាជ្ញាធរក្រុងស្រុក ក៏បានយកចិត្តទុកដាក់ជាប់ជាប្រចាំចំពោះលើសុខទុក្ខបងប្អូនភៀសសឹក ពិសេសការផ្គត់ផ្គង់ស្បៀងអាហារ ទោះស្ថិតក្នុងកាលៈទេសៈណាក៏ដោយ ក៏អាជ្ញាធរនៅជាប់ជាមួយបងប្អូនជានិច្ច។ លោកក៏បានអំពាវនាវ ដល់ប្រជាពលរដ្ឋភៀសសឹក ពេលមានតម្រូវការ ឬបញ្ហាអ្វីមួយ សូមទំនាក់ទំនងជាមួយទីស្នាក់ការគណៈកម្មការទទួលជនភៀសសឹកដែលខ្លួនកំពុងស្នាក់នៅ ជៀសវាងប្រើប្រាស់បណ្ដាញសង្គមដើម្បីដោះស្រាយបញ្ហា។ សូមជឿជាក់លើរាជរដ្ឋាភិបាលកម្ពុជា ក្នុងការដោះស្រាយបញ្ហានេះដោយសន្តិវិធី និងឆាប់រហ័ស។ ប្រសិនបើបងប្អូនមានបំណងចង់ទៅត្រឡប់ទៅផ្ទះវិញ រដ្ឋបាលខេត្តសៀមរាប ក៏មានរថយន្តដឹកជញ្ជូនបងប្អូនប្រជាពលរដ្ឋទៅផ្ទះវិញផងដែរ៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
