នៅព្រឹកថ្ងៃទី១៧ ខែកញ្ញា ឆ្នាំ២០២៥ ឯកឧត្តម លី សំរិទ្ធ ប្រធានក្រុមប្រឹក្សាខេត្ត និង ឯកឧត្តម ប្រាក់ សោភ័ណ អភិបាលខេត្តសៀមរាប រួមនឹង ឯកឧត្តម លោកជំទាវ លោកលោកស្រីជាថ្នាក់ដឹកនាំខេត្ត មន្ទីរអង្គភាព មន្ត្រីរាជការ ចូលរួមកាន់បិណ្ឌវេនទី១០ នៅវត្តប្រាសាទគោកចក ក្រុងសៀមរាប ដើម្បីឧទ្ទិសកុសលផលបុណ្យជូនជីដូនជីតា និងដើម្បីឧទ្ទិសកុសលជូនចំពោះវិញ្ញាណក្ខន្ធវីវកងទ័ពខ្មែរដែលបានពលីជីវិតក្នុងបុព្វហេតុការពារបូរណភាពទឹកដី។
ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក មានថេរដីកាថា ពិធីកាន់បិណ្ឌ ពុទ្ធសាសនិកជនខ្មែរ ត្រូវបានប្រារព្ធបដិបត្តិធ្វើឡើងរយៈពេល១៥ថ្ងៃ ហើយរដ្ឋបាលខេត្តបានកំណត់កម្មវិធីរបស់ខ្លួន ចូលរួមជាមួយប្រជាពុទ្ធបរិស័ទតាមទីអារាមនានាគ្រប់បណ្តាថ្ងៃសំខាន់ៗ ដោយការជួបជុំគ្នានាំយកនូវចង្ហាន់ ទ័យ្យវត្ថុ និងបច្ច័យ ទៅវេរប្រគេនចំពោះព្រះសង្ឃ ឧទ្ទិសកុសលផលបុណ្យជូនដល់ដួងវិញ្ញាណក្ខន្ធជីដូនជីតា និងញាតិការទាំង៧សណ្តាន ដែលបានចែកឋាន ពិសេសជាការឧទ្ទិសដល់ដួងវិញ្ញាណក្ខន្ធដល់កម្មាភិបាល យុទ្ធជន ដែលបានពលីជីវិត ក្នុងបុព្វហេតុការពារកសាង អភិវឌ្ឍន៍ជាតិមាតុភូមិកម្ពុជា និងប្រជាពលរដ្ឋដែលបានបាត់បង់ជីវិតក្នុងរបបកម្ពុជាប្រជាធិបតេយ្យប្រល័យពូជសាសន៍ ប៉ុល ពត សំខាន់ជូនដល់វិញ្ញាណក្ខន្ធវីរកងទ័ព ដែលបានពលីជីវិតក្នុងបុព្វហេតុការពារបូរណភាពទឹកដី។
ព្រះគ្រូវិចិត្រវង្សា ហែម គឹមសាន មានថេរដីកាទៀតថា ពិធីបុណ្យភ្ជុំបិណ្ឌ ត្រូវបានប្រារព្ធឡើងវិញ ដោយបើកទូលាយដោយរាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តដឹកនាំដោយ សម្តេចធិបតីហ៊ុន ម៉ាណែត នាយករដ្ឋមន្ត្រី បាននិងកំពុងធ្វើឲ្យប្រទេសជាតិ មានការអភិវឌ្ឍន៍រីកចម្រើនលើគ្រប់វិស័យ។ ក្នុងនោះក៏បានធ្វើឱ្យវិស័យព្រះពុទ្ធចក្រមានការរីកចម្រើន ហើយប្រពៃណីព្រះពុទ្ធសាសនា ក្នុងជំនឿកាន់បិណ្ឌ ត្រូវបានប្រជាពលរដ្ឋខ្មែរនាំគ្នាគោរពប្រតិបត្តិយ៉ាងខ្ជាប់ខ្ជួនរហូតមកដល់សព្វថ្ងៃ។
សូមជម្រាបថា ក្នុងឱកាសនោះដែរ ឯកឧត្តមប្រធានក្រុមប្រឹក្សា និង ឯកឧត្តម អភិបាលខេត្ត បាននាំយកបច្ច័យរបស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង លោកជំទាវ ចំនួន ៥ ០០០ដុល្លារ រួមទាំងរដ្ឋបាលខេត្ត និងប្រជាពុទ្ធបរិស័ទនូវបច្ច័យសរុប ៨លាន ៣សែនរៀល ដើម្បីយកទៅកសាងសមិទ្ធផលនានា នៅក្នុងទីវត្តប្រាសាទគោកចក និង សីលវ័ន្ត សីលវន្តី ចំនួន ៥០នាក់ ក្នុងម្នាក់ៗ ក្រណាត់ស១ដុំ និងថវិកា ៣ម៉ឺនរៀល៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
