ក្នុងឱកាសពិធីបុណ្យភ្ជុំបិណ្ឌនេះ ព្រះវិចិត្រវង្សា ហែម គឹមសាន្ត ព្រះគ្រូចៅអធិការវត្តប្រាសាទគោកចក បានអំពាវនាវដល់ពុទ្ធបរិស័ទទាំងអស់ ពិសេសយុវជន យុវនារី ដែលជាទំពាំងស្នងឬស្សី ត្រូវឃើញព្រះរស់នៅផ្ទះ មានឈ្មោះជាឱពុកម្ដាយជាមុនសិន មុននឹងនឹកឃើញព្រះនៅតាមវត្តអារាម ព្រោះឱពុកម្ដាយ ជាអ្នកមានគុណដ៏ធំធេងដែលយើងមិនអាចបំភ្លេចបាន ដែលបានលះបង់គ្រប់យ៉ាងដើម្បីយើង តាំងពីថ្ងៃដែលយើងចាប់កំណើតមក។
ព្រះវិចិត្រវង្សា ហែម គឹមសាន្ត មានថេរដីកាថា ការតបស្នងសងគុណឪពុកម្ដាយ គឺជារឿងសំខាន់បំផុតក្នុងជីវិតរបស់យើងទាំងអស់គ្នា ដូច្នេះមុននឹងទៅវត្តធ្វើបុណ្យ សូមធ្វើបុណ្យជាមួយព្រះរស់ក្នុងផ្ទះជាមុនសិន ទើបការធ្វើបុណ្យរបស់យើងនៅវត្តមានន័យ និងទទួលបានផលបុណ្យពេញលេញ។
ព្រះវិចិត្រវង្សា ហែម គឹមសាន្ត មានថេរដីកាបន្ថែមថា ពិធីបុណ្យកាន់បិណ្ឌ និងភ្ជុំបិណ្ឌ ជាបុណ្យប្រពៃណីព្រះពុទ្ធសាសនាខ្មែរដ៏សំខាន់។ ពិធីបុណ្យនេះ គឺជាការបង្កើនសាមគ្គីភាពរវាងបុគ្គល គ្រួសារ និងសង្គម បញ្ជាក់ឱ្យឃើញពីការសម្បូរហូរហៀរនៃភោគផលផ្សេងៗ របស់ប្រជាជនខ្មែរ ផ្គត់ផ្គង់ព្រះសង្ឃក្នុងព្រះវស្សាសម្តែងនូវភាពកតញ្ញូកតវេទី ដាស់តឿនស្មារតីដល់មនុស្សគ្រប់រូបកុំឱ្យមានសេចក្ដីប្រមាទក្នុងការធ្វើអំពើបាបនានា ឧទ្ទិសមហាកុសលជូនដល់វិញ្ញាណក្ខន្ធនៃបុព្វការីជន និងពពួកញាតិ សន្សំនូវមហាកុសលទុកជាទីពឹងរបស់ខ្លួន និងបន្តថែរក្សាបុណ្យប្រពៃណីព្រះពុទ្ធសាសនាខ្មែរយើង ឱ្យតាំងនៅស្ថិតស្ថេរអស់កាលជាយូរអង្វែង៕
ព័ត៌មានជាតិ ថ្មីៗ
អត្ថបទ និងរូបភាព៖ លោក មន្ត្រីមន្ទីរ
កែសម្រួល៖ លោក អ៊ុន ណារាជ្យ
