អង្គការសង្គមស៊ីវិលនៅក្នុងខេត្តសៀមរាប បានបង្ហាញការជឿជាក់យ៉ាងមុតមាំលើចំណាត់ការរបស់រាជរដ្ឋាភិបាលកម្ពុជា ក្នុងការការពារដែនអធិបតេយ្យ និងបូរណភាពទឹកដី ដោយក្នុងនោះ បណ្ដាអង្គការ សមាគម សហគមន៍ និងសហជីពបានចេញញត្តិគាំទ្រយ៉ាងពេញទំហឹង និងថ្កោលទោសចំពោះការឈ្លានពានរបស់កងទ័ពថៃមកលើទឹកដីកម្ពុជា។
ក្នុងវេទិកាសន្ទនាជាមួយអង្គការសង្គមស៊ីវិលក្នុងខេត្តសៀមរាប ដែលរៀបចំឡើងដោយវេទិកាសម្ព័ន្ធសង្គមស៊ីវិល ក្រោមប្រធានបទ «កិច្ចសហប្រតិបត្តិការក្នុងភាពជាដៃគូ ដើម្បីពង្រឹងសមត្ថភាពអង្គការសង្គមស៊ីវិលក្នុងបរិបទថ្មី» នៅខេត្តសៀមរាប នាថ្ងៃទី១៥ ខែកញ្ញា ឆ្នាំ២០២៥ ឯកឧត្តម កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល បានបញ្ជាក់ថា គោលបំណងសំខាន់នៃវេទិកានេះ គឺដើម្បីពង្រឹងកិច្ចសហប្រតិបត្តិការ និងការទំនាក់ទំនងប្រកបដោយភាពស្មោះត្រង់រវាងរាជរដ្ឋាភិបាល អាជ្ញាធរដែនដី និងអង្គការសង្គមស៊ីវិល ក្នុងការបម្រើផលប្រយោជន៍សង្គម។
ឯកឧត្តម កឹមរ័ត្ន វិសិដ្ឋ បានលើកទឹកចិត្តឱ្យអង្គការសង្គមស៊ីវិលបន្តចូលរួមអភិវឌ្ឍសង្គមជាតិ ស្របតាមគោលនយោបាយរបស់រាជរដ្ឋាភិបាល។ លោកបានជំរុញឱ្យអង្គការទាំងនេះគោរពច្បាប់ជាធរមាន ដើម្បីរក្សាសុខសន្តិភាព ស្ថិរភាព និងការអភិវឌ្ឍប្រកបដោយចីរភាព។ ជុំវិញបញ្ហាជម្លោះព្រំដែនកម្ពុជា-ថៃ ឯកឧត្តមបានអំពាវនាវដល់អង្គការសង្គមស៊ីវិលបន្តរក្សាសាមគ្គីភាព និងបង្កើនស្មារតីស្នេហាជាតិ ព្រមទាំងជឿជាក់លើការដោះស្រាយបញ្ហារបស់រាជរដ្ឋាភិបាលតាមរយៈយន្តការការទូត និងសន្តិវិធី។
លោក អ៉ឹង គឹមលាង អភិបាលរងខេត្តសៀមរាប បានថ្លែងថា ភាពជាដៃគូនឹងទទួលបានជោគជ័យ លុះត្រាតែភាគីទាំងអស់មានទំនាក់ទំនងល្អ មានការទុកចិត្តគ្នាទៅវិញទៅមក និងដោះស្រាយបញ្ហារួមគ្នាដោយភាពស្មោះត្រង់។ លោកបានបញ្ជាក់បន្ថែមថា រដ្ឋបាលខេត្តសៀមរាប បានរៀបចំវេទិកាពិគ្រោះយោបល់ជាប្រចាំ ដើម្បីដោះស្រាយរាល់សំណើ និងកង្វល់របស់អង្គការសង្គមស៊ីវិល ដែលធ្វើឱ្យសកម្មភាពរបស់ពួកគេប្រព្រឹត្តទៅបានយ៉ាងល្អប្រសើរដោយគ្មានការរឹតត្បិត។
សូមជម្រាបថា ក្នុងវេទិកានាពេលនេះដែរ អង្គការសង្គមស៊ីវិលបានបង្ហាញពីជំហររួមគ្នា ដោយបានចេញញត្តិគាំទ្រយ៉ាងពេញទំហឹងចំពោះការដឹកនាំរបស់សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចធិបតី ហ៊ុន ម៉ាណែត នាយករដ្ឋមន្ត្រី ក្នុងការការពារអធិបតេយ្យ និងបូរណភាពទឹកដី។ លើសពីនេះ អង្គការសង្គមស៊ីវិលបានថ្កោលទោសយ៉ាងដាច់អហង្ការចំពោះការឈ្លានពានរបស់កងទ័ពថៃ ដែលជាការរំលោភបំពានលើធម្មនុញ្ញអង្គការសហប្រជាជាតិ និងច្បាប់អន្តរជាតិ។ អង្គការសង្គមស៊ីវិល បានអំពាវនាវយ៉ាងទទូចដល់សហគមន៍អន្តរជាតិឱ្យជួយអន្តរាគមន៍ ដើម្បីជំរុញឱ្យរដ្ឋាភិបាល និងយោធាថៃគោរពបទឈប់បាញ់ រើបន្លាលួសចេញពីទឹកដីកម្ពុជា និងដោះលែងវីរកងទ័ពកម្ពុជាទាំង ១៨រូប ដែលត្រូវបានចាប់ខ្លួនដោយខុសច្បាប់កាលពីថ្ងៃទី២៩ ខែកក្កដា ឆ្នាំ២០២៥៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
