ក្នុងកិច្ចប្រជុំប្រចាំខែសីហា ឆ្នាំ២០២៥ នៅថ្ងៃទី១៥ ខែកញ្ញា ឆ្នាំ២០២៥ ដើម្បីពិនិត្យ និងពិភាក្សាលើការងារប្រឈមនានា អាជ្ញាធរខេត្តសៀមរាប បានណែនាំដល់គ្រប់ភាគីពាក់ព័ន្ធ ត្រូវជំរុញ និងពង្រឹងការងារបង្ការ ទប់ស្កាត់ និងបង្ក្រាបបទល្មើសជួញដូរមនុស្សគ្រប់ទម្រង់ ដើម្បីឱ្យការងារនេះកាន់តែមានប្រសិទ្ធភាព។
លោក ចឹក គឹមជុន នាយករងរដ្ឋបាលសាលាខេត្ត និងជាអនុប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត បានបញ្ជាក់ថា អង្គការដៃគូទាំងអស់ត្រូវមានកិច្ចសហការល្អជាមួយក្រុមការងារទាំង៦ និងអាជ្ញាធរមូលដ្ឋាន ដើម្បីបង្ការ ទប់ស្កាត់ បង្ក្រាប និងសង្គ្រោះជនរងគ្រោះឱ្យបានទាន់ពេលវេលា និងជាប្រព័ន្ធ។ ជាមួយគ្នានេះ សូមឱ្យសមាជិកទាំងអស់ត្រូវយកចិត្តទុកដាក់ពង្រឹងការងារបង្ការ និងទប់ស្កាត់តាមរយៈការផ្សព្វផ្សាយ និងអប់រំប្រជាពលរដ្ឋអំពីគ្រោះថ្នាក់នៃការជួញដូរមនុស្ស ជាពិសេសការធ្វើចំណាកស្រុកដោយគ្មានឯកសារ ឬតាមរយៈមេខ្យល់ខុសច្បាប់។
លោក ចឹក គឹមជុន បានជំរុញបន្ថែមដល់សមត្ថកិច្ចពាក់ព័ន្ធត្រូវបង្កើនការស្រាវជ្រាវ និងបង្ក្រាបបទល្មើសជួញដូរមនុស្សឱ្យបានទាន់ពេល កាត់ផ្តាច់បណ្តាញជួញដូរឱ្យបានដាច់ខាត ព្រមទាំងមានកិច្ចសហការជិតស្និទ្ធក្នុងការផ្តល់ការការពារ ដូចជាកន្លែងស្នាក់នៅបណ្ដោះអាសន្ន ការពិនិត្យសុខភាព ផ្តល់ប្រឹក្សាយោបល់ និងជួយសម្រួលដល់ការវិលត្រឡប់របស់ជនរងគ្រោះទៅកាន់គ្រួសារវិញ។ ជាមួយគ្នានេះ ដើម្បីលុបបំបាត់អំពើជួញដូរមនុស្សឱ្យបានទាំងស្រុង ការផ្សព្វផ្សាយត្រូវធ្វើឡើងឱ្យបានទូលំទូលាយគ្រប់រូបភាព និងគ្រប់ធនធាន ដើម្បីលើកកម្ពស់ការយល់ដឹងអំពីការជួញដូរមនុស្ស ការធ្វើអាជីវកម្មផ្លូវភេទ ការការពារកុមារពីការរំលោភបំពាន ការកេងប្រវ័ញ្ចកម្លាំងពលកម្ម និងបទល្មើសពាក់ព័ន្ធដទៃទៀត។
លោកបានសង្កត់ធ្ងន់ថា គោលដៅសំខាន់នៃការផ្សព្វផ្សាយនេះគឺទៅលើប្រជាពលរដ្ឋទូទៅ យុវវ័យក្នុងសាលារៀន និងក្រៅសាលារៀន ព្រមទាំងជនដែលងាយរងគ្រោះ ដើម្បីកុំឱ្យពួកគាត់ចាញ់បោក និងធ្លាក់ខ្លួនជាជនរងគ្រោះ។ លោកក៏បានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមត្ថកិច្ច មន្ទីរជំនាញ និងអាជ្ញាធរមូលដ្ឋានគ្រប់ជាន់ថ្នាក់ ដែលបានអនុវត្តសកម្មភាពការងារកន្លងមកយ៉ាងសកម្ម ក្នុងការបង្ការ ទប់ស្កាត់ និងបង្ក្រាបអំពើជួញដូរមនុស្ស ការធ្វើអាជីវកម្មផ្លូវភេទលើស្ត្រី និងកុមារ ក៏ដូចជាការអប់រំផ្សព្វផ្សាយដល់ប្រជាពលរដ្ឋនៅមូលដ្ឋាន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
