យុវសិស្សចំនួន ៨០រូប ស្រី៥១នាក់ ជាសិស្សានុសិស្សនៃវិទ្យាល័យហ៊ុនសែនស្វាយធំ និងវិទ្យាល័យហ៊ុនសែនប្រាសាទបាគង ខេត្តសៀមរាប ត្រូវបានបំពាក់កន្សែងជាយុវជនកាកបាទក្រហមកម្ពុជា កាលពីថ្ងៃទី១០ ខែកញ្ញា ឆ្នាំ២០២៥ បន្ទាប់ពីបានបញ្ចប់វគ្គបណ្ដុះបណ្ដាលមូលដ្ឋាន។
ឯកឧត្តម គុជ លីណា អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្ត មានប្រសាសន៍ថា វគ្គបណ្ដុះបណ្ដាលមូលដ្ឋាននេះ ជាការពង្រឹងធនធានមនុស្សសម្រាប់បម្រើការងារមនុស្សធម៌ និងការងារសង្គម។ ខ្លឹមសារនៃវគ្គសិក្សារួមមាន ប្រវត្តិចលនាកាកបាទក្រហម-អឌ្ឍចន្ទក្រហម, វិជ្ជាសង្គ្រោះបឋម, តួនាទី និងភារកិច្ចយុវជន, ការគ្រប់គ្រងក្លិបយុវជន និងប្រធានបទសំខាន់ៗដូចជាសុវត្ថិភាពចរាចរណ៍ និងបរិយាបន្ន។
ឯកឧត្តម គុជ លីណា មានប្រសាសន៍ទៀតថា ការបំពាក់កន្សែងជូនយុវជនថ្មីនេះ គឺជាការយកចិត្តទុកដាក់របស់សាខាកាកបាទក្រហមកម្ពុជាខេត្ត ក្នុងការកសាងអ្នកបន្តវេនសម្រាប់សមាគមជាតិកាកបាទក្រហមកម្ពុជា ដែលជាស្ថាប័នមនុស្សធម៌ដ៏ធំជាងគេបង្អស់នៅកម្ពុជា និងជាជំនួយការរបស់អាជ្ញាធរសាធារណៈ។
ឯកឧត្តម ក៏បានណែនាំដល់យុវជនទាំងអស់ ត្រូវធ្វើខ្លួនជាតំណាងយុវជនដ៏ល្អក្នុងសង្គម គោរពវិន័យសាលា និងក្លាយជាអ្នកបន្តវេនក្នុងសកម្មភាពមនុស្សធម៌ ចូលរួមផ្សព្វផ្សាយបំផុសគោលការណ៍គ្រឹះទាំង៧ នៃចលនាកាកបាទក្រហម និងសកម្មភាពមនុស្សធម៌។ ក្នុងនោះសូមឱ្យប្អូនៗ ត្រូវប្រកាន់ភ្ជាប់នូវវប្បធម៌មិត្តអប់រំមិត្ត មិត្តជួយមិត្ត និងលើកទឹកចិត្តដល់យុវសិស្សពិការ គោរពច្បាប់ចរាចរណ៍ ចៀសឆ្ងាយពីគ្រឿងញៀន ជាពិសេសអនុវត្តទិសស្លោករបស់កាកបាទក្រហមកម្ពុជា គឺធ្វើឱ្យបានកាន់តែច្រើន ធ្វើឱ្យបានកាន់តែល្អ ធ្វើឱ្យបានកាន់តែជ្រៅ និងទៅឱ្យបានកាន់តែឆ្ងាយជាងមុន៕
ប្រភព៖ សាខាកាកបាទក្រហមកម្ពុជាខេត្ត
កែសម្រួល៖ លោក អ៊ុន ណារាជ្យ
