លោក ព្រៅ ខេមរិទ្ធ ប្រធានសាខាកាំកុងត្រូលសៀមរាប បានមានប្រសាសន៍ថា ក្នុងឱកាសចុះពិនិត្យមើលម្ហូបអាហារនៅផ្សារចាស់ ស្ថិតក្នុងសង្កាត់ស្វាយដង្គំ ក្រុងសៀមរាប កាលពីព្រឹកថ្ងៃទី១៦ ខែសីហា ឆ្នាំ២០១៨នេះ ក្រោមកិច្ចសហការជាមួយមន្ទីរពាណិជ្ជកម្មខេត្ត អាជ្ញាធរដែនដី និងគណៈគ្រប់គ្រងផ្សារ ដើម្បីស្វែងរកនូវសារធាតុបូរ៉ាក់ និងសារធាតុគីមីទាំងឡាយដែលគេបានដាក់សម្រាប់ការពារទៅលើម្ហូបអាហារផ្សេងៗ ដែលជាហេតុធ្វើឲ្យប៉ះពាល់យ៉ាងខ្លាំងដល់សុខភាពនោះ មន្ត្រីជំនាញកាំកុងត្រូលសាខាខេត្តសៀមរាប បាននាំឡានមន្ទីរពិសោធន៍ចុះមកដល់ខេត្តសៀមរាបផ្ទាល់តែម្តង គឺស្ថិតនៅត្រង់ចំណុចផ្សារចាស់ ដែលមន្ត្រីជំនាញ់របស់យើងបានធ្វើការត្រួតពិនិត្យ និងធ្វើTested ទៅលើម្ហូបអាហារគំរូ មានចំនួន ៦៥មុខ ក្នុងនោះមានស្ពៃក្តោបមួយមុខ ដែលគេបានដាក់នូវសារធាតុកាកសំណល់ថ្នាំកសិកម្មមួយប្រភេទដែលហៅថា ជាប្រភេទកាកសំណល់ថ្នាំកសិកម្មត្រូវបាននាំចូលមកពីប្រទេសវៀតណាម ហើយមន្ត្រីកាំកុងត្រូល បានធ្វើការដកហូតចំនួនជាង១គីឡូក្រាម ដើម្បីយកទៅកំទេចចោល ។
លោក ព្រៅ ខេមរិទ្ធ បានបញ្ជាក់ទៀតថា បច្ចុប្បន្ននេះ ប្រជាពលរដ្ឋនិងអាជីវករយើង មានការយល់ដឹងច្រើនជាងមុនៗ ដោយសារមានការយកចិត្តទុកដាក់ពីមន្ត្រីជំនាញកាំកុងត្រូល បានធ្វើការណែនាំជារឿយៗពីបញ្ហាលើម្ហូបអាហារប្រចាំថ្ងៃរបស់ពួកគាត់នោះ ប៉ុន្តែទោះជាយ៉ាងនេះក្ដី ក៏សុំសំណូមពរដល់ម្ចាស់អាជីវកម្ម និងអាជីវករទាំងអស់ សូមកុំប្រើប្រាស់នូវសារធាតុគីមីឲ្យសោះ ពីព្រោះវាបានធ្វើឲ្យប៉ះពាលដល់សុខភាព និងផលប្រយោជន៏របស់ខ្លួនយើង ក៏ដូចជាបងប្អូនប្រជាពលរដ្ឋទូទៅផងដែរ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#កាំកុងត្រូលខេត្តសៀមរាប
