ការប្រឡងមធ្យមសិក្សាទុតិយភូមិឆ្នាំសិក្សា២០១៧/២០១៨នៅខេត្តសៀមរាប មានបេក្ខភាពសិស្សចូលប្រឡងសរុប ចំនួន ៧ពាន់៨៣០នាក់ កើនឡើងលើសឆ្នាំមុនចំនួន៧១៧នាក់ ក្នុងនោះស្រី ៤ពាន់៣៨៣នាក់។
នៅព្រឹកថ្ងៃចន្ទ ទី២០ ខែសីហា ឆ្នាំ២០១៨នេះ ថ្នាក់ដឹកនាំ និងមន្ត្រី នៃរដ្ឋបាលខេត្តសៀមរាប បានអញ្ជើញជាអធិបតីកាត់វិញ្ញាសារប្រឡងមធ្យមសិក្សាទុតិយភូមិ ឆ្នាំសិក្សា២០១៧/២០១៨ និងលើកទឹកចិត្តដល់បេក្ខជនប្រឡងមធ្យមសិក្សាទុតិយភូមិឆ្នាំនេះទាំងអស់ ប្រឹងប្រែងឱ្យអស់ពីសមត្ថភាពនិងត្រូវគោរពតាមវិន័យលក្ខណ្ឌ័កំណត់ ជាពិសេសក្នុងការធ្វើដំណើរ មកប្រឡងត្រូវរក្សាសុវត្ថិភាព និងប្រុងប្រយត្ន័ក្នុងការបើកបរយានយន្ត ឱ្យបានខ្ជាប់ខ្ជួន។
លោក លី សំរិទ្ឋ អភិបាលខេត្តសៀមរាបស្ដីទី បានមានប្រសាសន៍កោតសរសើរដល់ការរៀបចំរបស់មន្ទីរអប់រំយុវជននិងកីឡាខេត្តសៀមរាប ជាពិសេសកម្មវិធីកំណែទម្រង់ លើវិស័យអប់រំរបស់ក្រសួងអប់រំយុវជននិងកីឡា ក្នុងប៉ុន្មានឆ្នាំចុងក្រោយនេះ ថាជាបរិបទមួយដែលអាចឱ្យសិស្សទទួលបាននូវចំណេះដឹង ពេញលេញដែលអាចក្លាយទៅជាធនធានមនុស្សដ៍រឹងមាំសម្រាប់សង្គមជាតិក្នុងពេលអនាគត។
ឯកឧត្តម ពិត ចំណាន រដ្ឋលេខាធិការក្រសួងអប់រំយុវជននិងកីឡា ក៍បានណែនាំ និងផ្តាំផ្ញើ ដល់លោកគ្រូអ្នកគ្រូ ជាអនុរក្ស និងមេប្រយាគ ព្រមទាំងក្មួយៗសិស្សានុសិស្សទាំងពីរភេទ ត្រូវយកចិត្តទុកដាក់អនុវត្តវិន័យ ក្នុងពេលប្រឡងឱ្យបានត្រឹមត្រូវ។ ការប្រឡងនេះ គឺជាការវាស់ស្ទង់នូវរាល់កម្រិតនៃចំណេះដឹងរបស់ក្មួយៗ ដែលបានខិតខំប្រឹងប្រែងសិក្សារៀនសូត្រអស់រយៈពេល១២ឆ្នាំ ។
ឯកឧត្តម បានគូសបញ្ជាក់ថា វិញ្ញាសារប្រឡង ដែលបេក្ខជនប្រឡងនាពេលនេះ ក្រសួងបានការពារ និងត្រូតពិនិត្យយ៉ាងតឹងរឹង មិនមានបែកធ្លាយ ឬបញ្ហាអ្វីចេញទៅក្រៅឡើយ ដូច្នេះសូមបេក្ខជនប្រឡងដោយសមត្ថភាព និងស្មារតីប្រុងប្រយ័ត្ន ទន្ទឹមគ្នានោះ ឯកឧត្តម ក៏បានរំលឹកដល់អនុរក្ស គណៈកម្មការ និងសមត្ថកិច្ចទាំងអស់ ត្រូវអនុវត្តដោយប្រកាន់ ខ្ជាប់ នូវតួនាទីភារកិច្ចចៀសវាងបញ្ហាផ្សេងៗកើតឡើង. ព្រមទាំងសង្ឃឹមថា អ្នកចេះគឺជាប់ ហើយលោកចង់ឱ្យបេក្ខជនទាំងអស់ ជាប់ទាំងអស់គ្នា មិនថាទទួលបាននិទ្ទេសល្អ ឬមិនល្អនោះទេ។
យោងតាមរបាយការណ៍របស់លោក សយ ទិត្យាវង្ស ប្រធានមន្ទីរអប់រំយុវជន និង កីឡាខេត្តសៀមរាប បានឲ្យដឹងថា៖ការប្រឡងសញ្ញាប័ត្រមធ្យមសិក្សាទុតិយភូមិ ឆ្នាំសិក្សា២០១៧/២០១៨នេះ ខេត្តសៀមរាបមានមណ្ឌលប្រឡង ចំនួន១២មណ្ឌល មានបន្ទប់ប្រឡងចំនួន ៣១៩បន្ទប់ ក្នុងនោះផ្នែកវិទ្យាសាស្ត្រ មានចំនួន ៦មណ្ឌលស្មើ១៤២បន្ទប់ ផ្នែក វិទ្យាសាស្ត្រសង្គម ៦មណ្ឌល ស្មើ១៧៧ បន្ទប់ និងមានបេក្ខជនមានសិទ្ធចូលប្រឡងចំនួន ៧ពាន់៨៣០នាក់ ។
សូមបញ្ជាក់ថា ដោយមានការយកចិត្តទុកដាក់ខ្ពស់លើវិស័យអប់រំក្នុងខេត្តសៀមរាប ថ្នាក់ដឹកនាំខេត្តសៀមរាប បានអញ្ជើញចូលរួមជាគណៈអធិបតីនៅមណ្ឌលចំនួន៦ ក្នុងខេត្តសៀមរាបរួមមាន៖
១ លោក លី សំរិទ្ធ អភិបាលខេត្តស្ដីទី អញ្ជើញកាត់វិញ្ញាសារ នៅមណ្ឌល វិទ្យាល័យ ១០ មករា ១៩៧៩
២ លោក ពៅ ពិសិដ្ឋ អភិបាលរងខេត្ត អញ្ជើញកាត់វិញ្ញាសារ នៅមណ្ឌល វិទ្យាល័យ សម្ដេចឪ
៣ លោកស្រី យូ សុភា អភិបាលរងខេត្ត អញ្ជើញកាត់វិញ្ញាសារ នៅមណ្ឌល វិទ្យាល័យ អង្គរ
៤ លោក ពិន ប្រាកដ អភិបាលរងខេត្ត អញ្ជើញកាត់វិញ្ញាសារ នៅមណ្ឌល គរុកោសល្យ និងវិក្រឹត្តការខេត្ត
៥ លោក ទៀ សីហា អភិបាលរងខេត្ត អញ្ជើញកាត់វិញ្ញាសារ នៅមណ្ឌល វិទ្យាល័យ ១០ មករា ១៩៧៩
៦ លោក ង៉ាន់ ភិរុណ អភិបាលរងខេត្ត អញ្ជើញកាត់វិញ្ញាសារ នៅមណ្ឌល វិទ្យាល័យ ហ៊ុន សែន សៀមរាប
ដោយឡែកមណ្ឌលចំនួន ៦ដទៃទៀត ក៏មានការរួមពីមន្ត្រីនៃរដ្ឋបាលខេត្តសៀមរាបផងដែរ។
អត្ថបទ និង រូបថត ៖ លោក យូ វង្ស លោក អ៊ិន សីហរិទ្ធ និងលោក ស៊ាន សុផាត
កែសម្រួលអត្ថបទ ៖ លោក សេង ផល្លី
