សន្និសីទ អាស៊ាន ចិន រួមជាមួយUNDP លើកទី៣ ផ្តោតលើគោលដៅអភិវឌ្ឍន៍ដោយចីរភាព នៅថ្នាក់មូលដ្ឋាន
ក្រុមមន្ត្រីនៃប្រទេសក្នុងតំបន់អាស៊ាន និងប្រទេសចិន រួមជាមួយអង្គការ UNDP បានជួបប្រជុំគ្នា រយៈពេល ២ ថ្ងៃ
ដើម្បីពិភាក្សាអំពីការបញ្ជ្រាបដល់ថ្នាក់មូលដ្ឋាន អំពីគោលដៅអភិវឌ្ឍបន៍ប្រកបដោយចីរភាព ហៅកាត់ថា SDGs និងការសម្រេចបាននូវការលុបបំបាត់ភាពក្រីក្រ។
នៅព្រឹកថ្ងៃទី ២១ ខែសីហា ឆ្នាំ២០១៨នេះ នាក្រុងសៀមរាប បានរៀបចំសន្និសីទលើកទី៣ រវាងអាស៊ាន និងចិន រួមជាមួយUNDP ស្តីអំពីការបញ្ជ្រាបដល់ថ្នាក់មូលដ្ឋាន និងការលុបបំបាត់ភាពក្រីក្រ នាឱកាសនេះដែរ មានវត្តមានចូលរួមពីសំណាក់ឯកឧត្តម កាន់ ផារិទ្ធ អនុរដ្ឋលេខាធិការក្រសួងការបរទេស និង សហប្រតិបត្តិការអន្តរជាតិ ឯកឧត្តម វង្ស ថេប អគ្គលេខាធិការរងអាស៊ាន សម្រាប់សហគមន៍សង្គម វប្បធម៌អាស៊ាន ឯកឧត្តម ហួង ស៊ីលៀន (Huang Xilian) ឯកអគ្គរដ្ឋទូត សាធារណរដ្ឋប្រជាមានិតចិន ប្រចាំអាស៊ាន និង ឯកឧត្តម ហាវលាង ស៊ូ (Haoliang Xu) ឧបការីអគ្គលេខាធិការអង្គការសហប្រជាជាតិ និងជានាយកអង្គការ UNDP ប្រចាំតំបន់អាស៊ីប៉ាស៊ីហ្វិក ព្រមទាំងឯកឧត្តម លោកជំទាវ អស់លោក លោកស្រីជាគណៈអភិបាលខេត្ត ថ្នាក់ដឹកនាំមន្ទីរ និង តំណាងប្រទេសជាសមាជិកអាស៊ាន រួមនឹងអង្គការអន្តរជាតិផងដែរ ។
ឯកឧត្តម វង្ស ថេប អគ្គលេខាធិការរងអាស៊ាន បានបញ្ជាក់ថា សន្និសីទនេះជាលើកទីបីហើយ ដែលរៀបចំឡើង ដើមី្បអនុវត្តគំនិតផ្តួចផ្តើមជាច្រើនរបស់អាស៊ាន ក្នុងការលើកកម្ពស់ការអនុវត្ត SDGs និង យោងតាមបរិបទក្នុងតំបន់ ដើមី្បសម្រេចបាននូវការលុបបំបាត់ភាពក្រីក្រ។
ឯកឧត្តមបន្តទៀតថា អាស៊ានបានរួមបញ្ចូលសន្និសីទ ស្តីពី មិនទុកនរណាម្នាក់ចោល និង ការស្រាវជ្រាវអាស៊ាន ចិន UNDP និង សន្និសីទស្តីពី ហិរញ្ញប្បទាននៃការអនុវត្ត SDGs នៅក្នុងអាស៊ាន ដែលសកម្មភាពទាំងពីរនេះ ត្រូវបាន ធ្វើឡើងដោយសហការជាមួយចិន និង UNDP ។
ឯកឧត្តម កាន់ ផារិទ្ធ ក៏បានគូសបញ្ជាក់ថា សន្និសីទរយៈពេលពីរថ្ងៃនេះ មានគោលបំណង ជម្រុញការ អនុវត្តគោលដៅ និង វិធីសាស្ត្រទូលំទូលាយរបស់ SDGs ដើមី្បបញ្ជ្រាប SDGs នៅកម្រិតថ្នាក់តំបន់ និង ថ្នាក់ក្រោមជាតិ ក្នុងបរិបទនៃការបំពេញបន្ថែម រវាងទស្សនវិស័យសហគមន៍អាស៊ាន ឆ្នាំ២០២៥ និង SDGs។
ឯកឧត្តម បន្តទៀតថា សន្និសីទនេះ បានរួមបញ្ចូលការពិភាក្សាតុមូល និង ការពិភាក្សាជាក្រុមជាមួយប្រជាជនក្នុងតំបន់ ដែលហៅថា ការពិភាក្សាក្រោមព្រះអាទិត្យ ក្រោមដើមឈើ ដែលសហគមន៍មូលដ្ឋាននឹងជួបទល់មុខគ្នា រវាងអ្នកចូលរួមសន្និសីទ ដើមី្បបង្ហាញមតិយោបល់ទៅដល់អ្នករៀបចំគោលនយោបាយ។ ចំពោះការពិភាក្សាជាក្រុម ជាមួយប្រជាពលរដ្ឋ បានផ្តោតទៅលើការបញ្ជ្រាបយេនឌ័រ ការកាត់បន្ថយហានិភ័យគ្រោះមហន្តរាយ ជីវភាពរស់នៅ ប្រកបដោយចីរភាពសម្រាប់កសិករ និង សហគ្រិន ព្រមទាំងការកសាងសមត្ថភាពរបស់មន្ត្រីមូលដ្ឋាន ។
ឯកឧត្តមក៏បានលើកឡើងផងដែរ ពីការបញ្ជ្រាបដល់ថ្នាក់មូលដ្ឋាន អំពីគោលដៅអភិវឌ្ឍន៍ប្រកបដោយចីរភាព ដោយត្រូវបានកំណត់ លើការពង្រឹងបរិស្ថាន សម្រាប់ការផ្សារភ្ជាប់ គោលនយោបាយជិតសិ្នទ្ធក្នុងសហគមន៍ និង កម្រិតថ្នាក់ជាតិ រួមទាំងការបញ្ចូលគោលដៅអភិវឌ្ឍន៍ប្រកបដោយចីរភាព នៅក្នុងចំណុចអាទិភាពពាក់ព័ន្ធ សមស្រប នឹងទទួលបាននៅក្នុងសហគមន៍ ការពង្រឹងភាពជាដៃគូរសម្រាប់កិច្ចសហប្រតិបត្តិការ ហិរញ្ញប្បទាន និង ការអនុវត្តគំនិតផ្តួចផ្តើមនានា ពាក់ព័ន្ធនឹងគោលដៅអភិវឌ្ឍន៍ប្រកបដោយចីរភាព ។
ឯកឧត្តម បានបន្តទៀតថា សន្និសីទនេះ នឹងធ្វើការប្រមូលផ្តុំមន្ត្រីរដ្ឋាភិបាលជាន់ខ្ពស់ ទទួលបន្ទុកអនុវត្ត SDGs អ្នកជំនាញពី អង្គការអន្តរជាតិ ដៃគូរអភិវឌ្ឍន៍ អង្គការមិនមែនរដ្ឋាភិបាល អង្គការសង្គមស៊ីវិល និង វិស័យឯកជន ពីប្រទេសជា សមាជិកអាស៊ានទាំង១០ ចិន និង UNDP ។ ក្នុងនោះក៏មានធ្វើការចែករំលែកនូវការអនុវត្តល្អៗ លើទិដ្ឋភាពជាក់លាក់ពីតួនាទី នៃកិច្ចសហប្រតិបត្តិការអនុតំបន់ ក្នុងការកំណត់ទីតាំង SDGs និង លុបបំបាត់ភាពក្រីក្រ ដូចជាគោលនយោបាយជាតិ ការរៀបចំស្ថាប័ន ការចូលរួមពីភាគីពាក់ព័ន្ធ សម្រាប់ការអភិវឌ្ឍន៍ប្រកបដោយចីរភាព ការចូលរួមរបស់វិស័យឯកជន ការផ្តល់ហិរញ្ញប្បទាន SDGs និង ទីក្រុងឆ្លាត ព្រមទាំងការច្នៃប្រឌិតថ្មី នៅកម្រិតមូលដ្ឋាន។
ឯកឧត្តម កាន់ ផារិទ្ធ បានបញ្ជាក់បន្ថែមថា កម្ពុជាបានសម្រេចគោលដៅអភិវឌ្ឍន៍ សហស្សវត្សរ៍ នៃការកាត់បន្ថយភាពក្រីក្របានពាក់កណ្តាល នៅឆ្នាំ២០០៩។ នៅឆ្នាំ២០០៧ កម្ពុជាសម្រេចបាន កំណើនសេដ្ឋកិច្ចប្រចាំឆ្នាំ ៧% ក្នុងឆ្នាំ២០១៣ ផលិតផលសរុបក្នុងស្រុក កើនឡើងដល់១ពាន់៤២ដុល្លាអាមេរិក ក្នុងឆ្នាំ២០១៧ កើនដល់ ១ពាន់៤៣៥ដុល្លា នៅឆ្នាំ២០១៨នេះ កម្ពុជានឹងរំពឹងថា កំណើននេះនឹងកើនឡើងដល់ ១ពាន់៥៦០ ដុល្លា នេះជាការអនុវត្តយុទ្ធសាស្ត្រចតុកោណយ៉ាងមុតមាំ ដែលបានបង្កើតបរិយាកាសអំណោយផល និង លក្ខខណ្ឌចាំបាច់ សម្រាប់ប្រទេសកម្ពុជា ក្នុងការឆ្ពោះទៅមុខប្រកបដោយទំនុកចិត្តលើទស្សនៈ នៃប្រទេសដែល មានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
