ប្រធានគណៈកម្មាធិការប្រតិបត្តិ នៃគណៈកម្មាធិការជាតិគ្រប់គ្រងគ្រោះមហន្តរាយ សម្ដែងនូវការកោតសរសើរចំពោះអាជ្ញាធរខេត្តសៀមរាប ដែលធ្វើការដោះស្រាយ បានទាន់ពេលវេលា ចំពោះជនរងគ្រោះ ដោយគ្រោះធម្មជាតិ។
មានប្រសាសន៍ក្នុងកិច្ចប្រជុំត្រួតពិនិត្យការងារគ្រោះមហន្តរាយ៧ខែដើមឆ្នាំ និងទិសដៅបន្តនៅខេត្តសៀមរាប នៅសាលប្រជុំរដ្ឋបាលខេត្តសៀមរាប កាលព្រឹកថ្ងៃទី២២ ខែសីហា ឆ្នាំ២០១៨នេះ ឯកឧត្ដមបណ្ឌិតទេសរដ្ឋមន្រ្តី ញឹម វណ្ណដា អនុប្រធានទី១ ទទួលបន្ទុកអនុប្រធានប្រចាំការ និងជាប្រធានគណៈកម្មាធិការប្រតិបត្តិ នៃគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងនូវអំណរគុណ និងវាយតម្លៃខ្ពស់ចំពោះថ្នាក់ដឹកនាំគណៈកម្មាធិការគ្រប់គ្រងគ្រោះមហន្តរាយខេត្តសៀមរាប ដែលបានសហការយ៉ាងជិតស្និទ្ធជាមួយសាខាកាកបាទក្រហមកម្ពុជាខេត្តសៀមរាប ចូលរួមគ្នាធ្វើការដោះស្រាយរួចរាល់ការងារទាំងអស់នេះ ដោយមិនបាច់រងចាំថ្នាក់ជាតិចុះមកជួយឡើយ ប៉ុន្តែប្រការសំខាន់នោះគឺ ពិតមែនខេត្តសៀមរាប ជាខេត្តមួយដែលមិនទទួលរងនូវគ្រោះមហន្តរាយដោយធម្មជាតិ លើបញ្ហាទឹកជំនន់ធ្ងន់ធ្ងរក៏ពិតមែន ប៉ុន្តែក៏ធ្លាប់ទទួលរងគ្រោះដោយធម្មជាតិផ្សេងទៀតដែរ ។
ឯកឧត្ដមឧបណ្ឌិតទេសរដ្ឋមន្រ្តី ញឹម វណ្ណដា មានប្រសាសន៍ទៀតថា ដូច្នេះតាមរយៈនេះ សូមឲ្យបណ្តាមន្ទីរ ស្ថាប័ន អង្គភាព អាជ្ញាធរគ្រប់លំដាប់ថ្នាក់ និង អង្គការជាតិ អន្តរជាតិដែលជាដៃគូទាំងអស់ គប្បីយកចិត្តទុកដាក់ចូលរួមឲ្យបានសកម្មបន្តទៀត ក្នុងការបំពេញកាតព្វកិច្ចការងារគ្រប់គ្រងគ្រោះមហន្តរាយ តាមរយៈការកាត់បន្ថយហានីភ័យ នៃគ្រោះមហន្តរាយទាំងនេះ ឲ្យថយចុះក្នុងកម្រិតអប្បបរមារ ទោះបីគ្រោះមហន្តរាយបង្កឡើងដោយមនុស្សក្តី ឬ ធម្មជាតិក្តី យើងត្រូវចាត់ទុកការងារគ្រប់គ្រងគ្រោះមហន្តរាយ ជាការងារយើងទាំងអស់គ្នា ក្នុងការសំដៅកាត់បន្ថយហានីភ័យ តាមរយៈការត្រៀមបង្ការ ដោយផ្សាភ្ជាប់នឹងសកម្មភាព ដែលពាក់ព័ន្ធលើគ្រប់ទិដ្ឋភាព និង ផែនការ ឆ្លើយតបទៅនឹងផលប៉ះពាល់នៃគ្រោះមហន្តរាយ និង ត្រូវគិតគូដល់ការអភិវឌ្ឍន៍ដែលមាននិរន្តរភាព ការពង្រឹងសមត្ថភាព ទាំងផ្នែករូបវន្ត័ និងអរូបវ័ន្ត ការអភិវឌ្ឍន៍ធនធានមនុស្ស ការគោរពច្បាប់ ការស្រឡាញ់ ចេះយោគយល់ អធ្យាស្រ័យ និង ជួយចែករំលែកគ្នាដល់អ្នករងគ្រោះផងដែរ ។
អត្ថបទ និង រូបថត ៖ លោក អ៊ិន សីហរិទ្ធ និង លោក យូ វង្ស
កែសម្រួលអត្ថបទ ៖ លោក លីវ សាន្ត
