រយៈពេល០៧ខែ ក្នុងឆ្នាំ២០១៨នេះ ខេត្តសៀមរាបពុំទាន់មានគ្រោះមហន្តរាយជំនន់ទឹកភ្លៀងកើតឡើង ដូចតាមបណ្តាខេត្តមួយចំនួននោះទេ ប៉ុន្តែខេត្តនេះ បានទទួលរងគ្រោះពីគ្រោះមហន្តរាយ និងឥទ្ធិពលពីគ្រោះធម្មជាតិដទៃដូចជា ខ្យល់កន្ទ្រាក់, ឆ្លងអគ្គិសនី, អគ្គីភ័យ, លង់ទឹក, និង រន្ទះបាញ់ជាដើម នេះបើតាមការលើកឡើងរបស់លោក ពិន ប្រាកដ អភិបាលរងខេត្តសៀមរាប។
នាព្រឹកថ្ងៃទី២២ ខែ សីហា ឆ្នាំ២០១៨ ក្នុងកិច្ចប្រជុំ ត្រួតពិនិត្យការងារគ្រោះមហន្តរាយ៧ខែដើមឆ្នាំ និងទិសដៅបន្តនៅខេត្តសៀមរាប លោកពិន ប្រាកដ បានបង្ហាញរបាយការណ៍ ដល់ប្រធានគណៈកម្មាធិការប្រតិបត្តិ គណៈកម្មាធិការជាតិគ្រប់គ្រងគ្រោះមហន្តរាយថា នៅក្នុងរយៈពេល ៧ខែកន្លងមកនេះ
ខ្យល់កន្រ្តាក់ បានបង្កឲ្យរលំផ្ទះប្រជាពលរដ្ឋចំនួន៤៧ខ្នង របើកដំបូល៩២ខ្នង ដំបូលសាលាឃុំ០១ ដំបូលសាលារៀន០៣ខ្នង របើកជញ្ជាំងផ្ទះ០១ខ្នង រលំតូបលក់ឥវ៉ាន់០៣តូប រលំរោងសិប្បកម្ម០១ខ្នង ខូចម៉ូតូ០៩គ្រឿង ដើមឈើដួលសង្កត់ផ្ទះ០១ខ្នង និងរបួសមនុស្ស០៣នាក់ ក្នុងនោះស្រី០២នាក់ ឆ្លងចរន្តអគ្គិសនីឆក់មនុស្សស្លាប់០១នាក់ , ឆេះផ្ទះចំនួន១៥ខ្នង , រន្ទះបាញ់បណ្ដាលឲ្យស្លាប់មនុស្ស០៤នាក់ របួស០២នាក់ សត្វគោងាប់ចំនួន២២ក្បាល ក្របី០១ក្បាល លង់ទឹកស្លាប់ចំនួន០៤នាក់ ក្នុងនោះកុមារចំនួន០៣នាក់៕
ព័ត៌មានជាតិ ថ្មីៗ
សូមរំលឹកថា កាលពីថ្ងៃទី៣ ខែតុលា ឆ្នាំ២០១៧ ក្រុងសៀមរាប បានទទួលរងនូវផលប៉ះពាល់ដោយសារជំនន់ទឹកភ្លៀង ដើម្បីទប់ស្កាត់ការខូចខាតធ្ងន់ធ្ងរ នូវហេដ្ឋារចនាសម្ព័ន្ធក្នុងក្រុងសៀមរាប លោក ពិន ប្រាកដ បានដឹកនាំក្រុមការងារមន្ទីរធនធានទឹក និងឧតុនិយមខេត្ត មន្ទីរសាធារណការ និងដឹកជញ្ជូនខេត្ត និងអ្នកពាក់ព័ន្ធ ចុះស្តារប្រព័ន្ធ រំដោះទឹកនៅស្រុកប្រាសាទបាគង ផ្លូវ៦០ម៉ែត្រ និងមួយចំណុចសំខាន់ៗដទៃទៀត។
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
