បណ្ដាញខ្សែលើអាកាសផ្សេងៗដែលបណ្តាក្រុមហ៊ុនមួយចំនួនបំពាក់លើបង្គោលបណ្តាញអគ្គីសនីនៅក្នុងក្រុងសៀមរាបត្រូវបានក្រុមការងារចម្រុះនៃរដ្ឋបាលខេត្តសៀមរាបកាត់ទម្លាក់ចុះហើយក្នុងគោលបំណងរៀបចំសោភណ្ឌភាពក្រុងឡើងវិញ។
បណ្តាញខ្សែលើអាកាសរួមានខ្សែអគ្គិសនី ខ្សែអ៊ិនធើណិត ខ្សែទូរស័ព្ទ ខ្សែកាប និងខ្សែដទៃផ្សេងទៀត ដែលមានភាពរញ៉េរញ៉ៃ នៅលើបង្គោលអគ្គីសនីនានា បានបង្កឲ្យបាត់បង់សោភណ្ឌភាព ទីក្រុងទេសចរណ៍សៀមរាប-អង្គរ និងជាមូលហេតុបង្កើតហានិភ័យផ្សេងៗ។ ក្នុងប្រតិបត្តិការទ្រង់ទ្រាយធំ របស់ក្រុមការងារចម្រុះពាក់ព័ន្ធ បានធ្វើការកាត់ទម្លាក់ បោសសំអាត និងរៀបចំឲ្យមានសណ្តាប់ធ្នាប់នូវបណ្ដាញខ្សែទាំងនោះ ឲ្យមានល្អប្រសើរឡើងវិញ។ ប្រតិបត្តិការនេះ ត្រូវបានចាប់ផ្តើមអនុវត្តថ្ងៃដំបូង នាព្រឹកថ្ងៃទី១៦ ខែសីហា ឆ្នាំ២០១៨នេះ បន្ទាប់ពីរដ្ឋបាលខេត្តសៀមរាប បានចេញសេចក្តីជូនដំណឹង ចុះថ្ងៃទី១១ ខែឧសភា ឆ្នាំ២០១៨ ស្តីពីការរៀបចំសោភណ្ឌភាព សណ្តាប់ធ្នាប់ និងរបៀបរៀបរយសាធារណៈ បណ្តាញខ្សែលើអាកាសក្នុងក្រុងសៀមរាប ។
លោក ពិន ប្រាកដ អភិបាលរងខេត្តសៀមរាប បានបង្ហាញក្នុងបទសម្ភាសន៍ យ៉ាងដូច្នេះថា ៖
(បទសម្ភាសន៍ជាមួយ លោក ពិន ប្រាកដ ក្នុងវឹដេអូខាងលើ)
តាមការឲ្យដឹងរបស់ លោក ពិន ប្រាកដ បានបញ្ជាក់ថា ៖ ចំណុចចាប់ផ្តើមថ្ងៃដំបូងនេះ គឺត្រូវបានអនុវត្តការកាត់ផ្តាច់បោសសំអាតខ្សែលើអាកាសតាមដងផ្លូវលោកតាណឺយ ចាប់ពីចំណុចផ្លូវជាតិលេខ៦ ដល់ផ្លូវកែង ៧ មករា ។
លោកបន្តឲ្យដឹងថា គោលដៅសំខាន់ៗដែលត្រូវអនុវត្តនោះ គឺនៅតាមដងផ្លូវក្នុងក្រុងសៀមរាប សរុបទាំងអស់ ១១ ខ្សែ។
លោកបញ្ជាក់ដែរថា រយៈពេលនៃប្រតិបត្តិការនេះ មិនបានកំណត់ច្បាស់លាស់នោះទេ តែសំខាន់ប្រតិបត្តិការនេះត្រូវបានប្រព្រឹត្តិទៅប្រកបដោយភាពរលូន មានការគាំទ្រពីប្រជាពលរដ្ឋ និងការចូលរួមសហការពីក្រុមហ៊ុនពាក់ព័ន្ធ ដើម្បីឆ្ពោះទៅរកគោលដៅនៃទីក្រុងស្អាត បញ្ជៀសបានហានីភ័យផ្សេងៗ ។
ព័ត៌មានជាតិ ថ្មីៗ
ប្រជាពលរដ្ឋ និង តំណាងក្រុមហ៊ុនមួយ ក្នុងចំណោមក្រុមហ៊ុនផ្សេងៗទៀតដែលពាក់ព័ន្ធ មានចំណាប់អារម្មណ៍ យ៉ាងដូច្នេះថា ៖ មតិប្រជាពលរដ្ឋ ៣ នាក់ (ក្នុងវឺដេអូខាងលើ )
យោងតាមការអំពាវនាវបន្ថែម បើទោះជាការអនុវត្តសេចក្តីជូនដំណឹង ត្រូវបានចូលជាធរមាន ដោយអាជ្ញាធរខេត្តបានចាត់វិធានការរដ្ឋបាល ចុះអនុវត្តការរុះរើបណ្តាញប្រព័ន្ធខ្សែលើអាកាសទាំងនោះក៏ដោយ ក៏ប៉ុន្តែអាជ្ញាធរខេត្តនៅតែបន្តឲ្យមានការសម្របសម្រួលផងដែរ ចំពោះបណ្តាក្រុមហ៊ុន ដែលចូលរួមសហការអនុវត្ត ប្រសិនបើក្នុងករណីយឺតយ៉ាវក្នុងការរុះរើ និងមានមូលហេតុច្បាស់លាស់នោះ ។
សម្ភាសន៍ លោក ពិន ប្រាកដ និង លោក សារឹទ្ធ(ក្នុងវឹដេអូខាងលើ)
លោក ពិន ប្រាកដ បន្ថែមថា ៖ អាជ្ញាធរខេត្តសៀមរាប ប្តេជ្ញាធានាឲ្យបាន សោភណ្ឌភាព សណ្តាប់ធ្នាប់ និងរបៀបរៀបរយសាធារណៈ ក្នុងកិត្តិយសជាខេត្តទេសចរណ៍ប្រវត្តិសាស្រ្ត រួមគ្នាការពារនិងរក្សាឲ្យបាន ជ័យលាភី ពានរង្វាន់នានា ទាំងក្នុងតំបន់ទេសចរណ៍អាស៊ាន និង ពិភពលោក ៕
អត្ថបទ និង រូបថត ៖ លោក ងិន គឹមឡេង និងលោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
