នៅព្រឹកថ្ងៃទី១៩ ខែកញ្ញា ឆ្នាំ២០២៥ រដ្ឋបាលខេត្តសៀមរាប បានរៀបចំប្រារព្ធទិវាប្រកាសរដ្ឋធម្មនុញ្ញ លើកទី៣២ នៅបរិវេណសួនច្បារព្រះអង្គចេកព្រះអង្គចម ក្រោមវត្តមាន ឯកឧត្តម លី សំរិទ្ធ ប្រធានក្រុមប្រឹក្សាខេត្ត និង លោក អ៊ឹង គឹមលាង អភិបាលរងខេត្ត និងមានការអញ្ជើញចូលរួមពីថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធទាំងបីប្រភេទ ជាច្រើននាក់។
ពិធីប្រារព្ធទិវានេះ ធ្វើឡើងស្របតាមសារាចររបស់រាជរដ្ឋាភិបាលលេខ ០១ សរ ចុះថ្ងៃទី៣ ខែមករា ឆ្នាំ២០២៥។ ក្នុងឱកាសនេះ ថ្នាក់ដឹកនាំបានរំលឹកពីសមិទ្ធផលដ៏ថ្លៃថ្លានៃរដ្ឋធម្មនុញ្ញ ក្នុងរយៈពេលជាង ៣០ឆ្នាំកន្លងមកនេះ ដែលបានការពារជាតិ សាសនា ព្រះមហាក្សត្រ ពង្រឹងឯករាជ្យ អធិបតេយ្យភាព និងបូរណភាពទឹកដី ព្រមទាំងធ្វើឱ្យប្រទេសជាតិមានការអភិវឌ្ឍឥតឈប់ឈរ។
គួររំលឹកផងដែរថា វិមានរដ្ឋធម្មនុញ្ញដ៏ល្អវិចិត្រមួយត្រូវបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី២៤ ខែកញ្ញា ឆ្នាំ២០២៤ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ ក្នុងព្រះបរមរាជឱង្ការនាពេលនោះ ព្រះអង្គបានមានព្រះរាជបន្ទូលថា៖ «វិមានរដ្ឋធម្មនុញ្ញ គឺជានីតិបូជនីយដ្ឋានដ៏ពិសិដ្ឋតំណាងឲ្យនិមិត្តរូបនីតិរដ្ឋ ដែលមានរដ្ឋធម្មនុញ្ញជាកំពូលនៃច្បាប់ផងទាំងឡាយ នៅព្រះរាជាណាចក្រកម្ពុជាយើង»។
នៅក្នុងពិធីនោះ ថ្នាក់ដឹកនាំ រួមនឹងមន្ត្រីរាជការទាំងអស់ បានដាក់កម្រងផ្កា និងបិណ្ឌបូជាចំពោះរដ្ឋធម្មនុញ្ញនៃព្រះរាជាណាចក្រកម្ពុជាផងដែរ ដើម្បីរំលឹកដល់ខួបដ៏សំខាន់នេះ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
