នាព្រឹកថ្ងៃទី១៩ ខែកញ្ញា ឆ្នាំ២០២៥ សាខាកាកបាទក្រហមកម្ពុជាខេត្តសៀមរាប បានសហការជាមួយស្ថាប័នពាក់ព័ន្ធនានា រួមមាន៖ មន្ទីរអប់រំ យុវជន និងកីឡា មន្ទីរសាធារណការ និងដឹកជញ្ជូន និងស្នងការដ្ឋាននគរបាលខេត្ត រៀបចំយុទ្ធនាការសុវត្ថិភាពចរាចរណ៍ផ្លូវគោក ក្នុងគោលដៅជំរុញការកាត់បន្ថយអត្រាស្លាប់ និងរបួសដោយសារគ្រោះថ្នាក់ចរាចរណ៍ ជាពិសេសក្នុងអំឡុងពេលពិធីបុណ្យភ្ជុំបិណ្ឌខាងមុខនេះ។
លោក លី ប៊ុនណា លេខាធិការគណៈកម្មាធិការសាខាកាកបាទក្រហមខេត្ត បានលើកឡើងថា យុទ្ធនាការនេះគឺជាសកម្មភាពដ៏សំខាន់មួយក្នុងការចូលរួមចំណែកកាត់បន្ថយគ្រោះថ្នាក់។ លោកបន្ថែមទៀតថា ការងារសុវត្ថិភាពចរាចរណ៍ត្រូវតែធ្វើឡើងប្រកបដោយនិរន្តរភាព និងត្រូវទៅដល់គ្រប់ក្រុមមនុស្សនៅក្នុងសង្គម។
លោកវរៈសេនីយ៍ទោ សោម វីរៈ នាយការិយាល័យនគរបាលចរាចរណ៍ផ្លូវគោក បានបង្ហាញថា រយៈពេល ៩ខែ ចាប់ពីខែវិច្ឆិកា ឆ្នាំ២០២៤ ដល់ថ្ងៃទី១៥ ខែសីហា ឆ្នាំ២០២៥ មានគ្រោះថ្នាក់ចរាចរណ៍កើតឡើងចំនួន ៩២លើក ថយចុះ ១២ករណី បើធៀបនឹងរយៈពេលដូចគ្នាកាលពីឆ្នាំ២០២៤ នឹងបានបណ្ដាលឱ្យមនុស្ស ៧៧នាក់ ស្លាប់ និងរបួសធ្ងន់ស្រាល ១៥៨នាក់។
សូមជម្រាបថា ក្នុងយុទ្ធនាការនេះ ក្រុមការងារបានចុះផ្សព្វផ្សាយផ្ទាល់អំពីច្បាប់ចរាចរណ៍ផ្លូវគោក សញ្ញាចរាចរណ៍ និងសារៈសំខាន់នៃការពាក់មួកសុវត្ថិភាពនៅតាមគោលដៅសំខាន់ៗចំនួន ៣កន្លែង គឺនៅស្តុបជន្លង់ ស្តុបចុងកៅស៊ូ និងផ្សារលើធំថ្មី។ ក្នុងនោះដើម្បីជំរុញការចូលរួម ក្រុមការងារបានរៀបចំការសួរសំណួរ-ចម្លើយ និងបានចែកមួកសុវត្ថិភាពចំនួន ៥៥មួក ជូនដល់អ្នកដែលឆ្លើយបានត្រឹមត្រូវ រួមទាំងការចែកខិត្តប័ណ្ណអប់រំជាច្រើនផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
