នៅថ្ងៃទី២៥ ខែកញ្ញា ឆ្នាំ២០២៥ ឯកឧត្តម ហេង ធូ ប្រធានក្រុមការងាររាជរដ្ឋាភិបាលចុះជួយមូលដ្ឋានឃុំខ្នារសណ្តាយ ស្រុកបន្ទាយស្រី ខេត្តសៀមរាប បានដឹកនាំក្រុមការងារ និងអាជ្ញាធរមូលដ្ឋាន នាំយកអំណោយជាគ្រឿងឧបភោគបរិភោគរបស់ ឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយខេត្តសៀមរាប និងលោកជំទាវ ផ្ដល់ជូនបងប្អូនប្រជាពលរដ្ឋដែលរងផលប៉ះពាល់ដោយជំនន់ទឹកភ្លៀង ចំនួន៨៤គ្រួសារ នៅក្នុងស្រុកបន្ទាយស្រី។
ឯកឧត្តម ហេង ធូ មានប្រសាសន៍ថា ពេលប្រជាពលរដ្ឋក្នុងមូលដ្ឋានជួបទុក្ខលំបាក រងគ្រោះដោយសារគ្រោះធម្មជាតិផ្សេងៗ គឺថ្នាក់ដឹកនាំចុះមូលដ្ឋានតែងតែចុះមកដល់ភ្លាមៗតែម្តង អនុវត្តតាមយុទ្ធសាស្ត្ររបស់ប្រមុខរាជរដ្ឋាភិបាល។ ឯកឧត្តម បានផ្តាំផ្ញើដល់ប្រជាពលរដ្ឋត្រូវមានប្រុងប្រយ័ត្នខ្ពស់ចំពោះក្មេងតូចៗ នៅក្នុងស្ថានភាពនេះសូមកុំឱ្យពួកគាត់ចុះលេងទឹក បង្ការការលង់ទឹក និងត្រូវថែរក្សាសុខភាពឱ្យបានល្អប្រសើរគ្រប់ៗគ្នា និងថែទាំសុខភាព តាមរយៈការបរិភោគទឹកស្អាត បរិភោគអាហារផ្សេងៗត្រូវពិនិត្យ និងមានការប្រុងប្រយ័ត្នខ្ពស់។
លោក រិន ឡូត អភិបាលស្រុកបន្ទាយស្រី បានឱ្យដឹងថា នៅថ្ងៃទី២៣ ខែកញ្ញា ឆ្នាំ២០២៥ ទឹកស្ទឹងស្ពានបន្ទាយស្រី ឡើងខ្លាំងដល់ ៥ម៉ែត្រកន្លះ ខណៈចំណុចប្រកាសអាសន្ន ៦ម៉ែត្រ បានធ្វើឱ្យប៉ះពាល់ឃុំចំនួន២ រួមមានឃុំខ្នារសណ្តាយ និងឃុំឃុនរាម បណ្ដាលឱ្យប៉ះពាល់ដល់ផ្លូវថ្នល់ ផ្ទះ ដំណាំប្រជាពលរដ្ឋមួយចំនួនផងដែរ។
លោកអភិបាលស្រុក បញ្ជាក់ថា យ៉ាងណាបច្ចុប្បន្នស្ថានភាពទឹកបានស្រកទៅវិញជាបណ្ដើរៗ តែទោះជាយ៉ាងណាអាជ្ញាធរស្រុកក៏នៅតែបន្តតាមដាន និងជំរុញឱ្យប្រជាពលរដ្ឋបន្តបង្កើនការប្រុងប្រយ័ត្នពីគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ត្រៀមឆ្លើយតបជាប្រចាំ ជាពិសេសទីតាំងដែលងាយរងការជន់លិច៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
