នៅថ្ងៃទី១៩ ខែកញ្ញា ឆ្នាំ២០២៥ បងប្អូនប្រជាពលរដ្ឋមានជីវភាពខ្វះខាតចំនួន ២២០គ្រួសារ ក្នុងសង្កាត់សាលាកំរើក ក្រុងសៀមរាប បានទទួលអំណោយពីគម្រោងថវិកាសេវាសង្គមរបស់សង្កាត់ប្រចាំឆ្នាំ២០២៥ ដោយក្នុង១គ្រួសារទទួលបាន អង្ករ១០គីឡូក្រាម ថវិកា១ម៉ឺនរៀល និងគ្រឿងឧបភោគបរិភោគមួយចំនួនទៀត។
លោកជំទាវ ស៊ិន ណម សមាជិកាក្រុមប្រឹក្សាខេត្ដ មានប្រសាសន៍ថា ដោយសារមានបញ្ហាព្រំដែនជាមួយប្រទេសថៃ ធ្វើឱ្យប្រជាពលរដ្ឋនៅជាប់តំបន់ព្រំដែនបង្ខំចិត្ដជម្លៀសខ្លួនមកកាន់តំបន់សុវត្ថិភាព។ ក្នុងនោះខេត្ដសៀមរាប ជាខេត្ដមួយដែលទទួលជនភៀសសឹក ប្រកបដោយការយកចិត្ដទុកដាក់ពីសំណាក់រដ្ឋបាលខេត្ដ និងអាជ្ញាធរមូលដ្ឋាន ជាពិសេសលើការផ្ដល់ស្បៀងអាហារ ការស្នាក់នៅ ដោយមិនទុកឱ្យពលរដ្ឋមានការព្រួយបារម្ភឡើយ។
លោកជំទាវ មានប្រសាសន៍បន្ដថា ការឈ្លានពានពីសំណាក់ប្រទេសថៃ ធ្វើឱ្យបងប្អូនប្រជាពលរដ្ឋនៅតាមព្រំដែនឃ្លាតឆ្ងាយផ្ទះសម្បែង រងការខូចខាតទ្រព្យសម្បត្តិ និងសម្ភារផ្សេងៗ តែយ៉ាងណាសូមឱ្យប្រជាពលរដ្ឋទាំងអស់ សូមជឿជាក់លើរាជរដ្ឋាភិបាលកម្ពុជារបស់យើងក្នុងការដោះស្រាយបញ្ហាព្រំដែននេះ។
បើតាម លោក សាម ឡន ចៅសង្កាត់សាលាកំរើក បានឱ្យដឹងថា អំណោយដែលបានផ្ដល់ជូននាពេលនេះ គឺបង្ហាញពីការយកចិត្ដទុកដាក់ គិតគូពីសុខទុក្ខរបស់បងប្អូនប្រជាពលរដ្ឋនៅក្នុងមូលដ្ឋាន ដោយមិនទុកនរណាម្នាក់ចោលឡើយ។ ក្នុងនោះរដ្ឋបាលសង្កាត់ បានផ្ដល់បណ្ណសមធម៌ជូនពលរដ្ឋដែលមានជីវភាពខ្វះខាត ផ្ដល់បណ្ណធម៌ប្រភេទក្រ១ ចំនួន២៥១គ្រួសារ, ក្រ២ ចំនួន៥៥៥គ្រួសារ និងគ្រួសាររងហានិភ័យចំនួន ៤៣៦គ្រួសារ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
