គិតត្រឹមរយៈពេលតែ ២ឆ្នាំប៉ុណ្ណោះ បន្ទាប់ពីចាប់ផ្ដើមដំណើរការជាផ្លូវការ អាកាសយានដ្ឋានអន្តរជាតិសៀមរាបអង្គរ (SAI) បានទទួលជើងយន្តហោះចុះចតបានជិត ៣ម៉ឺនដង និងទទួលស្វាគមន៍អ្នកដំណើរឆ្លងកាត់បានចំនួនជិត ៣លាននាក់ ដែលជាការរួមចំណែកដ៏វិជ្ជមានដល់ការអភិវឌ្ឍវិស័យទេសចរណ៍កម្ពុជា។
ក្នុងពិធីសម្ពោធរូបសំណាក «ព្រះរាជគ្រូទិវាករបណ្ឌិត» និងលោក «ជីវ តាក្វាន់»” អបអរសាទរខួប ២ឆ្នាំ នៃការបើកដំណើរការអាកាសយានដ្ឋានអន្តរជាតិសៀមរាបអង្គរ កាលពីរសៀលថ្ងៃទី១៦ ខែតុលា ឆ្នាំ២០២៥ លោក លី ជីជី (Lu Qizhi) ប្រធានការិយាល័យកុងស៊ុលនៃស្ថានទូតចិនប្រចាំខេត្តសៀមរាប បានគូសបញ្ជាក់ថា SAI គឺជាអាកាសយានដ្ឋានអន្តរជាតិដំបូងដែលអនុវត្តដោយក្រុមហ៊ុនចិននៅក្រៅប្រទេសតាម “គំរូ BOT” ហើយក្នុងរយៈពេល ២ឆ្នាំមកនេះ ចំនួនជើងហោះហើរមានការកើនឡើងជាលំដាប់ អាជីវកម្មអាកាសយានដ្ឋានត្រូវបានកែលម្អឥតឈប់ឈរ និងបានចាប់ផ្តើមជំរុញការអភិវឌ្ឍន៍សេដ្ឋកិច្ចអាកាសយានដ្ឋានគាំទ្រ ដោយទាក់ទាញភ្ញៀវទេសចរកាន់តែច្រើនឡើងពីជុំវិញពិភពលោក។
លោក លី ជីជី ក៏បានលើកឡើងពីភាពជោគជ័យនៃ “”ឆ្នាំនៃការផ្លាស់ប្ដូរប្រជាជនទៅប្រជាជនចិន-កម្ពុជា” ឆ្នាំ២០២៤ និងការឈានចូល “ឆ្នាំទេសចរណ៍ចិន-កម្ពុជា” ឆ្នាំ២០២៥ ដែលស្ថានទូតចិន និងស្ថាប័នពាក់ព័ន្ធកម្ពុជា បានបង្កើនកិច្ចសហប្រតិបត្តិការជំរុញជើងហោះហើរ និងផ្សព្វផ្សាយទេសចរណ៍។ ជាក់ស្តែង ចាប់ពីខែមករា ដល់ខែកញ្ញា ឆ្នាំ២០២៥ ភ្ញៀវទេសចរចិនជាង ៦២ ០០០នាក់ បានមកទស្សនាប្រាសាទអង្គរវត្ត កើនឡើង ១២,៨% ធៀបនឹងឆ្នាំមុន ហើយក្នុងខែកញ្ញា ចិនបានក្លាយជាប្រទេសដែលមានចំនួនភ្ញៀវទេសចរចូលទស្សនាប្រាសាទអង្គរវត្តច្រើនជាងគេ។
ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ថា ថ្ងៃទី១៦ ខែតុលា ឆ្នាំ២០២៥ ជាថ្ងៃអបអរសាទរខួប ២ឆ្នាំ SAI និងជាឱកាសនៃខួបលើកទី៦៧ នៃការបង្កើតទំនាក់ទំនងការទូតកម្ពុជា-ចិន ដើម្បីលើកកម្ពស់ប្រវត្តិនៃការផ្លាស់ប្ដូរវប្បធម៌ និងការទូតជាង ២ ០០០ ឆ្នាំរវាងប្រទេសទាំងពីរ។ ការដំឡើងរូបសំណាក «ព្រះរាជគ្រូទិវាករបណ្ឌិត» និងរូបសំណាកលោក «ជីវ តាក្វាន់» គឺជាគំនិតផ្ដួចផ្ដើមរបស់រដ្ឋលេខាធិការដ្ឋានអាកាសចរណ៍ស៊ីវិល ដោយមានការសហការពីក្រសួងវប្បធម៌ និងវិចិត្រសិល្បៈ និងក្រុមហ៊ុន អង្គរ អ៊ិនធើណេសិនណល អ៊ែរផត អ៊ិនវេសមិន (ខេមបូឌា) ឯ.ក (AIAI)។
ឯកឧត្តមបញ្ជាក់ថា «ព្រះរាជគ្រូទិវាករបណ្ឌិត» ជាតួអង្គសំខាន់ក្នុងប្រវត្តិសាស្ត្រសម័យអង្គរ ដែលបានបម្រើព្រះមហាក្សត្រ ៥ ព្រះអង្គ និងជាអ្នកផ្តើមគំនិតសាងសង់ប្រាសាទអង្គរវត្ត។ ចំណែក លោក «ជីវ តាក្វាន់» ជាបេសកទូតចិនដែលបានមកទស្សនកិច្ចនៅកម្ពុជាចុងសម័យអង្គរ (១២៩៦-១២៩៧) និងបានសរសេរកំណត់ត្រាលម្អិត «ប្រពៃណីនៃអ្នកស្រុកចេនឡា» ដែលជាឯកសារប្រវត្តិសាស្ត្រដ៏សំខាន់។
ឯកឧត្តមបន្តថា រូបសំណាកទាំងពីរនេះ ជានិមិត្តរូបនៃស្ពានសាមគ្គីសហប្រតិបត្តិការដ៏សំខាន់មួយ តភ្ជាប់កម្ពុជាទៅកាន់ពិភពលោក។ SAI ត្រូវបានរំពឹងទុកថានឹងបន្តមានកំណើនជើងហោះហើរ អ្នកដំណើរ និងក្រុមហ៊ុនអាកាសចរណ៍កើនឡើងបន្ថែមទៀតនាពេលអនាគត៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
