នាព្រឹកថ្ងៃទី១៩ ខែតុលា ឆ្នាំ២០២៥ នៅក្នុងកិច្ចប្រជុំក្រុមការងាររាជរដ្ឋាភិបាលចុះមូលដ្ឋានឃុំស្វាយលើ ស្រុកស្វាយលើ ដើម្បីត្រួតពិនិត្យ និងគាំទ្រកម្មវិធីអនុវត្ដគោលនយោបាយ និងយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល នៅសាលប្រជុំសាលាស្រុកស្វាយលើ ឯកឧត្តម សេង សំរិត អគ្គនាយករង អគ្គនាយកដ្ឋានភស្តុភារ ហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំស្វាយលើបានជំរុញសមាជិក សមាជិកា និងក្រុមការងារចុះមូលដ្ឋានឃុំស្វាយលើទាំងអស់ត្រូវបន្ដយកចិត្ដទុកដាក់ខ្ពស់ពីបញ្ហាប្រឈម និងសំណូមពរ តាមរយៈការចុះផ្សព្វផ្សាយនូវវេទិការសាធារណ: និងខិតខំស្វែងរកដំណោះស្រាយជូនប្រជាពលរដ្ឋឱ្យបានទាន់ពេលវេលា និងឆាប់រហ័សដែលនេះបញ្ជាក់ពីការផ្ដល់សេវាសាធារណៈកាន់តែខិតជិតបងប្អូនប្រជាពលរដ្ឋនៅក្នុងមូលដ្ឋានរបស់ខ្លួន។
យោងទៅលើរបាយការណ៍របស់រដ្ឋបាលស្រុក ឯកឧត្តមក៏បានធ្វើការកោតសរសើរ និងវាយតម្លៃខ្ពស់ចំពោះក្រុមការងារ ជាពិសេសអាជ្ញាធរស្រុកដែលបានគិតគូរ និងយកចិត្ដទុកដាក់ក្នុងការអភិវឌ្ឍនៅក្នុងមូលដ្ឋានបានល្អប្រសើរ យកចិត្ដទុកដាក់ចំពោះជនភៀសសឹកនាអំឡុងពេលប្រទេសមានជំលោះព្រំដែនជាមួយប្រទេសជិតខាងនិងសម្របសម្រួលពលករដែលត្រឡប់មកពីប្រទេសថៃវិញឱ្យមានការងារធ្វើនៅក្នុងប្រទេស។
ជាការឆ្លើយតបទៅនឹងការអនុវត្ដគោលនយោបាយអទិភាពទាំង៦របស់រាជរដ្ឋាភិបាល លោក អៀង ពិសិដ្ឋ អភិបាលស្រុកស្វាយលើបានឱ្យដឹងថា រដ្ឋបាលស្រុកបានចូលរួមចំណែកជំរុញការផ្ដល់សេវាសុខាភិបាលជូនពលរដ្ឋ ដើម្បីលើកកម្ពស់សុខុមាលភាពពលរដ្ឋឲ្យបានល្អប្រសើរ ជំរុញការងារបណ្ដុះបណ្ដាលជំនាញវិជ្ជាជីវៈដល់ពលរដ្ឋ ក្នុងនោះបានចុះឈ្មោះពលរដ្ឋឲ្យបានរៀនជំនាញ និងរកការងារក្នុងប្រទេសចំនួន៤៩នាក់ ស្រី១៧នាក់ បង្កើតសមាគមកសិកម្មដើម្បីទិញកសិផលពីកសិករដូចជា ស្រូវ ស្វាយចន្ទី ដំឡូងមី និងផលិតផលកសិផលជាច្រើនទៀត។
ជាមួយគ្នានេះក្រុមការងារបានខិតខំប្រឹងប្រែងយកចិត្ដទុកដាក់ក្នុងការជំរុញលើកកម្ពស់ការអនុវត្តការងារកំណែទម្រង់ តាមរយៈការធ្វើប្រតិភូកម្មកម្មផ្សេងៗ ការផ្ដល់សេវាសាធារណ:ជូនពលរដ្ឋបានឆាប់រហ័ស និងទាន់ពេលវេលា ក្នុងនោះរាល់បញ្ហាប្រឈម និងសំណូមពរនានារបស់ពលរដ្ឋ ក្រុមការងារបាននឹងកំពុងធ្វើការដោះស្រាយជាបន្ដបន្ទាប់៕
អត្ថបទ៖ លោក អោត រត់
កែសម្រួល៖ លោកស្រី សូ ស៊ីមាន
