នៅថ្ងៃទី២០ ខែតុលា ឆ្នាំ២០២៥នេះ មន្ទីរព័ត៌មានខេត្តសៀមរាប ក្រោមកិច្ចសហការដោយអាជ្ញាធរមូលដ្ឋាន បានបន្តបន្តយុទ្ធនាការ «និយាយថាទេចំពោះព័ត៌មានក្លែងក្លាយ» សម្រាប់គោលដៅទី៦ នៅស្រុកស្វាយលើ ខេត្តសៀមរាប ក្នុងគោលដៅផ្ដល់ចំណេះដឹងដល់បងប្អូនប្រជាពលរដ្ឋ ឱ្យយល់ដឹងពីផលអាក្រក់នៃព័ត៌មានក្លែងក្លាយ ណែនាំវិធីសាស្រ្តដើម្បីសម្គាល់ព័ត៌មានមិនពិត និងលើកទឹកចិត្តឱ្យមានការចូលរួមយ៉ាងសកម្មក្នុងការទប់ស្កាត់ព័ត៌មានមិនពិតគ្រប់រូបភាព។
លោក យឿន ចាន់ អនុប្រធានមន្ទីរព័ត៌មានទទួលបន្ទុករួម បានបញ្ជាក់ថា ការអនុវត្តយុទ្ធនាការ «និយាយថាទេចំពោះព័ត៌មានក្លែងក្លាយ – Say No to Fake News» ដែលដាក់ចេញដោយក្រសួងព័ត៌មាន គឺសំដៅធានាសុវត្ថិភាពក្នុងការប្រើប្រាស់ព័ត៌មាន និងពង្រឹងសន្តិសុខព័ត៌មានសម្រាប់សាធារណជន។ ក្នុងនោះក្រសួងព័ត៌មានបានផ្ដោតជាស្នូលលើចំណុចសំខាន់ៗចំនួន៣ ទី១.ធានាសិទ្ធិក្នុងការទទួលព័ត៌មានរបស់ប្រជាពលរដ្ឋ ទី២.ធានាគុណភាពព័ត៌មានដែលផ្ដល់ជូនប្រជាពលរដ្ឋ និងទី៣.ធានាសុវត្ថិភាពព័ត៌មានសម្រាប់ប្រជាជនប្រើប្រាស់។ កិច្ចការទាំងនេះ គឺជាកត្តារួមចំណែកដ៏ល្អក្នុងការរក្សាសណ្ដាប់ធ្នាប់ និងស្ថិរភាពក្នុងសង្គម។
លោក យឿន ចាន់ បានបន្ថែមទៀតថា ដើម្បីរួមគ្នាលុបបំបាត់ព័ត៌មានក្លែងក្លាយ និងផ្ដល់សុវត្ថិភាពព័ត៌មានសម្រាប់បងប្អូនពលរដ្ឋប្រើប្រាស់ និងធ្វើការសម្រេចចិត្ត គឺពលរដ្ឋគ្រប់រូបត្រូវ ចៀសវាងការបង្កើត ការផ្សព្វផ្សាយ និងការចែករំលែកព័ត៌មានក្លែងក្លាយ ប៉ុន្តែត្រូវយកចិត្តទុកដាក់ផ្សព្វផ្សាយតែព័ត៌មានពិត ត្រឹមត្រូវ និងមានប្រភពច្បាស់លាស់។ លោកគូសបញ្ជាក់ថា ព័ត៌មានក្លែងក្លាយបានបង្កផលប៉ះពាល់យ៉ាងខ្លាំង ហើយកំពុងបំផ្លាញទំនុកចិត្តរបស់ប្រជាជនចំពោះអាជ្ញាធរ ក្រសួង និងស្ថាប័ននានា ព្រមទាំងធ្វើឱ្យសាធារណជនមានការសង្ស័យ ព្រួយបារម្ភ និងឈានទៅដល់ការយល់ច្រឡំ។
ក្នុងឱកាសនោះ លោក សោម សុផល អភិបាលរងស្រុកស្វាយលើ បានអំពាវនាវដល់អាជ្ញាធរមូលដ្ឋាន ក៏ដូចជាប្រជាពលរដ្ឋទាំងអស់ ចូលរួមអនុវត្តន៍តាមការណែនាំរបស់ក្រសួងព័ត៌មាន និងមន្ទីរព័ត៌មានខេត្ត គឺត្រូវឱ្យរួមគ្នាលុបបំបាត់ព័ត៌មានក្លែងក្លាយ តាមរយៈការមិនបង្កើត មិនផ្សព្វផ្សាយ និងមិនចែករំលែកនូវព័ត៌មានមិនពិត ឬមានប្រភពមិនច្បាស់លាស់ ប៉ុន្តែត្រូវរួមគ្នាផ្សព្វផ្សាយតែព័ត៌មានពិត ត្រឹមត្រូវ ដើម្បីធានាសុវត្ថិភាពព័ត៌មាន និងរក្សាបាននូវស្ថិរភាពនៅក្នុងសហគមន៍របស់យើង៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
