ក្រុមមគ្គុទ្ទេសក៍ទេសចរណ៍កម្ពុជា បានសម្ដែងនូវមោទនភាព និងបង្ហាញក្តីរំពឹងទុកយ៉ាងខ្ពស់ ចំពោះកំណើនភ្ញៀវទេសចរអន្តរជាតិជាបន្តបន្ទាប់ បន្ទាប់ពីអាកាសយានដ្ឋានអន្តរជាតិតេជោ ដែលជាព្រលានយន្តហោះលំដាប់អន្តរជាតិដ៏ធំ បានដាក់ឲ្យដំណើរការជាផ្លូវការនាពេលថ្មីៗនេះ។
មគ្គុទ្ទេសក៍ទេសចរណ៍បានលើកឡើងស្រដៀងគ្នាថា សមិទ្ធិផលដ៏ធំសម្បើមនេះ គឺជាមោទនភាពរបស់កម្ពុជា ដែលពិភពលោកនឹងមើលឃើញកាន់តែច្បាស់ពីការអភិវឌ្ឍរីកចម្រើននៃវិស័យទេសចរណ៍កម្ពុជាពីមួយឆ្នាំទៅមួយឆ្នាំ និងធ្វើឱ្យសហគមន៍អន្តរជាតិកាន់តែជឿជាក់លើរាជរដ្ឋាភិបាលកម្ពុជា។
ពួកគាត់បានបន្តថា ក្នុងនាមជាអ្នកបម្រើការក្នុងវិស័យទេសចរណ៍ ពួកគាត់មានមោទនភាពក្រៃលែង ហើយនឹងខិតខំប្រឹងប្រែងបន្ថែមទៀត ដើម្បីផ្តល់ភាពងាយស្រួល និងបង្កើនទំនុកចិត្តដល់ភ្ញៀវទេសចរអន្តរជាតិក្នុងការទស្សនារមណីយដ្ឋានអង្គរ។ ក្រោមការយកចិត្តទុកដាក់របស់រាជរដ្ឋាភិបាលលើវិស័យទេសចរណ៍ ពួកគាត់ជឿជាក់ថា ចំនួនភ្ញៀវទេសចរគ្រប់ជាតិសាសន៍ទូទាំងពិភពលោកនឹងមកទស្សនាប្រទេសកម្ពុជាកើនឡើងជាលំដាប់ ជាពិសេសដើម្បីទស្សនារមណីយដ្ឋានអង្គរ ខណៈដែលខេត្តសៀមរាប-អង្គរនៅតែជាជង្រុកទេសចរណ៍ដ៏សំបូរបែប ទាំងទេសចរណ៍វប្បធម៌ អរិយធម៌ ធម្មជាតិ ព្រមទាំងសេវាកម្មស្នាក់នៅ និងអាហារដ្ឋាន ដែលសុទ្ធសឹងជាធនធានដ៏សំខាន់សម្រាប់វិស័យនេះ។
អាកាសយានដ្ឋានអន្តរជាតិតេជោ ត្រូវបានសាងសង់ឡើងលើផ្ទៃដីសរុបប្រមាណ ២ ៦០០ ហិកតា ស្ថិតនៅជាប់រាជធានីភ្នំពេញ ខេត្តកណ្ដាល និងខេត្តតាកែវ។ គម្រោងនេះវិនិយោគដោយក្រុមហ៊ុន Cambodia Airport Investment Co., Ltd (CAIC) ដែលជាការបណ្ដាក់ទុនរួមគ្នា រវាងរាជរដ្ឋាភិបាលកម្ពុជា និងក្រុមហ៊ុន OCIC ក្នុងតម្លៃសរុបប្រមាណ ១ ៥០០ លានដុល្លារ សម្រាប់ដំណាក់កាលទី១។ វាជាអាកាសយានដ្ឋានអន្តរជាតិលំដាប់ 4F ដែលមានសមត្ថភាពអាចទទួលយន្តហោះធំៗគ្រប់ប្រភេទនៅលើពិភពលោក៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
