កម្ពុជាបានទទួលកិត្តិយសជាម្ចាស់ផ្ទះរៀបចំកិច្ចប្រជុំឧត្តមមន្ត្រីការងារអាស៊ានលើកទី២១ (21st SLOM) នាថ្ងៃទី២១ ខែតុលា ឆ្នាំ២០២៥ នៅខេត្តសៀមរាប ដែលនេះជាលើកទីពីរហើយដែលកម្ពុជាបានរៀបចំកិច្ចប្រជុំដ៏មានសារៈសំខាន់នេះ បន្ទាប់ពីលើកទីមួយនៅរាជធានីភ្នំពេញកាលពីឆ្នាំ២០១២ ក្នុងគោលបំណងបញ្ជាក់ឡើងវិញនូវឆន្ទៈរួមគ្នាក្នុងការពង្រឹងកម្លាំងពលកម្មរបស់អាស៊ាន ប្រកបដោយបរិយាបន្ន ចីរភាព ភាពធន់ និងការត្រៀមខ្លួនសម្រាប់អនាគត។
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអបអរសាទរ លោកជំទាវ Joan Moh អនុរដ្ឋលេខាធិការនៃក្រសួងហត្ថពលកម្ម នៃប្រទេសសិង្ហបុរី ដែលជាតំណាងប្រធានប្តូរវេនឧត្តមមន្ត្រីការងារអាស៊ាន សម្រាប់ឆ្នាំ២០២៤-២០២៦។ លោកជំទាវនឹងដឹកនាំកិច្ចប្រជុំពិនិត្យវឌ្ឍនភាពការងារពាក់ព័ន្ធស្ថាប័នក្រោមវិស័យ SLOM ដោយផ្តោតលើទីផ្សារការងារ ការអភិវឌ្ឍកម្លាំងពលកម្ម ចល័តភាពកម្លាំងពលកម្ម សុវត្ថិភាព និងសុខភាពការងារ ជាដើម។ កិច្ចប្រជុំក៏នឹងកំណត់ទិសដៅទៅមុខដើម្បីធានាថាអាស៊ាននៅតែបន្តឆ្លើយតបនឹងបរិបទបច្ចុប្បន្ន ពង្រឹងភាពធន់ និងលើកកម្ពស់នវានុវត្តន៍ បរិយាបន្ន និងចីរភាព។
ឯកឧត្តមរដ្ឋមន្ត្រី ហេង សួរ ក៏បានវាយតម្លៃខ្ពស់ចំពោះសមិទ្ធផលគួរឱ្យកត់សម្គាល់របស់ឧត្តមមន្ត្រីការងារអាស៊ាន ដែលបានរួមគ្នាអនុម័ត៖ សេចក្ដីប្រកាសរួមរបស់រដ្ឋមន្ត្រីការងារអាស៊ាន ស្ដីពីការអភិវឌ្ឍជំនាញសម្រាប់កម្លាំងពលកម្មនាពេលអនាគត ដើម្បីគាំទ្រដល់កម្មវិធី ឆ្នាំជំនាញអាស៊ាន ២០២៥ (ASEAN Year of Skills 2025)។ ផែនការសកម្មភាពសម្រាប់ការងារបៃតង ឆ្ពោះទៅរកអនាគតនៃកម្លាំងពលកម្មអាស៊ានប្រកបដោយចីរភាព និងបរិយាបន្ន និងផែនទីបង្ហាញផ្លូវអាស៊ានស្ដីពីការលុបបំបាត់ពលកម្មកុមារនៅត្រឹមឆ្នាំ២០៣៥។
ឯកឧត្តម ហេង សួរ បានគូសបញ្ជាក់ថា គំនិតផ្ដួចផ្ដើមទាំងនេះបង្ហាញពីការប្ដេជ្ញារួមគ្នាក្នុងការលើកកម្ពស់អន្តរកម្មយុត្តិធម៌ ពង្រឹងជំនាញឌីជីថលនិងជំនាញបៃតង ពង្រឹងការគាំទ្រដល់សហគ្រាសធុនមីក្រូ តូច និងមធ្យម ចល័តភាពកម្លាំងពលកម្ម និងលុបបំបាត់ពលកម្មកុមារ ដែលស្របតាមប្រធានបទ “ពង្រឹងភាពធន់ និងលើកកម្ពស់នវានុវត្តន៍” (សិង្ហបុរីជាប្រធាន) និងប្រធានបទ “បរិយាបន្ន និងចីរភាព” (ម៉ាឡេស៊ីជាប្រធានអាស៊ាននៅឆ្នាំនេះ)។
ឯកឧត្តមបានបន្ថែមថា អាស៊ានបានបន្តបង្ហាញនូវអភិក្រមប្រកបដោយភាពបុរេសកម្ម ដោយអភិវឌ្ឍសូចនាករគន្លឹះសម្រាប់គម្រោងផែនការការងាររដ្ឋមន្ត្រីការងារអាស៊ានឆ្នាំ២០២៦-២០៣០ ស្របពេលកំពុងប្រឈមនឹងដំណាក់កាលសំខាន់នៃបរិវត្តកម្មបច្ចេកវិទ្យាឌីជីថល ការងារបៃតង និងលំអានថ្មីនៃចល័តភាពទេសន្តរប្រវេសន៍។ គំនិតផ្ដួចផ្ដើមដើម្បីឆ្លើយតបនឹងឱកាសការងារ ប្រព័ន្ធទីផ្សារការងារ ការពង្រីករបបសន្តិសុខសង្គម និងការបិទគម្លាតជំនាញគឺចាំបាច់ណាស់ ហើយកិច្ចសហការបន្តរបស់រដ្ឋសមាជិកអាស៊ាន គឺពិតជាមានសារៈសំខាន់ដើម្បីជំរុញភាពធន់ នវានុវត្តន៍ បរិយាបន្ន និងបរិវត្តកម្មប្រកបដោយចីរភាព។
ឯកឧត្តមរដ្ឋមន្ត្រីបានបញ្ជាក់ជាថ្មីពីជំហររបស់កម្ពុជាក្នុងការបន្តសហការយ៉ាងខ្ជាប់ខ្ជួនជាមួយរដ្ឋសមាជិកអាស៊ានទាំងអស់ ដើម្បីដោះស្រាយបញ្ហាប្រឈមក្នុងតំបន់និងសកល ឆ្ពោះទៅរកការអភិវឌ្ឍរួមគ្នា៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
