មន្ទីរផែនការខេត្តសៀមរាប នៅថ្ងៃទី២១ ខែតុលា ឆ្នាំ២០២៥ បានរៀបចំពិធីប្រកាសផ្សព្វផ្សាយលទ្ធផលគណនេយ្យជាតិថ្នាក់ខេត្ត ដើម្បីចូលរួមសម្រេចគោលនយោបាយអភិវឌ្ឍន៍ និងលើកកម្ពស់ការយល់ដឹងអំពីតួនាទីស្ថិតិ ក្នុងការគ្រប់គ្រងសេដ្ឋកិច្ចប្រកបដោយប្រសិទ្ធភាព។
ថ្លែងនៅក្នុងពិធីនោះ លោក ឃិន សុង អគ្គនាយករងវិទ្យាស្ថានជាតិស្ថិតិ នៃក្រសួងផែនការ បានលើកឡើងថា ការវាស់វែងកំណើនសេដ្ឋកិច្ចតម្រូវឱ្យមានស្ថិតិគណនេយ្យជាតិប្រកបដោយគុណភាព ដែលអាចឆ្លើយតបទៅនឹងតម្រូវការនៃការវិវត្ដសេដ្ឋកិច្ច។ លោកបានបន្តថា ស្ថិតិទាំងនេះត្រូវបានរាជរដ្ឋាភិបាលប្រើប្រាស់ជាសូចនាករមូលដ្ឋានសម្រាប់តាមដាន វិភាគ វាយតម្លៃ រៀបចំគោលនយោបាយ និងការសម្រេចចិត្តនានា ក្នុងការឆ្លើយតបទៅនឹងបម្រែបម្រួលសេដ្ឋកិច្ចតំបន់ និងសកល។
លោកអគ្គនាយករងវិទ្យាស្ថានជាតិស្ថិតិ ក៏បានបញ្ជាក់បន្ថែមទៀតថា គណនេយ្យជាតិក៏នឹងជួយពង្រឹងគុណភាពនៃការគ្រប់គ្រងរដ្ឋបាលសាធារណៈនៅថ្នាក់មូលដ្ឋានផងដែរ។ ឧបករណ៍សំខាន់នេះនឹងរួមចំណែកក្នុងការប្រយុទ្ធប្រឆាំងនឹងការប្រើប្រាស់ទម្រង់មិនមានភាពស្មើគ្នា និងធានាថា ប្រាក់ចំណាយរបស់រដ្ឋត្រូវបានប្រើប្រាស់យ៉ាងមានប្រសិទ្ធភាព និងសមស្របតាមគោលនយោបាយ និងតម្រូវការអភិវឌ្ឍន៍របស់ខេត្ត។
គួរបញ្ជាក់ថា ស្ថិតិគណនេយ្យជាតិគឺជាផ្នែកមួយដ៏សំខាន់នៃប្រព័ន្ធស្ថិតិជាតិ ដែលមានតួនាទីគន្លឹះក្នុងការអភិវឌ្ឍន៍ប្រទេសជាតិ។ ប្រព័ន្ធស្ថិតិជាតិនេះរួមមានស្ថិតិសំខាន់ៗដូចជា ស្ថិតិគណនេយ្យជាតិ ស្ថិតិជញ្ជីងទូទាត់ ស្ថិតិហិរញ្ញវត្ថុរដ្ឋាភិបាល និងស្ថិតិកសិកម្មជាដើម ដែលជាបណ្ដុំសូចនាករម៉ាក្រូសេដ្ឋកិច្ចត្រូវប្រមូល និងចងក្រងប្រចាំខែ ត្រីមាស និងប្រចាំឆ្នាំ៕
អត្ថបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
