ថ្លែងក្នុងយុទ្ធនាការប្រយុទ្ធប្រឆាំងព័ត៌មានក្លែងក្លាយ គោលដៅទី៧ នៅស្រុកបន្ទាយស្រី នាថ្ងៃទី២២ ខែតុលានេះ លោក រិន ឡូត អភិបាលស្រុកបន្ទាយស្រី បានអំពាវនាវឱ្យអាជ្ញាធរមូលដ្ឋាន ប្រជាពលរដ្ឋ ពិសេសយុវជន ចូលរួមអនុវត្តន៍តាមការណែនាំរបស់ក្រសួងព័ត៌មាន និងមន្ទីរព័ត៌មានខេត្ត រួមគ្នាលុបបំបាត់ព័ត៌មានក្លែងក្លាយ តាមរយៈការមិនបង្កើត មិនផ្សព្វផ្សាយ និងមិនចែករំលែកនូវព័ត៌មានមិនពិត ឬគ្មានប្រភពច្បាស់លាស់ ជំរុញការផ្សព្វផ្សាយព័ត៌មានពិត ត្រឹមត្រូវ ដើម្បីធានាសុវត្ថិភាពព័ត៌មាន និងរក្សាបាននូវស្ថិរភាពក្នុងសហគមន៍របស់យើង។
ជាមួយគ្នានេះ លោក រិន ឡូត ក៏បានសម្ដែងនូវការគាំទ្រ និងក្ដីរីករាយ ចំពោះវត្តមានចូលរួមយ៉ាងសកម្មពីសំណាក់សិស្សានុសិស្ស និងប្រជាពលរដ្ឋក្នុងមូលដ្ឋាន នៅក្នុងយុទ្ធនាការដ៏មានសារៈប្រយោជន៍នេះ។ លោកថា ការចូលរួមយ៉ាងផុសផុលពីយុវវ័យនេះ បានបង្ហាញពីការយល់ដឹង និងការយកចិត្តទុកដាក់ខ្ពស់របស់ពួកគេ ចំពោះការប្រយុទ្ធប្រឆាំងព័ត៌មានក្លែងក្លាយ ដែលជាកត្តារួមចំណែកដ៏សំខាន់ក្នុងការធានានូវសន្តិសុខ និងស្ថិរភាពព័ត៌មានក្នុងសង្គម។
លោក យឿន ចាន់ អនុប្រធានមន្ទីរព័ត៌មានទទួលបន្ទុករួម បានអះអាងថា យុទ្ធនាការ «និយាយថាទេចំពោះព័ត៌មានក្លែងក្លាយ – Say No to Fake News» មានគោលដៅធានាសុវត្ថិភាពក្នុងការប្រើប្រាស់ព័ត៌មាន និងពង្រឹងសន្តិសុខព័ត៌មានសម្រាប់សាធារណជន។
លោកបានបន្ថែមថា ដើម្បីចូលរួមលុបបំបាត់ព័ត៌មានក្លែងក្លាយ និងសុវត្ថិភាពព័ត៌មាន ប្រជាពលរដ្ឋគ្រប់រូបត្រូវចៀសវាងការបង្កើត ការផ្សព្វផ្សាយ និងការចែករំលែកព័ត៌មានក្លែងក្លាយ។ ផ្ទុយទៅវិញ ត្រូវយកចិត្តទុកដាក់ផ្សព្វផ្សាយតែព័ត៌មានពិត ត្រឹមត្រូវ និងមានប្រភពច្បាស់លាស់។ ព័ត៌មានក្លែងក្លាយបានបង្កផលប៉ះពាល់យ៉ាងធ្ងន់ធ្ងរ បំផ្លាញទំនុកចិត្តរបស់ប្រជាជនចំពោះអាជ្ញាធរ ក្រសួង និងស្ថាប័នពាក់ព័ន្ធនានា ព្រមទាំងធ្វើឱ្យសាធារណជនមានការសង្ស័យ ព្រួយបារម្ភ និងយល់ច្រឡំ៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
