ក្រោយមានការផ្សព្វផ្សាយពីសំណាក់បណ្ដាញសារព័ត៌មានមួយ ដោយភ្ជាប់ជាមួយវីដេអូ និងបានលើកឡើងថា “ប្រជាពលរដ្ឋនៅស្រុកជីក្រែង ខេត្តសៀមរាប បានលើកជាចម្ងល់ថា តើនេះជាបច្ចេកទេសថ្មីឬយ៉ាងណា ក្នុងការចាក់ផ្លូវបេតុងមិនប្រើសរសៃរដែក” អាជ្ញាធរឃុំខ្វាវ ស្រុកជីក្រែង ខេត្តសៀមរាប និងក្រុមហ៊ុនម៉ៅការ បានបញ្ជាក់ថា ផ្លូវបេតុងមួយខ្សែដែលកំពុងសាងសង់នេះ គឺពិតជាបានដាក់ដែកត្រឹមត្រូវតាមលក្ខណៈបច្ចេកទេស និងកិច្ចសន្យា មិនដូចការចុះផ្សាយនោះឡើយ។
លោក ធិន ភី មេឃុំខ្វាវ នៅថ្ងៃទី២២ ខែតុលា ឆ្នាំ២០២៥នេះ បានបង្ហាញថា ផ្លូវបេតុងដែលកំពុងអនុវត្តនេះ ស្ថិតនៅក្នុងឃុំខ្វាវ ស្រុកជីក្រែង ខេត្តសៀមរាប មានបណ្ដោយ ១ ១៥០ម៉ែត្រ និងទទឹង ៥ម៉ែត្រ។ លោកបានបញ្ជាក់បន្ថែមថា ក្នុងអំឡុងពេលសាងសង់ អាជ្ញាធរ កម្លាំងប្រជាការពារ និងប្រជាពលរដ្ឋ បានប្រចាំការ និងចុះពិនិត្យការងារជាប្រចាំនៅទីតាំងផ្ទាល់ ដើម្បីធានាបាននូវគុណភាព។
ចំណែក លោក ហ៊ួរ ឆូយ អ្នកម៉ៅការសាងសង់ផ្លូវខាងលើរបស់ក្រុមហ៊ុន ង៉ោ ឈុត ក៏បានអះអាងផងដែរថា ផ្លូវបេតុងនេះ គឺបានដាក់ដែកពេញលេញ ត្រឹមត្រូវតាមលក្ខខណ្ឌនៃកិច្ចសន្យា មិនមានការធ្វេសប្រហែស ឬគ្មានសរសៃដែកដូចការចុះផ្សាយព័ត៌មាននោះឡើយ៕
អត្ថបទ៖ លោក អ៊ុន ណារាជ្យ
