កាលពីថ្ងៃទី២២ ខែតុលា ឆ្នាំ២០២៥ អ្នកឧកញ៉ាបណ្ឌិត សៀង ណាំ អ្នកតំណាងរាស្រ្តមណ្ឌលសៀមរាប និង លោក លី សារី អភិបាលរងខេត្ត បានអញ្ជើញប្រគល់ផ្ទះមួយខ្នង ជូនក្រុមគ្រួសារវីរជនពលី លោកអនុសេនីយ៍ត្រី ថន ញ៉ាញ់ នៅក្នុងភូមិគោកកណ្ដាល ឃុំសសរស្ដម្ភ ស្រុកពួក ខេត្តសៀមរាប ដោយពិធីនេះ ក៏មានការចូលរួមពី លោកឧត្តមសេនីយ៍ទោ ហួត សុធី ស្នងការនគរបាលខេត្ត និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តសៀមរាប។
អ្នកឧកញ៉ាបណ្ឌិត សៀង ណាំ មានប្រសាសន៍ថា ផ្ទះមួយខ្នងនេះ គឺជាសមិទ្ធផលដែលបានមកពីថវិកាឧបត្ថម្ភរបស់សប្បុរសជនទូទាំងប្រទេស តាមរយៈលោក ប៉ី ប៊ុន ឌី និងក្រុមយុវជនជួរមុខ លោក តាំង គីមឡេង ជូនដល់ក្រុមគ្រួសារវីរកងទ័ពពលី លោកអនុសេនីយ៍ត្រី ថន ញ៉ាញ់ ដែលបានពលីជីវិតនៅសមរភូមិមុខភ្នំទ្រព្យ កាលពីថ្ងៃទី២៥ ខែកក្កដា ឆ្នាំ២០២៥ ដែលផ្ទះនេះ ត្រូវបានសាងសង់រួចរាល់ហើយនៅស្រុកកំណើតក្នុងឃុំសសរស្ដម្ភ ស្រុកពួក ខេត្តសៀមរាប។
លោក លី សារី អភិបាលរងខេត្ត មានប្រសាសន៍ដែរថា ការផ្តល់គេហដ្ឋានថ្មីនាពេលនេះ គឺជាការលើកទឹកចិត្ត និងការដឹងគុណយ៉ាងជ្រាលជ្រៅ ចំពោះវីរភាព និងការលះបង់ដ៏ធំធេងរបស់វីរជនពលី លោកអនុសេនីយ៍ត្រី ថន ញ៉ាញ់ ក្នុងបុព្វហេតុការពារជាតិ មាតុភូមិ។
ក្នុងឱកាសនោះដែរ ថ្នាក់ដឹកនាំខេត្ត ក៏បានផ្ដល់ជូននូវថវិកាមួយចំនួនដល់ក្រុមគ្រួសារវីរជនពលី រួមមាន៖ អ្នកឧកញ៉ាបណ្ឌិត សៀង ណាំ ចំនួន ២០០ដុល្លារ, ឯកឧត្តម ប្រាក់ សោភ័ណ អភិបាលខេត្ត ចំនួន ២លានរៀល និងលោកឧត្តមសេនីយ៍ទោ ហួត សុធី ស្នងការនគរបាលខេត្ត ចំនួន ១០០ដុល្លារផងដែរ៕
ប្រភព៖ រដ្ឋបាលខេត្តសៀមរាប
កែសម្រួល៖ លោក អ៊ុន ណារាជ្យ
