ក្រសួងទេសចរណ៍ សហការជាមួយរដ្ឋបាលខេត្តសៀមរាប បានបើកវគ្គបណ្ដុះបណ្ដាលគ្រូបង្គោលលើកទី១ ស្ដីពី «សេវាកម្មឧត្ដមភាព ការអភិវឌ្ឍន៍ជំនាញ និងនវានុវត្តន៍ទេសចរណ៍» សម្រាប់បណ្ដាប្រទេសមេគង្គ-ឡានឆាង ដែលមានប្រទេសកម្ពុជា ឡាវ និងចិន នៅខេត្តសៀមរាប នាថ្ងៃទី២៣ ខែតុលា ឆ្នាំ២០២៥នេះ។
លោក ង៉ូវ សេងកាក់ អភិបាលរងខេត្តសៀមរាប បានមានប្រសាសន៍ថា វគ្គបណ្ដុះបណ្ដាលនេះ គឺជាការរួបរួម និងការប្ដេជ្ញាចិត្តរួមគ្នារបស់បណ្ដាប្រទេសក្នុងតំបន់មេគង្គ។ ប្រធានបទដែលបានជ្រើសរើសនៃឧត្តមភាពសេវាកម្ម ការអភិវឌ្ឍន៍ជំនាញ និងការច្នៃប្រឌិតទេសចរណ៍ គឺជាគោលការណ៍គ្រឹះដែលនឹងដឹកនាំកិច្ចខិតខំប្រឹងប្រែងរួមគ្នា ដើម្បីធ្វើឱ្យទេសចរណ៍កាន់តែរីកចម្រើន និងនិរន្តរភាពក្នុងយុគសម័យថ្មី។
លោកបានសង្កត់ធ្ងន់ថា គោលបំណង គឺមិនត្រឹមតែដើម្បីទាក់ទាញអ្នកទស្សនាប៉ុណ្ណោះទេ ប៉ុន្តែថែមទាំងលើកទឹកចិត្តពួកគេឱ្យត្រលប់មកវិញ និងចែករំលែកបទពិសោធន៍ដ៏អស្ចារ្យរបស់ពួកគេជាមួយអ្នកដទៃ។ ការវិនិយោគលើការបណ្ដុះបណ្ដាល គឺជាការវិនិយោគនាពេលអនាគតដ៏ជោគជ័យ។ តាមរយៈការប្រើប្រាស់បច្ចេកវិទ្យា និងការច្នៃប្រឌិត យើងអាចបង្កើតឱកាសទេសចរណ៍ និងគំនិតផ្តួចផ្តើមថ្មីៗ ដែលទាក់ទាញអ្នកធ្វើដំណើរសម័យទំនើប។
លោកបានបញ្ជាក់ថា ខេត្តសៀមរាប ជាគោលដៅទេសចរណ៍ដ៏លេចធ្លោមួយក្នុងប្រទេសកម្ពុជា មិនត្រឹមតែល្បីល្បាញខាងសម្បត្តិវប្បធម៌អង្គរដ៏សម្បូរបែបប៉ុណ្ណោះទេ ថែមទាំងជាមជ្ឈមណ្ឌលដ៏សំខាន់សម្រាប់កិច្ចសហការ និងការអប់រំក្នុងតំបន់ផងដែរ។ វគ្គបណ្តុះបណ្តាលនេះក៏ជា “យន្តការសម្រាប់ការផ្លាស់ប្តូរវេទិកា” ដែលអាចឱ្យប្រទេសសមាជិកចែករំលែកចំណេះដឹងសំខាន់ៗ បណ្តុះភាពជាដៃគូប្រកបដោយអត្ថន័យ និងសហការដោះស្រាយបញ្ហាប្រឈមរួមគ្នា។
ឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ បានថ្លែងថា វិស័យទេសចរណ៍នៅតែជាវិស័យមានថាមពល និងផ្លាស់ប្តូរច្រើនបំផុតនៃសេដ្ឋកិច្ច ដោយវាបង្កើតការងារ គាំទ្រសហគ្រាសក្នុងស្រុក ជំរុញការយល់ដឹងអំពីវប្បធម៌ និងរួមចំណែកយ៉ាងសំខាន់ដល់ការអភិវឌ្ឍន៍ប្រកបដោយចីរភាព។ នៅក្នុងតំបន់មេគង្គ-ឡានឆាង ទេសចរណ៍បានបម្រើជាស្ពានដែលតភ្ជាប់ប្រជាជន វប្បធម៌ និងសហគមន៍។ នៅកម្ពុជា វិស័យទេសចរណ៍ត្រូវបានទទួលស្គាល់ថា ជាវិស័យអាទិភាពដ៏សំខាន់មួយ ក្រោមយុទ្ធសាស្ត្រមន្ទីរបញ្ចកោណដំណាក់កាលទី១ របស់រាជរដ្ឋាភិបាល ដែលផ្តោតសំខាន់លើការអភិវឌ្ឍន៍វិស័យទេសចរណ៍ប្រកបដោយនិរន្តរភាព មានតម្លៃបន្ថែមខ្ពស់ សុវត្ថិភាព និងការប្រកួតប្រជែង។
ឯកឧត្តមបន្ថែមថា ចក្ខុវិស័យនេះ គឺស្របទាំងស្រុងជាមួយនឹងគោលបំណងនៃកិច្ចសហប្រតិបត្តិការមេគង្គ-ឡានឆាង ដែលលើកទឹកចិត្តឱ្យប្រទេសសមាជិកចែករំលែកជំនាញ តម្រឹមយុទ្ធសាស្ត្រក្នុងតំបន់ និងជំរុញវិបុលភាពទៅវិញទៅមកតាមរយៈការសហការ និងការច្នៃប្រឌិត៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
