ថ្លែងបើកសិក្ខាសាលាតម្រង់ទិស ស្តីអំពីការប្រើប្រាស់កញ្ចប់ឧបករណ៍យុទ្ធនាការលើកកម្ពស់សម្ភារគាំពារ និងអភិវឌ្ឍន៍កុមារតូច នៅថ្ងៃទី២៣ ខែតុលា ឆ្នាំ២០២៥ លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់ស្ត្រី និងកុមារខេត្តសៀមរាប បានធ្វើការជំរុញដល់គ្រប់ភាគីពាក់ព័ន្ធទាំងអស់ ត្រូវខិតខំធ្វើយ៉ាងណា ជំរុញដល់កិច្ចគាំពារកុមារនៅតាមទីជនបទបន្ថែមទៀត។
លោកជំទាវ ស៊ិន ណម បានលើកឡើងថា ដោយការគិតគូរពីរាជរដ្ឋាភិបាលចំពោះកុមារតូច រដ្ឋបាលខេត្តសៀមរាប បានបង្កើតឲ្យមានសាលាមតេ្តយ្យសហគមន៍ជាច្រើន ដែលនេះជាការផ្តល់នូវការគាំពារដល់កុមារលើផ្នែកអប់រំ។ ជាមួយគ្នានេះ គណៈកម្មាធិការក៏បានធ្វើការជំរុញ លើការគិតគូរអំពីអាហារូបត្ថម្ភរបស់ស្ត្រីជាមាតា និងកុមារផងដែរ។
លោកជំទាវថា កុមារនៅទីជនបទមួយចំនួន ដោយសារកត្តាជីវភាពគ្រួសារ ពួកគាត់មិនបានរៀនសូត្រ ខ្វះទាំងអាហារូបត្ថម្ភ ដូច្នេះយើងទាំងអស់គ្នាដែលជាអ្នកពាក់ព័ន្ធត្រូវខិតខំជំរុញយ៉ាងណាឲ្យកិច្ចគាំពារកុមារនេះ បានទៅដល់កុមារនៅទីជនបទ ដោយធ្វើយ៉ាងណាកាត់បន្ថយអត្រាបោះបង់ការសិក្សា ជួយដល់ពួកគេបានរៀនយ៉ាងហោចណាស់ត្រឹមថ្នាក់ទី៩ដែរ។
យោងតាមក្រសួងអប់រំ យុវជន និងកីឡា អត្រាបោះបង់ការសិក្សារបស់សិស្សានុសិស្ស នៅមានកម្រឹតខ្ពស់នៅឡើយ ខណៈអត្រាចុះឈ្មោះចូលរៀនរបស់កុមារនៅមានកម្រិតទាប។ របាយការណ៍បានឱ្យដឹងថា នៅឆ្នាំ២០២៤ សិស្សអនុវិទ្យាល័យ ១៥ភាគរយបានបោះបង់ការសិក្សា ខណៈដែលមានតែ ៤៣ភាគរយនៃកុមារដែលមានអាយុពី ៣ទៅ៥ឆ្នាំប៉ុណ្ណោះ ដែលបានចុះឈ្មោះចូលរៀននៅមតេ្តយ្យ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
