វិវាទដ៏រ៉ាំរ៉ៃអស់រយៈពេលជាង ៣០ ឆ្នាំ រវាងបងប្អូនប្រជាពលរដ្ឋរស់នៅភូមិវត្តបូណ៌ សង្កាត់សាលាកំរើក ក្រុងសៀមរាប ត្រូវបានដោះស្រាយបញ្ចប់ដោយរលូន និងជោគជ័យ ក្រោមការដឹកនាំសម្របសម្រួលដោយផ្ទាល់ពីសំណាក់ ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប នៅថ្ងៃទី២៣ ខែតុលា ឆ្នាំ២០២៥នេះ។
ក្នុងឱកាសនោះ ឯកឧត្តម ប្រាក់ សោភ័ណ បានសូមធ្វើការយោគយល់ចំពោះបញ្ហារបស់បងប្អូនប្រជាពលរដ្ឋដែលបានអូសបន្លាយអស់ពេលជាង ៣០ឆ្នាំមកនេះ។ ការដោះស្រាយបញ្ចប់វិវាទនេះ គឺដោយឈរលើមូលដ្ឋាននៃគោលនយោបាយឈ្នះ-ឈ្នះ និងមានការចូលរួមដោយស្ម័គ្រចិត្តពីបងប្អូនប្រជាពលរដ្ឋទាំងសងខាង ទើបយើងអាចអាចរកបាននូវចំណុចកណ្ដាល ហើយត្រូវបានដោះស្រាយបញ្ចប់ដោយរលូន និងជោគជ័យ។
ឯកឧត្តមអភិបាលខេត្ត បានថ្លែងអំណរគុណដល់គូវិវាទទាំងពីរដែលបានយល់ព្រម និងស្ម័គ្រចិត្តទទួលយកសំណងទាំងសងខាង ដើម្បីបញ្ចប់វិវាទដ៏រ៉ាំរ៉ៃមួយនេះដោយសន្តិវិធី តាមគោលការណ៍ស្ម័គ្រចិត្ត។
អ្នកស្រី ង៉ាន សុខខេង តំណាងប្រជាពលរដ្ឋបានថ្លែងអំណរគុណយ៉ាងជ្រាលជ្រៅបំផុត ចំពោះសម្តេចធិបតី នាយករដ្ឋមន្ត្រី និង ឯកឧត្តម ប្រាក់ សោភ័ណ អភិបាលខេត្ត រួមទាំង សម្តេចព្រះព្រហ្មរតនមុនី ពិន សែម សិរីសុវណ្ណោ លោក នួន ពុទ្ធារ៉ា អភិបាលក្រុងសៀមរាប និងលោកចៅសង្កាត់ ដែលបានគិតគូរខ្ពស់ចំពោះសុខទុក្ខរបស់ពួកគាត់ ដោយបានចុះមកសម្របសម្រួលផ្ទាល់ជាមួយគូភាគីរហូតទទួលបានជោគជ័យ ក្នុងបរិយាកាសសោមនស្សរីករាយ។
អ្នកស្រី ង៉ាន សុខខេង ក៏បានសម្តែងការកោតសរសើរចំពោះដំណោះស្រាយមនុស្សធម៌ដែលបានផ្តល់ជូននូវដីមួយឡូតិ៍ ថវិកាមួយចំនួនសម្រាប់ទ្រទ្រង់ជីវភាពគ្រួសារ និងសាងសង់ផ្ទះ ព្រមទាំងការជួលផ្ទះរយៈពេល ៦ខែ សម្រាប់បន្តការលក់ដូររហូតដល់ផ្ទះបានសាងសង់រួចរាល់ផងដែរ៕
អត្ថបទ និងរូបភាព៖ លោក អ៊ុន ណារាជ្យ
