អាជ្ញាធរស្រុកវ៉ារិន ខេត្តសៀមរាប បានបង្ហាញការប្ដេជ្ញាចិត្តខ្ពស់ក្នុងការចូលរួមយ៉ាងសកម្មក្នុងយុទ្ធនាការ «និយាយថាទេចំពោះព័ត៌មានក្លែងក្លាយ – Say No to Fake News» ដើម្បីជំរុញឱ្យប្រជាពលរដ្ឋទទួលបាន និងផ្សព្វផ្សាយតែព័ត៌មានពិតប្រាកដ។
ការប្ដេជ្ញាចិត្តនេះធ្វើឡើងក្នុងឱកាសដែលមន្ទីរព័ត៌មានខេត្តសៀមរាប បានបន្តយុទ្ធនាការនេះនៅគោលដៅទី៨ ក្នុងស្រុកវ៉ារិន កាលពីថ្ងៃទី២២ ខែតុលា ឆ្នាំ២០២៥ ក្នុងគោលដៅអប់រំ និងផ្សព្វផ្សាយដល់ប្រជាពលរដ្ឋឱ្យយល់ដឹងពីផលប៉ះពាល់ធ្ងន់ធ្ងរនៃព័ត៌មានក្លែងក្លាយ វិធីសម្គាល់ប្រភពព័ត៌មានមិនពិត និងជំរុញការចូលរួមរបស់ពលរដ្ឋក្នុងការទប់ស្កាត់ព័ត៌មានក្លែងក្លាយ។
លោក ប៊ុត វិបុល អភិបាលរងស្រុកវ៉ារិន បានលើកឡើងថា យុទ្ធនាការនេះមានសារៈសំខាន់ណាស់ ដោយបានផ្ដល់នូវវិធីសាស្ត្រជាក់ស្ដែងដល់ប្រជាពលរដ្ឋក្នុងការផ្ទៀងផ្ទាត់ និងសម្គាល់ប្រភពព័ត៌មានមិនពិត។ លោកអភិបាលរងក៏បានអំពាវនាវដល់អាជ្ញាធរមូលដ្ឋាន និងប្រជាពលរដ្ឋទាំងអស់ ត្រូវរួមគ្នា «មិនបង្កើត មិនផ្សព្វផ្សាយ និងមិនចែករំលែក» នូវព័ត៌មានមិនពិត។ ផ្ទុយទៅវិញ ត្រូវផ្តោតលើការផ្សព្វផ្សាយតែព័ត៌មានពិត ត្រឹមត្រូវ និងច្បាស់លាស់ ដើម្បីធានាបាននូវសណ្ដាប់ធ្នាប់ល្អ និងស្ថិរភាពក្នុងសហគមន៍។ លោកក៏បានជំរុញឱ្យអនុវត្តតាមការណែនាំរបស់ក្រសួងព័ត៌មាន ក្នុងការផ្ទៀងផ្ទាត់ព័ត៌មានដោយប្រុងប្រយ័ត្ន តាមរយៈការសាកសួររកប្រភពដើម ការផ្ទៀងផ្ទាត់ជាមួយប្រភពទីពីរ និងការវិភាគខ្លឹមសារដោយមិនប្រើអារម្មណ៍ផ្ទាល់ខ្លួន។
លោក យឿន ចាន់ អនុប្រធានមន្ទីរព័ត៌មានទទួលបន្ទុករួម បានបញ្ជាក់ថា យុទ្ធនាការ «និយាយថាទេចំពោះព័ត៌មានក្លែងក្លាយ» គឺមានគោលដៅធានាសុវត្ថិភាពក្នុងការប្រើប្រាស់ព័ត៌មាន និងពង្រឹងសន្តិសុខព័ត៌មានសម្រាប់សាធារណជន។ លោកបានគូសបញ្ជាក់ថា ក្រសួងព័ត៌មានផ្ដោតលើចំណុចស្នូលបីគឺ៖ ធានាសិទ្ធិក្នុងការទទួលព័ត៌មានរបស់ប្រជាពលរដ្ឋ, ធានាគុណភាពព័ត៌មាន, និង ធានាសុវត្ថិភាពព័ត៌មានសម្រាប់ប្រជាជនប្រើប្រាស់ ដែលកិច្ចការទាំងនេះរួមចំណែករក្សាសណ្ដាប់ធ្នាប់ និងស្ថិរភាពសង្គម។
លោក យឿន ចាន់ បានបន្ថែមថា ព័ត៌មានក្លែងក្លាយបានបង្កផលប៉ះពាល់យ៉ាងធ្ងន់ធ្ងរ ដោយបំផ្លាញទំនុកចិត្តរបស់ប្រជាជនចំពោះអាជ្ញាធរ ក្រសួង និងស្ថាប័នពាក់ព័ន្ធ ព្រមទាំងធ្វើឱ្យសាធារណជនមានការសង្ស័យ ព្រួយបារម្ភ និងយល់ច្រឡំ។ ដូចនេះ ដើម្បីលុបបំបាត់ព័ត៌មានក្លែងក្លាយ និងផ្ដល់សុវត្ថិភាពព័ត៌មានសម្រាប់ការសម្រេចចិត្ត គឺពលរដ្ឋគ្រប់រូបត្រូវចៀសវាងការបង្កើត ការផ្សព្វផ្សាយ និងការចែករំលែកព័ត៌មានក្លែងក្លាយ ហើយយកចិត្តទុកដាក់ផ្សព្វផ្សាយតែព័ត៌មានពិត ត្រឹមត្រូវ និងមានប្រភពច្បាស់លាស់៕
អត្ថបទ និងរូបភាព ៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
