នារសៀលថ្ងៃទី២២ ខែតុលា ឆ្នាំ២០២៥ ក្រុមគ្រួសារបងប្អូនកងទ័ពដែលកំពុងបំពេញភារកិច្ចការពារព្រំដែន កម្ពុជា-ថៃ ចំនួន ១៥គ្រួសារ នៅសង្កាត់ស្រង៉ែ ក្រុងសៀមរាប បានទទួលអំណោយជាគ្រឿងឧបភោគបរិភោគ និងថវិកា ពីសម្ព័ន្ធយុវជនស្រឡាញ់សន្តិភាពខេត្តសៀមរាប ដោយក្នុងមួយគ្រួសារទទួលបាន៖ អង្ករ ១០គីឡូក្រាម, ទឹកសុទ្ធ ១ យួរ, ទឹកត្រី ១ ដប និងថវិកា ៥ម៉ឺនរៀល។
លោក ទែន រតនា ប្រធានប្រតិបត្តិសម្ព័ន្ធយុវជនស្រឡាញ់សន្ដិភាពខេត្ត មានប្រសាសន៍ថា ការផ្ដល់អំណោយជូនក្រុមគ្រួសារបងប្អូនកងទ័ពនាពេលនវនេះ គឺក្នុងស្មារតី “ខ្មែរស្រលាញ់ខ្មែរ ខ្មែរជួយខ្មែរ ក្នុងគ្រាលំបាក” ដើម្បីជួយសម្រួលដោះស្រាយជីវភាពគ្រួសារប្រចាំថ្ងៃរបស់បងប្អូនបានមួយកម្រិត។
ក្នុងនាមក្រុមការងារសម្ព័ន្ធយុវជនស្រឡាញ់សន្ដិភាពខេត្តសៀមរាប លោកសូមការកោតសរសើរ និងវាយតម្លៃខ្ពស់ ចំពោះស្វាមីរបស់បងប្អូនជាកងទ័ព ដែលបានលះបង់កម្លាំងកាយ កម្លាំងចិត្ត យ៉ាងអង់អាចក្លាហាន ក្នុងការការពារទឹកដី ជាតិ និងមាតុភូមិ ពីការឈ្លានពានរបស់ប្រទេសជិតខាង។ លោកក៏បានសំណូមពរដល់បងប្អូនទាំងអស់ សូមបន្តជឿជាក់លើរាជរដ្ឋាភិបាលកម្ពុជាយើង ក្នុងការដោះស្រាយបញ្ហាជម្លោះព្រំដែនកម្ពុជា-ថៃ។
ជាមួយគ្នានេះ ក្រុមគ្រួសារបងប្អូនកងទ័ពទាំង ១៥គ្រួសារ បានថ្លែងអំណរគុណ ចំពោះសម្ព័ន្ធយុវជនស្រឡាញ់សន្តិភាពខេត្តសៀមរាប និងធ្វើសប្បុរសជនជាច្រើនទៀត ដែលជានិច្ចកាលតែងតែយកចិត្តទុកដាក់ខ្ពស់ ចំពោះសុខទុក្ខរបស់បងប្អូនប្រជាពលរដ្ឋដែលមានជីវភាពខ្វះខាត៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
