នៅថ្ងៃទី២១ ខែតុលា ឆ្នាំ២០២៥ រដ្ឋបាលខេត្តសៀមរាប បានបើកកិច្ចប្រជុំគណៈកម្មការសម្របសម្រួលរួម (JCC) លើកទី១ នៃគម្រោងអនុវត្តវិធីសាស្ត្រទីក្រុងឆ្លាតវៃ ដើម្បីដោះស្រាយបញ្ហាទីក្រុងក្នុងខេត្តសៀមរាប ដំណាក់កាលទី២ ដែលគ្រោងនឹងអនុវត្តបន្តពីខែកញ្ញា ឆ្នាំ២០២៥ រហូតដល់ខែសីហា ឆ្នាំ២០២៨ ដោយមានការបន្តគាំទ្រពីទីភ្នាក់ងារសហប្រតិបត្តិការអន្តរជាតិជប៉ុន (JICA)។
ឯកឧត្តម ប្រាក់ សោភ័ណ អភិបាលខេត្តសៀមរាប បានគូសបញ្ជាក់ពីលទ្ធផលផ្លែផ្ការបស់ដំណាក់កាលទី១ ដែលបានបញ្ចប់កាលពីខែឧសភា ឆ្នាំ២០២៥។ នៅក្នុងដំណាក់កាលទី១ JICA បានជួយរៀបចំ “ផែនទីបង្ហាញផ្លូវ” សម្រាប់រៀបចំក្រុងសៀមរាបជាទីក្រុងឆ្លាតវៃ ចក្ខុវិស័យឆ្នាំ២០២៣-២០៣៥ ដែលត្រូវបានដាក់ឱ្យប្រើប្រាស់ជាផ្លូវការក្នុងខែមីនា ឆ្នាំ២០២៣។ ក្នុងដំណាក់កាលនោះ រដ្ឋបាលខេត្តក៏បានសហការអនុវត្តគម្រោងសាកល្បងចំនួន ៨ ក្នុងនោះ ៦ គម្រោងបាននឹងកំពុងអនុវត្តជាគម្រោងពេញលេញ។
ឯកឧត្តមអភិបាលខេត្ត បានបន្តថា រដ្ឋបាលខេត្តបានបង្កើតនូវយន្តការថ្មីដើម្បីជំរុញការអនុវត្តផែនទីចង្អុលផ្លូវ និងបានលើកឡើងថា គម្រោងទីក្រុងឆ្លាតវៃខេត្តសៀមរាបនេះ នឹងក្លាយជាគំរូមួយសម្រាប់រាជធានី-ខេត្តចំនួន ៣ ផ្សេងទៀត។ ឯកឧត្តមក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាពលរដ្ឋជប៉ុន ដែលបានបន្តគាំទ្រគម្រោងដំណាក់កាលទី២ រយៈពេល ៣ ឆ្នាំនេះ។
លោកស្រី មីយូរ៉ា យូស៊ិកុ តំណាងជាន់ខ្ពស់ការិយាល័យ JICA ប្រចាំនៅកម្ពុជា បានបង្ហាញថា សមិទ្ធផលសំខាន់ៗនៃដំណាក់កាលទី១ នៃគម្រោងទីក្រុងឆ្លាតវៃ រួមមាន៖ ការបង្កើតលេខាធិការដ្ឋានដែលមានធនធានជាក់លាក់, កិច្ចសហប្រតិបត្តិការរវាង ឯកជន-រដ្ឋ-អប់រំ, ការអនុវត្តគម្រោងសាកល្បងទាំង ៨ ដោយប្រើបច្ចេកវិទ្យាឆ្លាតវៃផ្ដោតលើការដោះស្រាយបញ្ហាទីក្រុង, និងការបង្កើតផែនទីបង្ហាញផ្លូវ ដែលជាមូលដ្ឋានគ្រឹះដ៏រឹងមាំក្នុងការអភិវឌ្ឍទីក្រុងឆ្លាតវៃ និងបង្កើតមូលដ្ឋានគ្រឹះសម្រាប់ក្រុងសៀមរាបជាទីក្រុងឆ្លាតគំរូមួយ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
