អង្គការអភិវឌ្ឍន៍ហូឡង់ (SNV) សហការជាមួយរដ្ឋបាលខេត្តសៀមរាប នៅថ្ងៃទី២២ ខែតុលា ឆ្នាំ២០២៥ បានរៀបចំពិធីបើកសន្និបាតថាមពលឆ្នាំ២០២៥ ដើម្បីអបអរសាទរខួប ២០ឆ្នាំនៃភ្នាក់ងារអភិវឌ្ឍន៍ថាមពល (EnDev) និងការងារលើវិស័យចម្អិនស្អាតនៅកម្ពុជា និងឡាវ ដោយមានការចូលរួមពីតំណាងក្រសួងសុខាភិបាល មន្ទីររ៉ែ និងថាមពលមកពីខេត្តពោធិ៍សាត់ បាត់ដំបង សៀមរាប កំពង់ស្ពឺ និងខេត្តកំពត ជនបង្គោល និងដៃគូពាក់ព័ន្ធជាច្រើនរូប។
លោក ឌី រ៉ាដូ អភិបាលរងខេត្តសៀមរាប មានប្រសាសន៍ថា តាមរយៈកិច្ចសហការល្អរវាងអង្គការអភិវឌ្ឍន៍ហូឡង់ និងអាជ្ញាធរស្រុក-ឃុំ គម្រោងអនាម័យដើម្បីបញ្ឈប់ការបន្ទោបង់ពាសវាលពាសកាល តាំងពីឆ្នាំ២០១៧ បានសម្រេចលទ្ធផលល្អប្រសើរ។ ក្រោយចប់គម្រោងនេះ អាជ្ញាធរស្រុក-ឃុំ បានសម្រេចទទួលយកគម្រោង «ភូមិគ្មានផ្សែង» (SFV) មកអនុវត្តបន្តនៅស្រុកពួក ដើម្បីឆ្លើយតបនឹងតម្រូវការ និងអត្ថប្រយោជន៍នៃគម្រោង ក្នុងការលើកកម្ពស់ចំណេះដឹងរបស់ប្រជាពលរដ្ឋ និងផ្លាស់ប្ដូរឥរិយាបថឆ្ពោះទៅរកការចម្អិនគ្មានផ្សែង ដើម្បីលើកកម្ពស់សុខភាព បរិស្ថាន និងស្ថានភាពយេនឌ័រនៅក្នុងសហគមន៍។ គម្រោងទាំងពីរនេះ បានជួយដល់គ្រួសារក្នុងភូមិគោលដៅ ឱ្យងាកមកប្រើប្រាស់ប្រភពថាមពលស្អាត ដូចជា ចង្ក្រានអគ្គិសនី ហ្គាស ចង្ក្រានបរិស្ថាន (សូឡា) និងឡជីវឧស្ម័ន សម្រាប់ចម្អិនអាហារ។
លោក ប៉ាស្ទៀន ទើន ប្រធានផ្នែកថាមពលនៃអង្គការអភិវឌ្ឍន៍ហូឡង់ បានថ្លែងឱ្យដឹងថា ការបំពុលខ្យល់ក្នុងផ្ទះ គឺជាហានិភ័យផ្នែកសុខភាពដ៏ធំបំផុតមួយនៅកម្ពុជា ខណៈពេលដែលថាមពលចម្អិនអាហារស្ថិតនៅក្រោមវិស័យថាមពល ក៏វាប៉ះពាល់ដល់ទិដ្ឋភាពជាច្រើននៃសង្គម រួមទាំងយេនឌ័រ សុខភាព និងការអប់រំ។
ជាការឆ្លើយតប ឯកឧត្តម ប៉ោ និមល អនុរដ្ឋលេខាធិការក្រសួងរ៉ែ និងថាមពល បានមានប្រសាសន៍ថា ការចម្អិនស្អាតដោយប្រើប្រាស់ឥន្ធនៈ ឬថាមពលកកើតឡើងវិញ និងថាមពលអគ្គិសនី ចូលរួមចំណែកយ៉ាងសំខាន់ក្នុងការបង្កើនប្រសិទ្ធភាពនៃការប្រើប្រាស់ថាមពល ដែលពាក់ព័ន្ធនឹងបម្រែបម្រួលអាកាសធាតុ បញ្ហាបរិស្ថាន ការកាត់បន្ថយការកាប់បំផ្លាញព្រៃឈើ និងការបញ្ចេញផ្សែងពុលក្នុងបរិយាកាស។
ឯកឧត្តម ក៏បានថ្លែងអំណរគុណ និងកោតសរសើរចំពោះការខិតខំប្រឹងប្រែងរបស់ស្ថាប័នពាក់ព័ន្ធរួមមាន ស្ថាប័នរដ្ឋាភិបាល ម្ចាស់ជំនួយ ដៃគូអភិវឌ្ឍន៍ SNV អាជ្ញាធរមូលដ្ឋាន និងវិស័យឯកជន ដែលបានរួមចំណែកយ៉ាងសំខាន់ក្នុងការអភិវឌ្ឍន៍វិស័យចម្អិនស្អាតនៅកម្ពុជា ប្រកបដោយនិរន្តរភាព ជាពិសេសការលើកកម្ពស់ចំណេះដឹងប្រជាពលរដ្ឋនៅតាមជនបទ ឱ្យបានយល់ដឹងពីសារប្រយោជន៍នៃការចម្អិនស្អាត ការផ្លាស់ប្តូរឥរិយាបថពីការចម្អិនតាមបែបប្រពៃណីមកប្រើប្រាស់ចង្ក្រាន ឬឧបករណ៍ចម្អិនដែលប្រើប្រាស់អគ្គិសនី និងឡជីវឧស្ម័ន រួមគ្នាលើកកម្ពស់អាជីវកម្មនៅក្នុងសហគមន៍ប្រកបដោយភាពច្នៃប្រឌិត និងការទទួលខុសត្រូវ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
