ក្នុងឱកាសដឹកនាំកិច្ចប្រជុំបូកសរុបលទ្ធផលការងាររយៈពេល ៩ខែ ឆ្នាំ២០២៥ និងទិសដៅអនុវត្តបន្តរបស់មន្ទីរព័ត៌មានខេត្តសៀមរាប នាថ្ងៃទី២១ ខែតុលា ឆ្នាំ២០២៥នេះ
ឯកឧត្តម កៅ អ៊ីមរ៉ន រដ្ឋលេខាធិការក្រសួងព័ត៌មាន ទទួលបន្ទុកមន្ទីរព័ត៌មានខេត្តសៀមរាប បានណែនាំដល់ថ្នាក់ដឹកនាំ និងមន្ត្រីនៃមន្ទីរព័ត៌មាន ត្រូវបង្កើនសកម្មភាពការងារបន្ថែមទៀត ដើម្បីលើកកម្ពស់ប្រសិទ្ធភាព និងប្រសិទ្ធផលការងារឱ្យកាន់តែល្អប្រសើរ។
ឯកឧត្តម កៅ អ៊ីមរ៉ន បានកោតសរសើរចំពោះកិច្ចខិតខំប្រឹងប្រែងបំពេញតួនាទីភារកិច្ចរបស់ថ្នាក់ដឹកនាំ និងមន្ត្រីរាជការ នៃមន្ទីរព័ត៌មាន ដែលសម្រេចបានលទ្ធផលល្អប្រសើរ។ ឯកឧត្តមបានសង្កត់ធ្ងន់ថា ទោះជាលទ្ធផលការងារល្អយ៉ាងណាក្ដី ដើម្បីរក្សា និងបន្តប្រសិទ្ធភាពការងារខ្ពស់ តម្រូវឱ្យថ្នាក់ដឹកនាំ និងមន្ត្រីក្រោមឱវាទមន្ទីរ បន្តរក្សាខ្ជាប់នូវ សាមគ្គីភាព បង្កើន ភាពជិតស្និទ្ធ និង សហការគ្នាស្អិតរមួត។ លើសពីនេះ ត្រូវពង្រឹងទំនាក់ទំនងល្អជាមួយគ្រប់អង្គភាព និងមន្ទីរផ្សេងៗ ក្នុងនាមមន្ទីរព័ត៌មានជាសេនាធិការឱ្យរដ្ឋបាលខេត្ត និងគណៈបញ្ជាការឯកភាពរដ្ឋបាលខេត្ត។
ឯកឧត្តមរដ្ឋលេខាធិការបានបញ្ជាក់បន្ថែមថា ដើម្បីទទួលបានលទ្ធផលល្អ ថ្នាក់ដឹកនាំគប្បីត្រូវមាន ផែនការសកម្មភាព សម្រាប់ជាត្រីវិស័យអនុវត្តការងារប្រចាំថ្ងៃ ហើយមន្ត្រីទាំងអស់ត្រូវគោរព និងអនុវត្តឱ្យមានប្រសិទ្ធភាពទៅតាមផ្នែក និងជំនាញរៀងៗខ្លួន។ មន្ត្រីទាំងអស់ត្រូវឈរលើ អភិក្រមទាំង ៥ របស់សម្ដេចតេជោសែន រួមមាន៖ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។ ឯកឧត្តម ក៏បានណែនាំដល់ថ្នាក់ដឹកនាំ និងមន្ត្រីក្រោមឱវាទ រួមគ្នាថែរក្សា សោភ័ណភាព អនាម័យ និងបរិស្ថាន ក្នុងមន្ទីរជាប្រចាំ ដើម្បីត្រៀមចូលរួមប្រកួតយកពានរង្វាន់ក្រសួងព័ត៌មាន ដែលគ្រោងនឹងរៀបចំក្នុងពេលខាងមុខ ដោយមានការចូលរួមប្រកួតប្រជែងពីមន្ទីរព័ត៌មានទាំង ២៥ រាជធានី-ខេត្ត។
បើតាម លោក យឿន ចាន់ អនុប្រធានមន្ទីរទទួលបន្ទុករួម បានបង្ហាញថា ក្នុងរយៈពេល ៩ខែ ឆ្នាំ២០២៥ មន្ទីរព័ត៌មានខេត្តសៀមរាប បានចុះយកព័ត៌មានសរុបចំនួន ១ ៧៣៣ លើក និងផលិតព័ត៌មានបានចំនួន ១២ ៤០៤ អត្ថបទ។ ការងារផ្សព្វផ្សាយត្រូវបានអនុវត្តសរុបចំនួន ៩១ ៥១៤ លើក ក្នុងនោះការផ្សព្វផ្សាយព័ត៌មានមានចំនួន ៧៥ ៤១៨ អត្ថបទ/លើក។ សម្រាប់ទិសដៅបន្ត មន្ទីរព័ត៌មានខេត្តសៀមរាប គ្រោងនឹងពង្រីកវិទ្យុបណ្ដាញ តាមដងស្ទឹង និងភ្លើងស្តុប ព្រមទាំងបង្កើនការ បណ្ដុះបណ្ដាល ដល់មន្ត្រីជំនាញ ដើម្បីពង្រឹងធនធានមនុស្ស និងអ្នកបន្តវេន៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
