ក្នុងកិច្ចប្រជុំពិភាក្សាលើកិច្ចសហប្រតិបត្តិការរវាងអង្គការសម្ព័ន្ធភាពដើម្បីអភិរក្សធនធានជលផល(Fact) ជាមួយមន្ទីរអង្គភាពពាក់ព័ន្ធនៅតំបន់បឹងពារាំង ក្រុងសៀមរាប កាលពីថ្ងៃទី២០ ខែតុលា ឆ្នាំ២០២៥ លោក អ៉ឹង គឹមលាង អភិបាលរងខេត្តសៀមរាប បានថ្លែងនូវការគាំទ្រចំពោះគំនិតផ្ដួចផ្ដើមបង្កើតក្រុមការងារមួយដើម្បីជួយដល់កិច្ចការងារអភិរក្សនិងអភិវឌ្ឍន៍នៅតំបន់បឹងពារាំង ដែលជាទីតាំងអភិរក្សត្រីមេពូជដ៏មានសក្ដានុពលមួយនៅជាយក្រុងសៀមរាប។
លោក អ៉ឹង គឹមលាង បានជំរុញឱ្យមានការជួបប្រជុំគ្នាម្តងទៀតនៅមុនដំណាច់ឆ្នាំ២០២៥នេះ ដើម្បីពិនិត្យមើលអំពីសមាសភាពក្រុមការងារមួយដែលអាចជួយដល់សហគមន៍ចំនួន២ គឺសហគមន៍នេសាទចុងឃ្នៀស និងសហគមន៍ទេសចរណ៍ វប្បធម៌ធម្មជាតិបឹងពារាំង ដែលកំពុងតែជួយការពារនិងអាស្រ័យផលពីបឹងមួយនេះ។ លោកថា សក្ដានុពលរបស់បឹងពារាំង អាចទាញបានចំណូលជូនប្រជាសហគមន៍បានច្រើន ដែលអាចឲ្យពួកគាត់ទាញយកប្រយោជន៍នេះ ទៅធ្វើការអភិវឌ្ឍ និងអភិរក្សត្រីមេពូជដ៏សំបូរបែប។
សូមជម្រាបថា បឹងពារាំង គឺជាបឹងធម្មជាតិមួយដ៍ធំល្វឹងល្វើយមួយ ព័ទ្ធដោយព្រៃលិចទឹកក្រាស់ៗដែលជាអំណោយផលសម្រាប់ត្រីពូជពងកូន ហើយក្រៅពីនោះវាបានផ្តល់ជាជម្រកដល់ប្រភេទសត្វល្មូន ជាពិសេសបានផ្តល់ជាជម្រកសត្វស្លាបរាប់រយប្រភេទផងដែរ។បឹងធម្មជាតិមួយនេះ ក្រៅពីផ្តល់ជាជម្រកត្រីនិងសត្វក្នុងការរស់នៅបន្តពូជ វាក៏ជាតំបន់ទេសចរណ៍ដ៏ទាក់ទាញមួយផងដែរ ក្រៅពីប្រាង្គប្រាសាទបុរាណនិងរមណីយដ្ឋានផ្សេងៗ ត្បិតបឹងពារាំងអ្នកទេសចរអាចទស្សនាព្រៃលិចទឹក រួមទាំងសត្វស្លាបជាច្រើនប្រភេទផងដែរ។ បឹងនេះមានទីតាំងនៅផ្នែកខាងត្បូងសង្កាត់ជ្រាវ នៃក្រុងសៀមរាប ជាប់នឹងមាត់បឹងទន្លេសាប៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
