ក្រសួងការងារ និងបណ្តុះបណ្តាលវិជ្ជាជីវៈ បានបើកសិក្ខាសាលាពិគ្រោះយោបល់ថ្នាក់ជាតិ លើសេចក្ដីព្រាងគោលនយោបាយជាតិ ស្ដីពីមុខរបរនិងការងារ ឆ្នាំ២០២៦-២០៣៥ នៅថ្ងៃទី២១ ខែតុលា ឆ្នាំ២០២៥នេះ នៅខេត្តសៀមរាប ដើម្បីប្រមូលធាតុចូលសំខាន់ៗ និងធានាការបន្ស៊ីគ្នាជាមួយយុទ្ធសាស្ត្រជាតិ។
ឯកឧត្តម គួច សុមាន រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា សិក្ខាសាលានេះ រៀបចំឡើងក្នុងគោលបំណងដើម្បីបន្ស៊ី និងឆ្លើយតបទៅនឹងយុទ្ធសាស្ត្របញ្ចកោណ-ដំណាក់កាលទី១ កម្មវិធីនយោបាយជាតិនានារបស់រាជរដ្ឋាភិបាល នីតិកាលទី៧ នៃរដ្ឋសភា ផែនការយុទ្ធសាស្ត្រអភិវឌ្ឍន៍ជាតិ ២០២៤-២០២៨ ក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ២០១៦-២០៣០ ឯកសារអនុលោមភាពជាមួយស្ដង់ដារអន្តរជាតិ ព្រមទាំងធានាសង្គតិភាព និងភាពប្រទាក់ក្រឡាជាមួយក្របខ័ណ្ឌគោលនយោបាយថ្នាក់ជាតិ និងអនុវិស័យពាក់ព័ន្ធនានា។
ឯកឧត្តម គួច សុមាន មានប្រសាសន៍ទៀតថា ការកសាងទីផ្សារការងារមួយដែលមានបរិយាបន្ន និងភាពធន់នៃគោលនយោបាយ ២០២៦-២០៣៥ ផ្តោតសំខាន់លើការពង្រីកលទ្ធភាពទទួលបានការងារសមរម្យ សម្រាប់ប្រជាពលរដ្ឋទាំងអស់ រួមទាំងយុវជនដែលទើបបញ្ចប់ការសិក្សា ជនមានពិការភាព ស្ត្រី និងប្រជាពលរដ្ឋដែលកំពុងធ្វើការនៅក្នុងសេដ្ឋកិច្ចក្រៅប្រព័ន្ធ។ គោលនយោបាយនេះក៏នឹងកំណត់យន្តការដើម្បីកាត់បន្ថយគម្លាតជំនាញ រវាងការអប់រំ និងតម្រូវការទីផ្សារការងារជាក់ស្ដែង ព្រមទាំងពង្រឹងយន្តការគាំពារសង្គម និងសុវត្ថិភាពក្នុងការងារ ដើម្បីធានានូវជីវភាពសមរម្យ និងសេចក្ដីថ្លៃថ្នូររបស់កម្មករនិយោជិតទាំងអស់។
ឯកឧត្តមបានលើកទឹកចិត្តឲ្យគ្រប់ភាគីបន្តការខិតខំប្រឹងប្រែងរួមគ្នា ដើម្បីធានាថា គោលនយោបាយដែលនឹងត្រូវអនុម័តនេះនឹងក្លាយជាឯកសារយុទ្ធសាស្ត្រគន្លឹះ ដែលអាចជំរុញការបង្កើតការងារសមរម្យ ប្រកបដោយផលិតភាពខ្ពស់ និងរួមចំណែកដល់ការសម្រេចបាននូវចក្ខុវិស័យអភិវឌ្ឍន៍ប្រកបដោយចីរភាពរបស់ប្រទេសកម្ពុជា។
ឯកឧត្តមបានបន្ថែមថា សិក្ខាសាលានេះក៏ជាវេទិកាមួយដ៏សំខាន់ដើម្បីប្រមូលធាតុចូលសម្រាប់រៀបចំឯកសារគោលនយោបាយជាតិមុខរបរ និងការងារ ឆ្នាំ២០២៦-២០៣៥ ព្រមទាំងពង្រឹងការចូលរួម និងការយល់ដឹងពីភាគីពាក់ព័ន្ធ លើឯកសារសេចក្តីព្រាងគោលនយោបាយជាតិមុខរបរ និងការងារ ឆ្នាំ២០២៦-២០៣៥ ផងដែរ៕
អត្ថបទ និងរូបភាព៖ លោក ឡេង ពិសិដ្ឋ
កែសម្រួល៖ លោក អ៊ុន ណារាជ្យ
