នៅថ្ងៃទី២០ ខែតុលា ឆ្នាំ២០២៥ វិទ្យាស្ថានសេដ្ឋកិច្ចនិងហិរញ្ញវត្ថុ សហការជាមួយអគ្គនាយកដ្ឋានលទ្ធកម្មសាធារណៈ នៃក្រសួងសេដ្ឋកិច្ចនិងហិរញ្ញវត្ថុ បានរៀបចំវគ្គបណ្ដុះបណ្ដាល និងវិក្រឹតការស្ដីពីវិធាននិងបទប្បញ្ញត្តិស្តីពីលទ្ធកម្មសាធារណៈ នៅខេត្តសៀមរាប ក្នុងគោលដៅពង្រឹងសមត្ថភាពមន្ត្រីទទួលបន្ទុកកិច្ចលទ្ធកម្មសាធារណៈចំនួន ៩០នាក់ មកពីស្ថាប័នអនុវត្តលទ្ធកម្មរដ្ឋបាលក្រុងស្រុក នៃខេត្តសៀមរាប ឧត្តរមានជ័យ ព្រះវិហារ កំពង់ធំ និងខេត្តកំពង់ចាម។
លោក សំកុល សុចិត្រា អភិបាលរងខេត្តសៀមរាប បានលើកឡើងថា បើទោះជាមន្ត្រីលទ្ធកម្មបានខិតខំបំពេញការងារដោយការទទួលខុសត្រូវខ្ពស់កន្លងមក ក៏នៅមានចំណុចខ្វះខាត និងបញ្ហាប្រឈមក្នុងការអនុវត្តនីតិវិធី ជាពិសេសដោយសារការផ្លាស់ប្ដូររចនាសម្ព័ន្ធមន្ត្រី និងការបង្កើតក្រុងថ្មី ដូចជាក្រុងរុនតាឯកតេជោសែន។ ក្រុមការងារកសាងសមត្ថភាពរបស់ក្រសួងសេដ្ឋកិច្ច និងហិរញ្ញវត្ថុ នឹងបន្តបណ្ដុះបណ្ដាលមន្ត្រីរដ្ឋបាលខេត្ត ដើម្បីបង្កើនផលិតភាព និងប្រសិទ្ធភាពការងារ សំដៅរួមចំណែកអនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ធានាបាននូវប្រសិទ្ធភាព តម្លាភាព និងសង្គតិភាព នៃការគ្រប់គ្រងថវិការដ្ឋ។ ជាមួយគ្នានេះ លោកបានរំលេចពីប្រព័ន្ធ FMIS ជាឧបករណ៍សំខាន់សម្រាប់គាំទ្រការកែទម្រង់ និងក្លាយជាប្រព័ន្ធស្នូលក្នុងការគ្រប់គ្រងថវិការដ្ឋ។
ថ្លែងបើកវគ្គបណ្ដុះបណ្ដាល ឯកឧត្តម ពេជ្រ សម្បត្តិ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងពីសមិទ្ធផលគួរជាទីមោទនៈរបស់រាជរដ្ឋាភិបាលកម្ពុជា ក្នុងការស្ដារ និងអភិវឌ្ឍសង្គម-សេដ្ឋកិច្ចជាតិ ឈរលើមូលដ្ឋានសន្តិភាព ស្ថិរភាពនយោបាយ និងកំពុងជំរុញសន្ទុះសេដ្ឋកិច្ចរឹងមាំ ដើម្បីសម្រេចចក្ខុវិស័យ «ប្រែក្លាយកម្ពុជាទៅជាប្រទេសចំណូលខ្ពស់ នៅឆ្នាំ២០៥០»។ ក្រោមការដឹកនាំដ៏ឈ្លាសវៃរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី រាជរដ្ឋាភិបាលបានដាក់ចេញ «យុទ្ធសាស្ត្របញ្ចកោណ» ដំណាក់កាលទី១ ដែលផ្ដោតលើការធានាប្រសិទ្ធភាពសមិទ្ធកម្ម តាមរយៈអភិក្រម «ជវភាពនៃប្រព័ន្ធតួអង្គតែមួយ»។
ឯកឧត្តមបានបន្ថែមថា ការកែទម្រង់ការគ្រប់គ្រងហិរញ្ញវត្ថុសាធារណៈកំពុងស្ថិតក្នុងដំណាក់កាលទី៤ ដែលមានគោលដៅ គណនេយ្យភាពសមិទ្ធកម្ម ដោយមានការផ្ទេរសិទ្ធិអំណាច និងការទទួលខុសត្រូវកាន់តែច្រើនដល់រដ្ឋបាលថ្នាក់ក្រោមជាតិ ក្នុងការគ្រប់គ្រងថវិកា និងហិរញ្ញវត្ថុ។ ការណ៍នេះធ្វើឱ្យការងារកសាង និងអភិវឌ្ឍសមត្ថភាព កាន់តែមានសារៈសំខាន់ថែមទៀត។ ឯកឧត្តម ក៏បានរំលេចអំពីប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ (FMIS) ដែលត្រូវបានដាក់ឱ្យអនុវត្តនៅគ្រប់ក្រសួងស្ថាប័ន ដើម្បីជំរុញតម្លាភាព ប្រសិទ្ធភាព និងភាពត្រឹមត្រូវនៃទិន្នន័យហិរញ្ញវត្ថុ។ ប្រព័ន្ធ FMIS បានក្លាយជាប្រព័ន្ធស្នូលក្នុងការគ្រប់គ្រងចំណូល-ចំណាយ និងទ្រព្យសម្បត្តិរដ្ឋ ហើយមុខងារអនុវត្តកិច្ចលទ្ធកម្មសាធារណៈ ក៏ត្រូវបានដាក់បញ្ចូល និងកំពុងអនុវត្តក្នុងប្រព័ន្ធនេះផងដែរ។
ឯកឧត្តមបានសង្កត់ធ្ងន់ថា វគ្គបណ្ដុះបណ្ដាលនាពេលនេះ ពិតជាមានសារៈសំខាន់ និងឆ្លើយតបទៅនឹងតម្រូវការជាក់ស្ដែងរបស់ស្ថាប័នអនុវត្តលទ្ធកម្ម និងអង្គភាពថវិកាពាក់ព័ន្ធនឹងនីតិវិធីនៃការអនុវត្តកិច្ចលទ្ធកម្មសាធារណៈ ដែលជាមូលដ្ឋានគ្រឹះគាំទ្រការងារប្រចាំថ្ងៃឱ្យកាន់តែមានផលិតភាព និងប្រសិទ្ធភាពខ្ពស់ សំដៅសម្រេចបានជោគជ័យនូវការកែទម្រង់ការគ្រប់គ្រងហិរញ្ញវត្ថុសាធារណៈប្រកបដោយតម្លាភាព និងសង្គតិភាព៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
