ស្ថានីយច្រកទឹកពិសាថ្មីចំនួនពីរទីតាំង ដែលស្ថិតនៅមជ្ឈមណ្ឌលព័ត៌មានទេសចរណ៍ខេត្តសៀមរាប ត្រូវបានសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី១៩ ខែតុលា ឆ្នាំ២០២៥ ដែលស្ថានីយទាំងពីរនេះ នឹងផ្ដល់ជូនទឹកពិសាស្អាតដោយឥតគិតថ្លៃសម្រាប់ភ្ញៀវទេសចរ និងប្រជាពលរដ្ឋទូទៅ ដើម្បីលើកទឹកចិត្តឱ្យមានការប្រើប្រាស់ដបដែលអាចប្រើឡើងវិញបាន និងកាត់បន្ថយការពឹងផ្អែកលើដបជ័រប្រើតែម្ដងនៅទូទាំងទីក្រុងទេសចរណ៍ដ៏សំខាន់មួយនេះ។
លោក យុន លីនណេ អភិបាលរងខេត្ត បានបញ្ជាក់ថា ការដាក់ឱ្យដំណើរការស្ថានីយច្រកទឹកពិសានេះ ជាផ្នែកមួយនៃកិច្ចសហប្រតិបត្តិការដ៏សំខាន់រវាងអាជ្ញាធររដ្ឋ ដៃគូពីវិស័យឯកជន អង្គការមិនមែនរដ្ឋាភិបាល និងទីភ្នាក់ងារអភិវឌ្ឍន៍ ដើម្បីពង្រឹងការអនុវត្តទេសចរណ៍ប្រកបដោយចីរភាពនៅខេត្តសៀមរាប។
លោក យុន លីនណេ បានឱ្យដឹងថា ស្ថានីយច្រកទឹកពិសាដើរតួនាទីយ៉ាងសំខាន់ក្នុងការដោះស្រាយបញ្ហាធ្ងន់ធ្ងរនៃសំណល់ប្លាស្ទិក ដែលកើតចេញពីភ្ញៀវទេសចររាប់លាននាក់ជារៀងរាល់ឆ្នាំនៅខេត្តសៀមរាប។ តាមរយៈការផ្ដល់ជម្រើសងាយស្រួល និងជាមិត្តនឹងបរិស្ថាន ស្ថានីយទាំងនេះជួយកាត់បន្ថយការបំពុលដោយប្លាស្ទិក ដែលអាចគំរាមកំហែងដល់ទីតាំងបេតិកភណ្ឌវប្បធម៌ និងធម្មជាតិដ៏សម្បូរបែបរបស់កម្ពុជា។
លោកអភិបាលរងខេត្ត បន្ថែមថា គម្រោងនេះ ត្រូវបានអនុវត្តក្រោមឆត្រនៃគម្រោងលើកកម្ពស់ការគ្រប់គ្រងសំណល់រឹងក្រុងអាស៊ាន (AMUSE) ដែលចាត់ចែងដោយក្រសួងសហប្រតិបត្តិការសេដ្ឋកិច្ច និងអភិវឌ្ឍន៍សហព័ន្ធអាល្លឺម៉ង់ (BMZ) និងអនុវត្តដោយទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ) ក្នុងការសហការយ៉ាងជិតស្និទ្ធជាមួយក្រសួងបរិស្ថាន។ គម្រោងសហប្រតិបត្តិការអាស៊ាន-អាល្លឺម៉ង់នេះ មានគោលបំណងកែលម្អគុណភាពបរិស្ថាននៅក្នុងទីក្រុងទេសចរណ៍ខ្នាតតូច និងមធ្យមនៅក្នុងតំបន់អាស៊ាន តាមរយៈការធ្វើឱ្យប្រសើរឡើងនូវការចោលសំណល់ និងការកែច្នៃឡើងវិញ៕
អត្ថបទ និងរូបភាព៖ រដ្ឋបាលខេត្ត
កែសម្រួល៖ លោក អ៊ុន ណារាជ្យ
