នៅថ្ងៃទី១៩ ខែតុលា ឆ្នាំ២០២៥ ឯកឧត្តម ឧត្តមនាវីឯក ទៀ សុខា មេបញ្ជាការកងទ័ពជើងទឹក និងជាប្រធានក្រុមការងាររាជរដ្ឋាភិបាលចុះជួយសង្កាត់សាលាកំរើក ក្រុងសៀមរាប បាននាំយកទ័យ្យទាន និងបច្ច័យប្រគេនព្រះសង្ឃគង់ចាំព្រះវស្សានៅវត្តរាជបូណ៌ និងជួបសំណេះសំណាលជាមួយបេក្ខជននិទ្ទេស A ចំនួន២៦នាក់ មកពីសាលាចំនួនពីរ ក្នុងសង្កាត់សាលាកំរើក ដោយមានការនិមន្តចូលរួមពីសម្តេចព្រះព្រហ្មរតនមុនី ពិន សែម ព្រះប្រធានថេរសភាព្រះពុទ្ធសាសនានៃព្រះរាជាណាចក្រកម្ពុជា និងជាព្រះចៅអធិការវត្តរាជបូណ៌។
ក្នុងឱកាសនោះ សម្តេចព្រះព្រហ្មរតនមុនី ពិន សែម បានផ្តល់នូវពុទ្ធឱវាទ និងដំបូន្មានល្អៗ ដោយបានគូសបញ្ជាក់ថា សិស្សានុសិស្សដែលប្រឡងជាប់សញ្ញាបត្រមធ្យមសិក្សាទុតិយភូមិរួច ត្រូវតស៊ូសិក្សាបន្តយកឱ្យបានរហូតដល់កម្រិតបណ្ឌិត តាមទិសដៅរបស់ប្រមុខរាជរដ្ឋាភិបាល។ សម្តេចបានសង្កត់ធ្ងន់ថា៖ “បញ្ញាគឺជាកញ្ចក់ឆ្លុះបញ្ចាំងពីអនាគត” សម្រាប់ការកសាងសង្គមគ្រួសារ និងប្រទេសជាតិ ហើយចំណេះដឹងជាមូលដ្ឋានដ៏សំខាន់ក្នុងការអភិវឌ្ឍប្រទេស។ សម្តេចក៏បានបញ្ជាក់ដែរថា ព្រះពុទ្ធសាសនាបានដើរទន្ទឹមទៅនឹងអាណាចក្រ ដោយមិនអាចខ្វះមួយណាបានឡើយ។
ឯកឧត្តម ឧត្តមនាវីឯក ទៀ សុខា បានវាយតម្លៃខ្ពស់ចំពោះការដឹកនាំរបស់រាជរដ្ឋាភិបាលកម្ពុជា ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី ដោយបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដែលក្នុងនោះវិស័យអប់រំ និងការកសាងធនធានមនុស្សនៅតែជាវិស័យអាទិភាព។ សម្រាប់លទ្ធផលដ៏ល្អរបស់សិស្សានុសិស្សពេលនេះ គឺកើតចេញពីការខិតខំរៀនសូត្រផ្ទាល់ខ្លួន ការខិតខំបង្ហាត់បង្រៀនរបស់លោកគ្រូ អ្នកគ្រូ និងការយកចិត្តទុកដាក់របស់មាតាបិតា អាណាព្យាបាល។
ឯកឧត្តមបានលើកទឹកចិត្តដល់សិស្សនិទ្ទេស A ទាំងអស់ត្រូវបន្តខិតខំរៀនសូត្រ ដើម្បីក្លាយជាធនធានមនុស្សប្រកបដោយគុណភាព ឆ្លើយតបទៅនឹងការរីកចម្រើនក្នុងបរិការណ៍បដិវត្តន៍ឧស្សាហកម្មជំនាន់ទី៤ និងដើម្បីចូលរួមការពារឯករាជ្យ អធិបតេយ្យ និងសន្តិភាពរបស់ប្រទេស។ ឯកឧត្តមក៏បានផ្ដាំផ្ញើឱ្យប្អូនទាំងអស់ ត្រូវប្រកាន់យកនូវចំណុចវិជ្ជមាន ខិតខំសម្រេចឱ្យបានលទ្ធផលល្អនាពេលអនាគត ចែករំលែកបទពិសោធន៍ដល់សិស្សប្អូន គោរពវិន័យសាលា ជៀសឱ្យឆ្ងាយពីគ្រឿងញៀន និងគោរពច្បាប់ចរាចរណ៍៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
