ឯកឧត្ដម លី វណ្ណសូត្រ អនុរដ្ឋលេខាធិការក្រសួងរៀបចំដែនដី នគររូបនីយកម្ម និងសំណង់ និងជាប្រធានក្រុមកាងារប្រតិបត្ដិក្រុងរុនតាឯកតេជោសែន បានមានប្រសាសន៍ជំរុញដល់ក្រុមការងារពាក់ព័ន្ធទាំងអស់ បន្ដចុះផ្សព្វផ្សាយ ស្ដីពីការប្រើប្រាស់ដីក្នុងតំបន់រមណីយដ្ឋានបេតិកភ័ណ្ឌពិភពលោកអង្គរ និងស្ដាប់នូវសំណូមពររបស់ប្រជាពលរដ្ឋ ដើម្បីស្រង់ទិន្នន័យឱ្យបានច្បាស់លាស់ ដើម្បីរៀបចំផែនការ នៃការប្រើប្រាស់ដីឱ្យបានត្រឹមត្រូវ ក្នុងគោលបំណងធ្វើឱ្យមានច្រកដង្ហើមសេដ្ឋកិច្ច នៃការប្រើប្រាស់ដី ដោយធ្វើការកំណត់ បែងចែកតំបន់ និងលក្ខខណ្ឌនៃការប្រើប្រាស់ឱ្យបានសមស្រប និងមានភាពច្បាស់លាស់ ដូចជាការកំណត់តំបន់អភិរក្ស តំបន់លំនៅស្ថាន តំបន់កសិកម្ម តំបន់វប្បធម៌ តំបន់ឧស្សាហកម្ម និងតំបន់ទេសចរណ៍ជាដើម។ ឯកឧត្ដមថ្លែងបែបនេះក្នុងឱកាសដឹកនាំកិច្ចប្រជុំ ក្រុមការងារ ធ្វើវេទិកាសាធារណៈ និងទទួលសំណូមពររបស់ប្រជាពលរដ្ឋកំពុងរស់នៅក្នុងភូមិទាំង១១៤ ដើម្បីរៀបចំសេចក្ដីព្រាងផែនការប្រើប្រាស់ដីភូមិក្នុងតំបន់រមណីយដ្ឋាមបេតិកភ័ណ្ឌពិភពលោកអង្គរ នាព្រឹកថ្ងៃទី២៧ ខែមករា ឆ្នាំ២០២៦ នៅសាលប្រជុំសាលាក្រុងរុនតាឯកតេជោសែន។
ឯកឧត្ដមមានប្រសាសន៍បន្ដថា ការរៀបចំផែនការប្រើប្រាស់ដីនេះគឺជាការកំណត់ចក្ខុវិស័យដ៏វែងឆ្ងាយនៅពេលខាងមុខ ដោយមានការចង្អុលបង្ហាញច្បាស់លាស់ និងដើម្បីរក្សាបាននូវកេរ្ដិ៍ដំណែល វប្បធម៌ ប្រវត្ដិសាស្រ្ដ អត្ដសញ្ញាណ និងធ្វើឱ្យកាន់តែប្រសើរឡើង សម្រាប់ការប្រើប្រាស់ដី ដែលជាគុណតម្លៃរបស់ដី នៅក្នុងទីតាំងនៃតំបន់រមណីយដ្ឋានបេតិកភ័ណ្ឌពិភពលោកអង្គរ។ កិច្ចការនេះពិតជាមានសារៈសំខាន់ និងចាំបាច់សម្រាប់ភូមិករដែលស្ថិតក្នុងតំបន់រមណីយដ្ឋានអង្គរ ដែលកិច្ចការនេះសម្រេចបាន ត្រូវមានការចូលរួមសហការពីក្រសួង ស្ថាប័ន អាជ្ញាធរពាក់ព័ន្ធ ព្រមទាំងបងប្អូនប្រជាពលរដ្ឋនៅក្នុងមូលដ្ឋានតំបន់រមណីយដ្ឋានបេតិកភ័ណ្ឌពិភពលោកទាំងអស់។
លោក ហែន ពុទ្ធី អភិបាលរងខេត្ដសៀមរាប មានប្រសាសន៍ថ្លែងអំណរគុណចំពោះក្រសួងរៀបចំដែនដី ដែលតែងតែយកចិត្ដទុកដាក់ចំពោះខេត្ដសៀមរាប ដែលតាមរយៈក្រសួងរៀបចំដែនដី ខេត្ដសៀមរាបទទួលបានការអភិវឌ្ឍន៍ច្រើន។ លោកបន្ដថា ពាក់ព័ន្ធទៅផែនការនៃការប្រើប្រាស់ដីនេះ ខេត្ដសៀមរាបបានរៀបចំការប្រើប្រាស់ដីទី១ ពាក់ព័ន្ធទៅនឹងការប្រើប្រាស់ដីនៅតំបន់បឹងទន្លេសាបដែលមានចំនួន៣៣ឃុំ ដែលបានរៀបចំផ្សព្វផ្សាយពីផែនការនៃការប្រើប្រាស់ដីបានរួចរាល់។
លោកអភិបាលរងបានជំរុញដល់មន្ទីរ អង្គភាពពាក់ព័ន្ធ និងអាជ្ញាធរមូលដ្ឋាន ត្រូវបន្ដយកចិត្ដទុកដាក់ ជាពិសេសផ្ដល់ទិន្នន័យឱ្យបានច្បាស់លាស់ និងត្រឹមត្រូវ ដូចជាប្រវត្ដិ និងទីតាំងដី ដែលមានតម្លៃផ្នែកសេដ្ឋកិច្ច វប្បធម៌ និងតម្លៃព្រលឹងជាតិរបស់យើង៕
អត្ថបទ និងរូបភាព៖ លោក អោត រត់
កែសម្រួល៖ លោក ហាំ ម៉េងហួត
