មណ្ឌលសុខភាពអំពិល នៃឃុំអំពិល ជាមណ្ឌលសុខភាពមួយក្នុងចំណោមមណ្ឌលសុខភាពចំនួន៩ នៃស្រុកប្រាសាទបាគង ខេត្តសៀមរាប ដែលបានផ្ដល់សេវាព្យាបាលជាច្រើនដូចជា ពិគ្រោះជំងឺទូទៅ ពិនិត្យផ្ទៃពោះ ពន្យារកំណើត ចាក់ថ្នាំបង្ការ ជំងឺមហារីកមាត់ស្បូន លើសឈាម និងជំងឺទឹកនោមផ្អែមជាដើម ហើយមណ្ឌលសុខភាពមួយនេះ ក៏កំពុងទទួលបានការគាំទ្រយ៉ាងខ្លាំងលើការផ្ដល់សេវាពីសំណាក់ប្រជាពលរដ្ឋ។
លោក ស៊ីម សុវណ្ណារ៉ា ប្រធានមណ្ឌលសុខភាពអំពិល បានឱ្យដឹងថា បច្ចុប្បន្នមណ្ឌលសុខភាពអំពិល មានការផ្ដល់សេវាព្យាបាលជាច្រើនជូនប្រជាពលរដ្ឋ ជាមួយនឹងការផ្ដល់សេវាជារៀងរាល់ថ្ងៃ ដោយគិតទាំងថ្ងៃសៅរ៍ អាទិត្យ។ នៅមណ្ឌលសុខភាពនេះ ការព្យាបាល និងផ្ដល់សេវាជូនពលរដ្ឋគឺដោយឥតគិតថ្លៃ ទៅលើពលរដ្ឋដែលមានបណ្ណក្រក្រី ជនពិការ ចាស់ជរា និងអ្នកមានផ្ទុកមេរោគអេដស៍។
លោកប្រធានមណ្ឌល បានឱ្យដឹងទៀតថា សម្រាប់មណ្ឌលសុខភាពនេះ មានការអភិវឌ្ឍ និងកែលម្អជាបន្តបន្ទាប់ ក្នុងន័យធ្វើយ៉ាងជំរុញឱ្យការផ្ដល់សេវាដល់ប្រជាពលរដ្ឋឱ្យកាន់តែល្អប្រសើរ ជាពិសេសការសង់អគារសម្រាប់អ្នកជំងឺសម្រាលកូនជាដើម។ ក្នុងនោះការអភិវឌ្ឍទៅមុខនេះដែរ គឺដោយសារមានការជួយជ្រោមជ្រែង និងយកចិត្តទូកដាក់ពីអាជ្ញាធរមូលដ្ឋាន ជាពិសេសក្រសួងសុខាភិបាលជាដើម។
ប្រជាពលរដ្ឋដែលមកទទួលសេវា ពួកគាត់បានបង្ហាញថា ក្រុមគ្រូពេទ្យនៅទីនេះបានផ្ដល់សេវាប្រកបដោយការទទួលស្វាគមន៍ រាក់ទាក់ និងយកចិត្តទុកដាក់ចំពោះអ្នកជំងឺគ្រប់ពេទ្យដែលមកទទួលសេវាព្យាបាលដោយមិនទុកអ្នកជំងឺណាម្នាក់ចោលឡើយ។ ពួកគាត់ក៏បានថ្លែងអំណរគុណដល់ក្រុមគ្រូពេទ្យនៅក្នុងមណ្ឌលសុខភាពទាំងអស់ដែលបានយកចិត្តទុកដាក់ក្នុងការផ្ដល់សេវាជូនពួកគាត់៕
អត្ថបទ៖ លោក អោត រត់
កែសម្រួល៖ លោក អ៊ុន ណារាជ្យ
